李太私房菜 (LiC9's Kitchen): 1月 2015

2015年1月22日星期四

焗蕃薯棉花糖 (附食譜)

而家每日番工都度日如年... 一來唔習慣新公司o既工作模式; 二來好清閒; 三來同事間冇溝通, 唔講o野, 可以打發o既時間可以話係零!!!

其實我都好爭扎係咪應該要離開... 因為番呢度有個好處就係唔忙, 唔駛點出差。仲有就係準時放工, 番屋企又近!! 唉....好矛盾, 好爭扎!

心血來潮想整個甜品。早排FB瘋傳o既呢個甜品, 我到而家先整。會唔會太out呢~

材料:

日本甜蕃薯 1隻
棉花糖 10-20粒 (細)
牛油 15-20g

做法:

1) 日本甜蕃蒸熟, 去皮; 牛油用熱水座溶;
2) 焗爐預熱180度, 15分鐘;
3) 用义壓爛日本甜蕃薯, 加入已溶化的牛油拌勻;
4) 放入碗仔內輕輕壓實;
5) 放上棉花糖;
6) 放入焗爐焗至棉花糖表面金黃色即成。

師奶佬好欣賞呢款甜品.... 不過食完真人好飽!

2015年1月20日星期二

去完旅行番唻, 不經不覺已經2星期, 但我靈魂仲滯留響大阪......

上星期開始番新工, 直到今日已經第7日。我本身適應能力都好強, 但唻到呢間公司... 我真係完全唔適應!!

1) 公司將不同部門分開不同o既大房;
2) 同事除咗公事之外, 係冇任何交流。(even朝早見到面, 都只會係點下頭。我已經好主動地講早晨, 但得到o既反應都係....);
3) 公司環境安靜得似自修室, 冇人講o野, 冇電話響。只有輕輕的打字聲;
4) 食lunch各人返各人座位食; 食完lunch後有人會訓覺; 有人會上網; 但冇人會同其他同事溝通;
5) 左右隔離同事放假冇人會知;
6) 放工時大家會默默地拎袋走人; 試過番工第二日, 全間公司得番我同另一個同事我都唔知, 最後o個位同事走唻問我收工未 (以為佢關心新同事) 原來係佢都差不多要走, 如果我未走的話我要熄燈, 熄冷氣; 但當時只係6.03pm....

雖然工作時間應該專心工作, 但同事係你每一日對得最耐o既一班人... 點解可以係咁呢? 我係一個幾鐘意講o野o既人, 響呢個咁o既工作環境, 我唔知可以捱幾耐!!!

早前我嬸嬸送咗兩盒日本士多啤梨俾我, 但放咗2星期都冇時間食。諗諗下唔好浪費, 一於試下整樽士多啤梨果醬。

我參考咗肥丁個做法

材料:
士多啤梨          330g
冰糖                  130g
檸檬汁              30ml

做法:

1) 玻璃容器先用熱水消毒, 涼乾備用;

2) 士多啤梨去蒂, 然後切開4份;

3) 將冰糖和檸檬汁加入已切好的士多啤梨拌勻; 放置15分鐘待冰糖有少少溶化;
**根據肥丁的食譜, 因為士多啤梨比其他生果多水份, 果醬顏色會因為氧化而變色, 所以先用冰糖同檸檬汁醃下一陣, 可以防止氧化。**

4) 預備一隻小鍋, 倒入所有材料用中小火煮滾;
5) 期間不停輕輕攪拌, 因為糖很容易會煮焦;

6) 煮至滾起時會產生很多汽泡, 這時便要把汽泡撈起;

7) 10-15分鐘後會開始濃稠; 大致上已經完成;

8) 熄火後馬上放入玻璃容器, 蓋上蓋後馬上倒轉放置;

9) 待涼後便可放入雪柜存放。

網上有不同的方法去測試果醬是否已經完成, 我用了最簡單的方法:
一隻杯放滿冰水, 然後滴一滴果醬落去, 如果直接沉底便等於已經煮好; 若果途中散開溶化, 便要再煮多3-5分鐘。

2015年1月15日星期四

大阪美食

自己一個人去旅行, 最苦惱o既問題就係「食」!因為人得一個, 胃又係得一個... 食得到幾多o野呢~ 所以呢2次我去大阪, 我通常都係去高島屋或者大丸supermarket買壽司番酒店慢慢嘆。雖則我唔多介意自己一個人入餐廳食, 但問題係入到去見到個餐牌乜都想食。叫一、兩碟自己食, 但見隔離枱叫到成枱都係... 不是味兒!

