準備出發東京放血之旅

實在太…太…太興奮了~ 明天一早出發去東京, 原本並沒有打算去放血, 但自加入了那『全宇宙最毒的GROUP』後… 放血指數升至10級!!!  再加上LC官網發佈了大減價, 這趙旅行變成了敗家之旅… 希望回港後,  師奶佬看到我的戰利品, 不會因此而寫休書給我吧~~

昨天收拾行李, 要預備一個吉喼+一個大袋去運送戰利品。但細妹話寄倉行李不得超過20KG! 20KG = 4-5個LC煲而已~ 那唯有HAND CARRY吧, 辛苦一點也沒關係! 也擔心寄倉會被捽爛!! 回來後一定要預約按摩…

說回那個『全宇宙最毒的GROUP』, 有一點慶幸的是我可以告知師奶佬, 我並不是最瘋狂, 並不是最敗家的。正所謂一山還有一山高, 天外有天, 人外有人!  師奶佬睇完相之後, 拋下一句「慢慢儲囉, 你只係用咗年幾, 下次開倉再掃過。」好感動啊~~
 

【降火湯水】 節瓜咸蛋瘦肉湯 (附食譜)

呢個夏天比早幾年熱好多!! 出到街D廢氣加埋潮濕落雨天, 真係抖唔到氣!  個人熱到都忟忟地!!  要煲D下火湯水, 降一降火先…

節瓜係我最愛o既夏天食材之一, 因為既可以用唻炆, 又可以用唻煲湯。以前婆婆成日都煮「節瓜炆冬菇」俾我食, 細細個可以食成兩碗飯架~ 搵日都要自己炆唻食下先。

材料:

節瓜3條

咸蛋2隻

瘦肉1斤

調味料:

鹽

 

做法:

1) 節瓜去皮, 切件;

2) 瘦肉汆水後, 用凍水洗淨;

3) 燒滾水, 下節瓜,和瘦肉, 大火滾30MINS;

4) 加蓋, 轉小火煮1小時後加入咸蛋, 改轉大火煮15mins;

5) 最後加少許鹽調味;

因為加咗咸蛋, 所以鹽o既份量可以減少少。

【夏日湯水】 青木瓜雞腳瘦肉湯 (附食譜)

心情極度興奮!! 下星期就出發去日本, 一早諗好晒行程同埋購物清單…  尋日FACEBOOK度有個非常「毒」o既群組出現咗, 成個下午都響度不停咁覆message...  好開心結識到一班【志同道合】o既敗家煮婦! 由下午3點幾開始不停地message直至凌晨1點幾!! 大家傾到勁興奮, 互相share敗家戰績, 務求令到未中毒o既煮婦踏上呢條LC美麗大道!

  行過街市見到勁多青木瓜,  媽咪話不如用唻煲湯。嗯... 從未試過用生果做食材, 成日都覺得怪怪! 不過媽咪話煲出唻個湯好清甜, 咁就試下啦~

 

材料:

青木瓜1個

新鮮雞腳6隻

瘦肉1斤

無花果2粒

陳皮1小塊

調味料:

鹽

做法:

1)  青木瓜去皮去囊, 洗淨切大件;

2)  瘦肉, 雞腳汆水後用凍水沖洗乾淨;

3)  陳皮用水浸軟後去囊;

4)  燒滾水, 將所有材料放入鍋內, 大火煮30MINS;

5)  加蓋轉小火再煲1小時;

6)  打開蓋, 加少許鹽後轉用大火再滾15MINS, 即成。


記住幫雞腳剪腳甲, 但唔好剪晒, 因為會流晒D雞油出唻。

素菜炒飯 (附食譜)

習慣了星期日煮飯, 為下星期的午餐飯盒作準備。不過要一次過煮晒5日o既飯盒又真係太多而且食物容易變壞, 所以我通常都係最多預兩至三日o既飯菜。到星期三晚必定要再煮!! 通常炒飯係不二之選。快、靚、正!

呢期午餐飯盒都係菜+白飯呢個配搭, 嗯… 改變下飲食習慣, 健康d, 試下d會唔會減到磅   有好多時我地煮飯時, 總有d食材只係用一半甚至少少, 留起佢用唻作炒飯配料唔錯架~ 我就會留起1/3 至一半放入保鮮袋, 最多放到第二日就要用咗佢。因為蔬菜放太耐會流失水份同埋好易壞架!

