【袪濕湯】粉葛鰂魚扁豆赤小豆瘦肉湯 (附食譜)

尋晚真係嚇死人!!! 無啦啦橫風橫雨, 又行雷閃電... 細妹8點鐘度打唻問我有冇飯開, 話由青衣出緊唻。過咗十零分鐘, 打唻話青衣落雹.... 佢都嚇到三魂唔見七魄咁。淨係話要遲D先番到唻!  我等咗半粒鐘再打俾佢, 就話慢駛緊... (因為冇油!) 差唔多9點幾先唻到! 一入到唻就抖晒大氣話"唉... 好彩安全到埗"  我仲問佢做乜唔影低d雹同埋執番幾粒番唻俾我睇。即刻俾佢鬧我我上天!!!

跟住成晚電話響不停, 朋友們個個都爭相SEND d 片同埋相唻... 最得人驚係又一城同九龍塘站! 一個搞到水舞澗咁, 一個就水浸到可以游水咁... 搞到全城惶恐, 好似世界末日打到唻!!!
雖然我安坐家中, 但聽到出面d行雷聲同救護車聲, 自己一個人響屋企都幾驚架~


原本諗住今日焗曲奇, 但又心癢癢想煲湯... 而家最多人煲o既湯一定係粉葛!  袪濕嘛~
去到街市買完粉葛, 行去買鮻魚, 點知冇~~ 好在魚檔老闆夠醒目, 知道我買鮻魚係煲咩湯, 佢話鰂魚煲粉葛都得架! 如果唔係我就唔落魚, 佢又冇咗單生意。

材料:
粉葛       1大個
鰂魚       1大條
扁豆       少許
赤小豆   少許
陳皮       1塊
蜜棗       2粒
薑片       3-4片


做法:
1) 瘦肉汆水, 洗淨; 赤小豆和扁豆用清水洗淨; 陳皮浸軟;
2) 鰂魚洗淨後抺乾水份, 魚肚內灑上少許胡椒粉;
3) 大煲煮滾水, 加入已汆水的瘦肉、赤小豆、扁豆、已浸軟的陳皮和蜜棗; 大火煮滾;
4) 燒熱油鑊, 爆香薑片後放入鰂魚;

5) 慢慢將鰂魚煎成兩面金黃色;

6) 將已煎好的鰂魚撈起, 輕輕放入湯煲內;
7) 從湯煲中取水1碗水, 衝落煎魚的炒鑊內, 攪拌一下, 然後把湯連同魚的精華一同倒回湯煲中;
8) 大火煮1小時, 加蓋後改為中小火煮1.5小時;
9) 最後加鹽調味。

【滋補燉湯】蟲草花雞脾瘦肉燉湯 (附食譜)

好耐冇煲湯喇~ 師奶佬最鐘意飲湯, 佢簡直係「湯怪」! 每次煲湯, 佢最起碼飲成4-5碗... 所以屋企個湯煲要夠大!!! 過年前, 我最心愛o既湯煲因為一次意外而報銷咗... 好彩我用credit card積分redeem咗一個靚靚湯煲。

話晒都係生日飯, 點可以煲湯咁單調呢~ 今次整個燉湯俾師奶佬飲。又可以出動我對靚靚湯盅!


材料:
蟲草花
新鮮雞脾
瘦肉


做法:
1) 蟲草花浸軟, 約5-10MINS;
2) 新鮮雞脾去皮, 去肥膏, 洗淨備用;
3) 瘦肉汆水, 洗淨;
4) 將所有材料放入燉盅, 加入凍滾水;
5) 大火燒滾水, 放入燉盅; 先用大火煮1小時, 後改用中小火燉煮2小時;
6) 燉煮1.5小時後, 打開始蓋加少許鹽。

個湯好清甜... 師奶佬一打開個盅蓋, 飲咗一啖湯, 即刻歡呼!  因為實在太美味了~~

 

 