買番酒店食有個好處, 就係買多咗都可以放入雪柜留番聽晚食。而且食幾耐又冇人理你, 食到一半執下戰利品又得! 雖然有人會話 "你咁早番酒店? 浪費晒d時間, 去日本梗係行耐d啦~" 但我覺得去旅行應該係放慢腳步, 每日咁行法唔攰咩~ 咁辛苦不如唔好放假, 上班去吧!

好彩今次行程有2日晚餐都同朋友&她的家人一齊食飯, 所以都食咗唔少好o野!

單單一個麵包都落足心機。

我好鐘意食炸串。呢間店仔係響心齋橋d橫街度, 係無心插柳下搵到, 除咗炸串, 仲有提供前菜, 沙律。不過就冇拉麵/烏冬同飯提供。

唔講唔知, 原來食炸串沾o個兜醬汁係唔會換架, 所以每次只可以沾一次。如果食咗一啖唔夠的話, 可以用餐廳提供的椰菜沾d醬落去, 但千萬千萬唔可以沾第二次! 冇人想食你口水尾, 而你都唔想食人地o既口水尾架~

酒店隔離有間family mart, 我通常都會番酒店前去買d o野飲或者小食。夏天時我買咗盒西瓜汁, 好清甜。今次冬天, 我試咗呢隻士多啤梨酒。我本身好怕飲士多啤梨味o既飲品, 但因為「期間限定」呢4個字, 我決定買唻試下! 一打開, 見到係粉紅色o既液體, 心諗唔會人藥水味卦~ 聞落又冇... 飲咗一啖, 好好飲! 好香o既士多啤梨味, 酒味唔濃!

日本人好鐘意食布丁, 又係響family mart度見到... 第一日買咗唻試, 點知食上癮! 日日番酒店前都要去買番個食。

響大阪o既最後一晚, 我決定豪氣d買盒長腳蟹, 肥美o既拖羅同一盒靚靚壽司番酒店慢慢嘆!

2015年1月13日星期二

大阪7日6夜之旅 - 有馬溫泉, 太閣之湯

上一篇介紹點坐車去有馬, 而家當然要介紹下個目的地 - 有馬溫泉同太閣之湯。

因為我到大阪當日就去咗買巴士套票, 所以出發當日就好順利咁搵到個巴士站同上到車喇。

巴士係指定席, 車票上面會印埋個座位編號。

上車前, 司機會響車門度收飛, 你再按番座位坐低就得喇。我訂咗9:40am 所以我9:30am已經到咗, 要知道日本人係好準時, 所以你一定要預早5-10分鐘。

坐定定, 等開車。嘆番個早餐先! 呢個係響Muji買o既「早熟蛋糕」配埋日本牛奶。正呀~

真係好準時開車架! 個電視機仔話知, 呢班係特急車, 直去有馬。全程55分鐘!

天氣好到不得了呀~ 藍天與白雲!

訓一覺, 話咁快就到!

有好幾間手信店。

炭酸煎餅.... 100円3件! 全人手造。即叫即造, 熱辣辣~

嗯... 其實只不過係一塊好普通o既餅!

先睇睇個地圖, 其實有馬溫泉呢度並唔係好大。因為溫泉區, 只係浸溫泉冇乜特別地方行。

呢度應該係有馬溫泉蒸氣廣場

呢度就係「娘娘橋」

大閣橋

要行上山的........ 未見官先打八十大板!

雖然短短5分鐘路程, 但真係行到索晒氣... 終於都到門口!