呢個炒飯我好喜愛, 清清地, 又健康! 但師奶佬就唔太like…

材料:

冷飯2碗

甘荀半條

菜心苗半斤

鮮冬菇1包 (約6片)

調味料:

鹽

日本醬油

做法:

1)  冷飯從雪櫃拿出, 放至室溫回暖;

2)  甘荀, 鮮冬菇切粒; 菜心苗洗淨切粒

3)  燒熱鑊, 把所有材料(冷飯除外)炒香, 加少許鹽調味;

4)  炒約3-5mins後, 盛起備用;

5)  加少許油, 下冷飯炒至鬆散, 配料回鑊炒勻;

6)  加少許日本醬油作調味, 炒勻即成。

麵包入門

終於都踏上了麵包這條”不歸路”!  原先以為增添了焗爐後, 蛋糕將會是我的一生最愛。但原來真命天子另有其”人”… 原因好簡單, 麵包日日都可以食, 但蛋糕日日食的話, 唔變大肥婆都肯定有糖尿病!

因為呢幾次o既自家試驗唔合格, 決定出去上一堂! 尋晚相約好友K小姐一齊去上番堂入門班。原來我o既搓包手法唔正確, 令麵糰唔能夠正常地”快高長大”! 再加上酵母死咗, 發酵情況唔理想… 種種原因加埋, 令我一度失去信心!!  但而家d信心番晒唻喇~~ 決定每兩,三日整一次麵包! 師奶佬, 媽咪, 細妹都有自家健康麵包食。

如果各位有4個麵包份量的食譜, 不妨話我知。因為大部份食譜都係最少8個份量, 但我又唔想麵包放多過一日, 自己又未識得點去刪減份量…

 

睇下個腸仔包, 靚仔到呢~~

冬菇蟲草花蒸雞 (附食譜)

近年冬蟲夏草價錢貴得驚人, 動輒一萬幾千蚊, 仲要得一両咁多!!!!
唔講唔知, 原來呢條非草又非蟲的食材, 可比美仙丹! 冬蟲夏草具有精神安定、 鎮靜、解熱、增強免疫機能、增強心肺功能、促進新陳代謝、防止痴呆、抗癌等作用。而家D人對保健要求越唻越高, 搞到呢D咁有用o既食材越賣越貴。唔怪得連參茸海味舖都俾人打劫!! 

我地呢d平民, 冇乜錢又想保下o既 , 唯有食蟲草花代替啦~  蟲草花其實唔係花唻架, 係一種菌類, 成份同冬蟲夏草有dd相似, 性質平和，不寒不燥，有補肺、腎和護肝養肝的功效，肝腎陰虛人士食用就最為適合。用唻蒸煮或者燉湯都得。

 

 

材料:

鮮雞半隻

蟲草花半碗

 

冬菇4隻

薑絲少許

醃料 (雞):

糖

鹽

麻油

胡椒粉

生抽

生粉

醃料 (冬菇):

糖

麻油

調味料:

蠔油

做法:

1)  半隻雞洗淨, 斬件, 用醃料醃15-20MINS;

2)  冬菇, 蟲草花浸軟, 瀝乾水份備用;

3)  冬菇切片, 用醃料醃5MINS; 薑切絲備用;

4)  將所有材料倒入碟內, 加入少許蠔油拌勻;

5)  燒滾水, 大火蒸8MINS; 即成。

呢個盤可以放上火爐用明火/電磁爐直接煮, 今次我用半蒸半煮方法, 其實只不過係唔抵得用呢個鍋齋用唻隔水蒸... 我先隔水蒸5分鐘, 拎出唻再放上個爐度直接煮多3-4分鐘。嗯... 實質有咩作用!? 冇架~ 冇o個樣整o個樣囉~

 

豆漿全麥包 (附食譜)

師奶佬成日都話我有幾百萬件事"想"做... 但人得一對手; 一天得24小時; 應該放慢腳步咁話喎~ 但奈何我性子急, 慢唔落唻!! 諗到做乜就要即刻去做, 如果唔係就周身都唔舒服!!