P.S:我已經盡量去晒D肥膏, 但都仲係有唔少雞油浮面。下次唔用雞脾, 改用雞殼燉。

日本人氣店 「一蘭」

星期一請咗假陪師奶佬, 佢話不如去試下「一蘭」。雖然我唔多鐘意食, 但見師奶佬興奮個樣, 我就捨命陪君子啦~  可能係平日關係, 而且又過咗LUNCH TIME, 所以唔算係好多人排隊。

我地等咗大約20分鐘就有位

其實我不嬲都唔好豬骨湯底, 可以話係抗拒!  可能之前食過一碗豬骨湯拉麵, 係超級油膩, 非常重味精。我連豬軟骨都唔鐘意食.... 好彩呢度可以揀埋湯底o既油膩度, 呢個真係非常之讚!  雖然唔知道佢寫o既"清淡油膩度"有幾"清淡"....

好老實, 碗麵一唻到, 我都怕怕地.... 因為見到個湯都唔係話好"清淡"。試咗啖湯..... 好OK喎~  我最鐘意係佢個麵底, 正!!!! 义燒就肥咗D, 不過好薄。令我諗起打邊爐o個d肥牛, 哈哈哈! 不過點解冇筍架~~ 我最鐘意食拉麵有埋d筍絲同埋栗米粒... 呢個要改進一下。

以後食豬骨湯底拉麵, 我只會唻呢間。

蒜泥白肉 (附食譜)

又一道師奶佬最愛的菜式。佢每次食完, 我都唔俾佢行埋我5步範圍之內, 因為佢陣蒜味實在太~太~ 太勁喇!!!

不過食蒜頭真係好有益架~
- 可以抑制/預防癌細胞生長及心臟病、
- 有助保持血管暢通、提高免疫力、殺菌
- 降膽固醇、血脂
- 天然坑生素
**以上好處, 都係因為蒜頭內的蒜辣素 (allicin)的作用。不過蒜頭切好後, 要擺放一陣 (約15mins) 先用唻煮餸, 咁樣蒜辣素先會釋放出唻。**

其實整呢個蒜泥白肉真係唔簡單呀~ 材料唔多, 不過處理過程都幾多。


材料:
五花腩
花椒
八角
蔥頭
薑片
紹興酒
蒜蓉
指天椒
蔥花
白芝麻

青瓜
鹽

醬汁:
辣椒油
花椒油
生抽
香醋
糖
麻油

做法:
1) 五花腩先洗淨;
2) 將花椒、八角、蔥頭、薑片、紹興酒及1大碗水放入大鍋中, 然後放入已洗好的五花腩;

3) 用小火煮滾後, 加蓋焗5-10mins; 留起小量煮豬肉水備用;
4) 五花腩撈起待涼後, 放入雪柜1小時;
5) 準備另一小鍋, 生抽+小量豬肉水+糖放入小鍋中, 用小火煮至糖溶化後, 加入麻油、香醋、辣椒油及花椒油, 最後加入少許蒜蓉煮滾, 熄火待涼;
6) 從雪柜中拿出五花腩, 切薄片;
7) 青瓜切成絲, 用鹽醃5mins, 榨乾水份後放於碟底備用;
8) 上枱前, 先加熱五花腩; 再舖在青瓜絲上, 灑上蒜蓉、蔥花和白芝麻;
9) 吃時, 沾上煮好的麻辣油。

師奶佬生日飯 (附土匪雞翼食譜)

Happy Birthday to 師奶佬!!

星期日係師奶佬o既生日, 所以星期六我就響屋企安排咗個pre-bday dinner。所有餸都係師奶佬o既至愛 - 土匪雞翼、蒜泥白肉、清酒煮蜆、蟲草花雞脾瘦肉燉湯。仲加埋個心形蛋糕o添~  o個日由朝整到晚, 企到腳都軟埋... 但見到師奶佬咁開心, 乜都抵番晒啦~~

原本係諗住整豉椒炒蜆, 但師奶佬將我隻不銹鋼鑊拎咗去迷你倉... 好彩屋企長期有枝清酒。所以話呢~ 好多時我買定D材料, 係絕對有用架! 雖然個廚房經常性爆滿...