可以參考下「太閣之湯」o既網頁: http://www.taikounoyu.com/

呢度可以話同深圳o個d按摩場差不多, 但當然呢度梗係高級d, 乾淨d, 舒服d啦~ 除咗溫泉之外, 仲有岩盤浴、風呂、蒸樂等。

一入門口就見到floor plan

呢幅係比較仔細o既

check-in前, 先除鞋放locker, 再拎住條key去check-in就得喇。去到check-in o既時候, 佢會收咗你放鞋條locker key, 另外會俾以下幾樣o野你:

- 另一條locker key (換完衫, 鎖好貴重o野, 呢條key要帶響手。因為上面有個條碼, 你入到去所有消費都係用呢個條碼, 到你check-out時先俾錢, 所以唔需要帶銀包/錢入去。)

- 浴衣 (佢會叫你揀顏色)

- 一大一小毛巾

- 一個袋 (換好衫後, 你可以用呢個袋放毛巾, 或者你會用到o既o野)

呢度就係更衣室喇, 響check-in counter隔離。換好浴衣, 放好貴重o野。

落一層就去到溫泉區。溫泉區有分男湯、女湯。入到浴衣室, 先搵個locker除低套浴衣同埋隨身物品, 拎住條小毛巾就可以進入浴場。記住浸溫泉前先沖乾淨個身! 放心, 有洗頭水、護髮素同淋浴露提供。

2/F女湯有: 天下の湯、銀泉くつろぎの湯、黃金蒸風呂。天下の湯係最多礦物質o既一個池, 泉水好似泥水咁混濁。

3/F係露天浴場, 有太閣の岩風呂、瓢簞露天風呂、五右衛門釜風呂、寧寧の遊び湯、屋上露天ハーブ風呂。

浸完溫泉, 一定要飲番樽凍牛奶。

除咗溫泉同岩盤浴, 呢度仲有按摩推拿。我都享受咗一個50分鐘o既OIL MASSAGE。真係疲勞盡消! 按完摩食埋個lunch再去浸多一次! 唔經唔覺都玩咗3個幾4個鐘。係時候要離開了~

去番車站對面,有間舖頭專賣酒。行入去見到有炭酸水買, 因為係有馬溫泉特產, 所以點都要買枝唻試一下。以為好似soda咁啦, 點知飲第一啖... 佢d氣係多過soda好多倍。沿途一路飲一路嘔氣.... 真係失禮死人!

初時唻浸溫泉時, 我覺得好尷尬, 因為要同幾廿個三五識七o既人肉帛相見.... 但入到去見到個個都除晒衫, 根本冇人會望你。反而你遮遮掩掩d人會覺得你仲奇怪。

大阪7日6夜之旅 - Day 6 有馬溫泉 (前往方法)

冬天唻日本, 梗係要浸溫泉啦~ 原本打算住番一晚溫泉旅館, 但竟然... 唔受1人投宿!! 某一d溫泉旅館就要我俾2個人錢!!!! 正當我灰心之際, 就去搵下有冇d唔駛住都可以去浸o既。和歌山冇乜特別, 白濱同埋城崎又太遠 (來回要3-5小時), 所以決定去有馬溫泉。

由梅田去有馬溫泉, 有幾條路可以揀:

1) 由阪急梅田駅坐阪急電鐵神戸線至新開地駅, 再轉神戸高速鐵路南北線至有馬溫泉駅 (1,010円)

可以用阪急官方網頁查看車次同車費: http://www.hankyu.co.jp/

2) 由梅田坐阪急電鐵神戸線或者阪神電車至三宮駅 (320円) , 轉神戸地鐵線至谷上駅, 再轉神戸電鐵有馬線至有馬溫泉駅 (930円)

**以上2個方法都可以用Kansai Thur Pass**

3) 由JR大阪駅坐福知山線至三田駅 (760円), 轉神戸電鐵三田線至有馬口駅, 再轉往有馬溫泉 (490円)。

可以用神戸電鐵官方網頁查看車次同車費: http://www.shintetsu.co.jp/railway/timetbl/index.html

但以上3個方法, 太轉折! 除非你想用盡張Kansai Thur Pass, 否則有另一個直接又方便o既方法去到有馬溫泉。就係搭阪急高速巴士(阪急バス)!! Kansai Thur Pass雖然可以搭阪急巴士, 但係不適用於有馬溫泉線 (Airma Express Line)。

梅田 --> 有馬溫泉直達巴士
http://bus.hankyu.co.jp/highway/route/timetable/highway14.php

Airma Express Line有分"急行"同埋"特急"兩種。
"急行" - 梅田、新大阪、千里ﾆｭｰﾀｳﾝ、有馬溫泉
"特急" - 梅田、有馬溫泉

係一架旅遊巴咁, 都幾舒服架!