呢期愛上了手搓麵包, 一有時間就想搓個麵糰... 焗番個熱辣辣自家麵包食!  星期六冇o野做, 跟咗何師奶個食諳, 試下低溫發酵的威力。其實呢個方法真係超方便! 早一日搓好麵糰, 首先發酵30MINS, 之後就可以放入雪柜內作低溫發酵。第二日放工番屋企拎出唻解凍, 放回室溫便可進行餘下的步驟。

但問題出現了... 我完全無視呢個食譜o既難度, 水份太多, 麵糰太濕! 對於麵包新手o既我真係越搓越氣餒!!! 求求其其搓混d粉就放入雪柜, 但越諗越不安, 決定向何師奶求救!  好多謝佢o既耐心教導, 令我重拾番少少信心... 尋晚放工即刻拎個麵糰出唻解凍, 點知冇乜點發大到... 唉~~ 是但啦, 加咗少少全麥粉再搓多一陣就造型, 進行第二次發酵。諗住會好少少啦~ 點知都係唔得! 最後真係把心一橫, 冇眼睇放入焗爐!  奇蹟出現了~~ 入咗爐約5分鐘, 見到佢地開始發大喇... 個心都停咗少少。出爐後即刻影張相再send俾何師奶, 睇佢有咩意見, 連佢都話唔錯! 所有信心番晒喇呀~

何師奶話呢個食譜係高手級別, 佢唔記得打「新手勿試」。我竟然越級挑戰, 好在最後符碌成功!!

 

麵糰真係超濕, 超黏手!

材料:

高筋粉            250g (但我唔夠250g高筋粉, 所以用咗220g高筋+30g低筋)
鮮奶                236ml (但我今次用豆漿)
糖                    28g (因為用咗有糖豆漿, 所以用咗20g)
即用酵母        3g
鹽                    3g
葡萄子油        16g (我改用olive oil)


做法:

1) 先將以上1-5的材料混和, 搓至沒有粉粒;
2) 加入olive oil搓至麵糰光滑不黏手;
3) 將已搓好的麵糰放上已掃上油的保鮮紙, 室溫放置約15mins;
4) 用保鮮紙包好麵糰, 放入兩個保鮮袋 (記住留少少空間俾麵糰發酵), 放入雪柜作低溫發酵;
5) 發酵最少12小時 (但不多於48小時), 從雪柜拿出後放置室溫回暖;
6) 輕壓排氣, 分成等份後用濕毛巾蓋上, 鬆弛15mins;
7) 焗爐預熱180度, 烤盤掃上少許油, 麵包造型後放上烤盤; 進行第二次發酵約45-60mins;
8) 放入焗爐焗15-20mins, 至表現金黃色;

小小心得:

a) 用豆漿代替鮮奶, 麵包質感較有咬口; 如用鮮奶的話會較鬆軟;
b) 麵包放涼後, 放入保鮮袋可防止水份流失;

沙茶醬金菇扒西蘭花 (附食譜)

端午節對我個人唻講係冇乜特別感覺, 我唔鐘意去睇扒龍舟(由細到大都未正式睇過一次扒龍舟), 又唔鐘意食粽! 但今年唔知點解好想好想學包粽, 媽咪話婆婆以前會自己包粽, 咁我以為媽咪承繼咗婆婆o既真傳, 點知佢話唔識!!! 唉~~ 婆婆仙遊咗2年幾, 成日都好掛住佢煮o既餸… 奈何媽咪竟然冇學到一招半式!  咁唯有等有時間o既時候自己鑽研下啦~~

耐唔時我都會睇下自己個調味架上面有d咩醬料未用/用咗一次冇再用/就過期未用晒, 見到有一樽沙茶醬。其實我唔太like沙茶醬個味, 但有一次唔知煮餸係要用到佢, 買咗番唻用咗一次就放埋咗一邊… 今次就用佢唻整個菜啦!  我絕少煮牛, 一來價錢太貴, 二來牛有毒素對皮膚唔好! 如果唔係可以整個沙茶牛肉… 諗起有次去酒樓食飯, 食過呢味餸, 令我對沙茶醬有少少改觀…

 

材料:

金菇1包

本菇1包

西蘭花1個

調味料:

沙茶醬1湯匙

鹽

糖

胡椒粉

做法:

1)  西蘭花洗淨, 切開備用;

2)  金菇, 本菇去根, 洗淨; 瀝乾水份備用;

3)  燒滾水, 放少許油及鹽, 焯一下西蘭花; 盛起備用;

4)  凍鑊下油, 把金菇及本菇炒乾少少;

5)  下沙茶醬炒勻, 下少許糖及鹽調味;

6)  西蘭花舖滿碟邊, 中間留位放已炒好的菇類, 即成。