「土匪雞翼」係師奶佬去某一間食店必點o既, 但我成日都覺得幾廿蚊得3隻, 真係好唔抵! 今次終於都決定整一次俾師奶佬食。材料非常之簡單, 做法更都非常之方便。


材料：
雞翼   10隻

醃料:
孜然粉
黑椒粉
胡椒粉
糖
魚露
生抽
黑芝麻

做法:
1) 雞翼洗淨, 抺乾水份後, 加入醃料 (除黑芝麻外)醃2小時;
2) 錫紙舖於烤盤上, 放上已醃好的雞翼;
3) 焗爐預熱200度15分鐘;
4) 把黑芝麻及孜然粉灑於雞翼面;
5) 放入焗爐, 用200度焗20-25MINS;

P.S: 若想雞翼表面香脆, 最後3-5MINS可關掉下火, 只用上火烤焗雞翼表面。

台灣菜 - The Night Market @ Elements (中伏)

近期出街食飯指數飆升!!! 因為呢期真係懶咗好多... 師奶佬就唻投訴我喇~~~ 不過出街食都有好處o既, 因為可以有借口去試唔同餐廳嘛。

之前師奶佬去咗2日1夜leadership training, 我就最開心, 因為可以一個人訓晒成張雙人床! 但師奶佬就慘喇~ 佢話成晚俾佢位同事o既鼻鼾聲嘈到冇覺好訓... 佢終於都明白我o既苦況喇!!!

佢出camp o個日我去咗Elements等埋佢一齊食飯。其實Elements有好多o野食, 可能太花多眼亂, 諗唻諗去都唔知食乜好!  之後見到有間餐廳食台灣菜, 環境都唔錯, 所以決定一試。

餐牌菜式唔多, 價錢都唔平架~ 我地點咗三杯雞、柯仔麵線、肉燥飯、黃金苦瓜、小籠包同冬瓜茶。埋單5百幾蚊... 肉都赤埋!

呢期煮婦界好HIT o既瓷器餐具。

好老實, 食物質素一般。

- 小籠包: 感覺似係乜乜牌急凍小籠包。
- 三杯雞: 味道偏咸, 而且份量超迷你, 1/4隻雞都唔知有冇...
- 黃金苦瓜: 有炸漿, 食落有少少脆口。
- 柯仔麵線: 我食咗一啖已經唔想食! 麵線似鋼線, 味道好淡。仲要收我$75一碗.... 份量少過公仔麵
- 肉燥飯: 不過不失

唔會再有下次!!! 呢d質素用唻呃外國客就可以。

【法式甜品】Hello Kitty Macaron

我對Macaron的著迷並不是太瘋狂, 但往往見到Macaron都忍唔住要試下。試過好多間Macaron, 都係著名法國老牌最o岩我口味! 

FB好多人post自家製Macaron, 我都忍唔住要去試下。因為難度極高, 所以都係向外求教! 今次同埋媽咪一齊去學, 順便進行一次「親子活動」!

其實Macaron材料簡單, 不過要求極其嚴格! 打蛋白霜, 打得唔夠, 成品造型唔靚; 打過龍, 成品又唔夠鬆脆.... 要掌握到剛剛好, 真係有d難度!!

 

呵呵呵~ 好多個HELLO KITTY呀!

唧好個"貓面"先~

呢個蝴蝶結係用糖皮做, 我自己整架~

焗完出唻, 貓面有少少變形.....

因為唧蛋白霜手勢唔好, 搞到每塊貓面都唔一樣, 好難先配對到。加埋D眼、鼻、貓鬚同蝴蝶結, 相似度都有9成架! 


可能唧花技巧唔夠, 如果下次有時間自己響屋企再整, 都係整番圓形。不過Macaron難度實在太高, 除咗技巧之外, 仲要配合埋天氣濕度... 都係買唻食好過!