由梅田出發, 最早車次係08:10; 最後車次係18:20
由有馬溫泉出發, 最早車次係08:40; 最後車次係18:40

呢個網頁可以查看空位:
http://www.j-bus.co.jp/bus/2700130011.htm

阪急巴士站係響阪急梅田三番街內, 位置都幾隱蔽。

我由酒店坐御筋堂線到梅田站, 1、2號出口就係阪急三番街。出閘後一路直行, 見到三井銀行隔離有自動扶手電梯上一層, 會望見右手邊係「紀伊國屋書店」, 前面有個出口, 好似地下停車場咁。

轉右手邊直行, 再向右轉就見到巴士站。

行出大馬路, 左手邊有斑馬線, 見到呢個牌隔離就係個巴士站。

有馬溫泉巴士有套票, 3,700円包「太閣之湯」入場券。如果只係買巴士票, 單程1,330円; 「太閣之湯」入場券 2,400円。當然, 如果你冇諗住去呢度, 梗係唔買套票啦~ 但若果你去有馬都諗住去浸下溫泉o既, 買套票可以慳番千幾円架。但唔知係咪成日都有, 我都係去到counter度先見到張poster!

之後會介紹「太閣之湯」

大阪7日6夜之旅 - Day 5 SHOPPING DAY @ 道具街、APPLE STORE、無印良品、LE CREUSET

今日又係SHOPPING DAY! 上網見到唔少人話大阪有條道具街有好多廚具買。我呢個師奶又點會唔去走一轉!

道具街響大阪難波無印良品後面, 所以我先行咗無印良品。衫褲鞋襪我冇乜興趣, 所以直落到地庫o個層。見到好多漿料包, 湯包等等...

呢度只係冰山一角, 行到呢個corner, 真係好易"失心瘋"狂掃! 因為有好多響香港未必會有。

因為我要留番d精力去行道具街, 所以只係掃咗幾包。

由無印良品行番出去, 左手邊有條巷仔, 一路行入去就到。因為我實在太~太~太興奮, 所以只掛住一路睇, 一路行, 冇影過相。

當我行到一個supermarket, 俾呢個咁大舊菜吸引住! 心諗: 可唔可以運番香港呢? 呢間supermarket專係賣貨俾附近d食店, 所以大部份o既食材都係大大包, 大大罐, 大大件!

去到道具街點可以空手而回呢~ 呢度有部份係響道具街買, 有部份係響100円店買。

行完道具街, 我就去咗Namba Park o既Le Creuset店度睇下。原先係好想、好想抬個福袋番去, 但真係諗唔到點拎, 所以最後決定放棄! 等下次師奶佬同我唻o既時候先抬!! 我響間shop度兜咗差唔多半個鐘, 最後決定點都要買番d o野...

個LC PINK STAND, 我買的時候其實唔知香港賣緊幾錢, 只係覺得價錢又唔係太貴, 所以就買咗! 後尾D敗婦話番我知, 原來個STAND香港賣緊HKD1200, 而我呢個STAND 只係9500円 (即係HKD617.5) 足足半價! 早知買多幾個番唻啦~

開開心心買完, 去醫下個肚先。俾我見到日思夜想o既doughnut! 《Krispykreme》即刻買番2個唻食下先.....

抽住咁重o既o野, 當然要先番酒店啦~ 放低d戰利品, 我又再出發!! 今次目標係APPLE! (唔係食o個隻呀~)

我唻大阪之前, 同師奶佬講, 而家d日圓咁低, 不如去日本買MacBookPro啦~ (因為佢講咗好耐話想買)。所以點都要去心齋橋度睇睇。退埋稅, 計番港紙.... 竟然平2千蚊!!?? 二話不說同個sales講 "please give me the new one", 就係咁... 我就抬住呢部機番咗酒店! 飯都未食呢~~~

今次旅行, 我自己shopping買o既所有o野加埋都不及呢部機咁貴呀!! 仲要只可以hand carry唔可以寄倉, 拎到我死死下!