【袪濕湯水】冬瓜意米扁豆赤小豆煲瘦肉湯 (附食譜)

呢期真係好鬼懶... 放工番到屋企, 食完飯就坐響度睇電視同打機! 多得師奶佬幫手做家務。早幾日覺得好難抖氣, 一睇天氣報告, 嘩~~~ 濕度竟然90-100%!!! 唔得... 要即刻煲番個袪濕湯先!!

可能而家唔係老黃瓜季節, 行晒成個街市都冇一檔有老黃瓜賣!! (我屋企附近個街市, 因為領x瘋狂加租, 搞到有1/3檔執咗...) 最後唯有買冬瓜啦~ 但我又怕唔夠袪濕, 加埋意米。雙重袪濕!!!

材料:

冬瓜 2斤
瘦肉 1斤
赤小豆 1兩
扁豆 1兩
意米 2兩
陳皮 1小塊

做法:
1) 冬瓜先去籽, 切大件 (唔駛去皮架)
2) 瘦肉汆水5mins;
3) 赤小豆, 扁豆同意米用水浸洗15mins;
4) 陳皮浸軟後去囊;
5) 所有材料放入湯煲, 打開蓋大火滾30mins;
6) 加蓋後改用中小火煲1-2小時;

p.s: 瘦肉出汆已經凍水落肉, 連水一齊煲滾, 咁樣裡面d污穢先會走出唻。

Lemon Tart @ Playground

呢期頻頻出去上堂, 學o既都係西式甜品。因為西式甜品比較複雜, 步驟多, 材料份量又要好準確! 中式甜品份量隨意, 煮法又簡單, 唔夠甜就加d糖, 太甜又可以加d水...

但好多時出去學完之後, 響屋企我都唔會再整... 一來屋企人唔多好甜品, 整一大個蛋糕冇人食; 二來佢地多數比較傳統, 鐘意食中式甜品。但今次學o既呢款甜品, 我一定會再整! 因為係我其中最愛o既西式甜品 - Lemon Tart

Lemon Tart 好難整得好食, 一係太甜冇乜檸檬味, 一係太淡又太酸; 呢個食譜好正!!! 佢o既甜度, 檸檬酸度剛剛好。 搵日得閒真係要再整俾自己食!

呢個係整餅底材料: 有低筋粉、糖霜、牛油同雞旦

呢個係檸檬餡材料: 檸檬汁、檸檬皮、砂糖、牛油、雞旦。

呢個係蛋白霜, 做法非常之繁複而且需時。如果屋企有呢個小幫手, 真係好方便! 正努力游說師奶佬中...

餅底焗好後, 先搽上一層朱古力醬, 以防止檸檬餡會整濕個餅底。

舖好檸檬餡, 唧埋個蛋白霜, 用火槍輕輕燒下個面。又靚又好味!!!


P.S: 我好鐘意唻呢個STUDIO學甜品, 價錢唔算係平, 不過我最鐘意佢個環境舒服, D甜品整出唻又夠晒靚, 唔係一般普通貨色!

沒中星星毒的我 @ Chum Chum Mi

我身邊大部份朋友都中咗星星毒... FB每日超過20個post都係講「星星」。好多人問我, 點解我竟然冇中毒!!??  哈哈哈~ 識我o既人都知我不嬲都唔好韓星。第一, 唔識聽佢講o野; 第二, 個個韓星都差唔多樣, 我真係唔識分; 第三, 韓劇節奏太慢, 我會眼訓。

上星期六約咗兩位中咗非常嚴重星星毒o既朋友食飯, 佢地話要食炸雞喎~ 我以為去食KFC... 哈哈哈!!! 佢地搵咗間韓國餐廳, 地點都幾隱蔽, 真係行過咗都唔知架! 裡面環境都幾韓風, 雖然唔算寬敞不過都幾舒服。

先唻個韓式8小碟


今晚主角登場:

第一主角: 原味炸雞拼酸辣炸雞

第二主角: 香辣炸雞

最後加個部隊鍋


呢間韓國餐廳可以再ENCORE!  食物質素唔錯, 侍應大部份都係韓國人 (仲要係後生仔唻架~)