Happy Birthday to ME

Happy Birthday to me~ Happy Birthday to me~ Happy Birthday~ to~ me~

多謝各方好友的祝福, 踏入"3"字頭... 心情複雜! 成日都覺得"3"字頭離我好遠, 但原來已經靜悄悄地唻到我身邊。要捨棄"鴨仔2", 改寫"耳仔3"喇!!

今年生日收到好多驚喜, 真係好多謝你地對我的寵愛。有你地係我人生中最快樂, 最幸福的事, I love you ALL~~

生日不得不提「生日蛋糕」, 今年收到一個好特別, 好靚, 好surprised的生日蛋糕!多謝你地送我呢個生日蛋糕, 初時以為係一個普通朱古力/CHEESE CAKE, 點知.... 竟然出現一個"CHANEL BAG"響我面前! (真失察, 應該拎埋我個CHANEL BAG同呢個CHANEL CAKE一齊影番張相... 真係勁似!!) 仲要係Earl Grey tea味的蛋糕... 特別鳴謝 - Zinnia Yip  雖然並唔認識你本人, 亦未見過面。 但你係我朋友個朋友, 總算相識 (好夾硬囉~) 好多謝你漏夜為我趕製呢個蛋糕, 真係好靚, 好好味!!

當然要多謝呢班寵愛我的朋友們~

俾媽咪睇呢張相, 佢第一句就問"佢寫錯咗個名喎~" HAHA... 呢個名係佢地幫我改架~ 因為上年去旅行, 佢地話我好似媽媽咁喎! (藥油,紙巾,雨傘, 藥包, etc乜都帶齊) 冇理由叫"JOEY媽"咁難聽架嘛... 而且勁似D媽媽生囉! "JOJOMA" 幾好聽呀~

P.S: 生日蛋糕寫錯名/拎錯生日蛋糕係一件好嚴重的錯誤/過失!! 我地有一位朋友就曾經有過呢個經歷, 仲成為咗我地呢班朋友茶餘飯後話題




 

日式炒雜菜 (附食譜)

醫生話要均衡飲食, 營養師話每餐多菜少肉。日本人對健康有一套方法, 好似你去食吉列豬扒咁, 一定會有一大堆椰菜絲送埋俾你, 食落好似冇咁罪惡…

我最愛炒雜菜, 有菜, 有菇又有豆… 方便快捷又美味。

 

 

材料:

日本大白菜

甜豆

溫室冬菇

蒜蓉

薑片

調味料:

鹽

糖

味醂

日本醬油

料理酒

胡椒粉

芝麻油

做法:

1)   先洗淨所有材料, 甜豆去頭去尾; 日本大白菜切條;冬菇切條;

2)   凍鑊下油, 爆香蒜蓉和薑片;

3)   下甜豆爆炒2-3MINS, 下日本大白菜及鹽炒勻;

4)   下冬菇條和其餘調味料炒勻;

 

      5)   最後灑上鰹魚片, 增加日本風味。

【深夜食堂】奴豆腐

食日本菜好多時都會有前菜供應, 今次簡簡單單整個「奴豆腐」。聽個名就即係豆腐, 但點解叫「奴豆腐」呢…  睇番深夜食堂本書, 原來奴豆腐即係冷豆腐, 由日本江戶年代流轉的名稱。嗯… 其實都唔駛太深究佢o既故事背景, 好食咪得囉~

要做日本菜當然要用日本材料啦… 咪先夠原汁原味嘛! 今次買唻兩磚日本絹豆腐。咁絹豆腐又係乜東東呢!? 原來日本有分兩種豆腐 – 「木綿豆腐」同「絹豆腐」。 凝固豆漿的時候，除去上層澄清部分後的是「木綿豆腐」，保留澄清部分的是「絹豆腐」。所謂的「絹豆腐」是種非常細緻滑嫩，看起來如同純白絲綢一樣的豆腐；所以適合做成清涼爽口料理或者煮味噌湯; 所以通常生吃用「絹豆腐」。

「奴豆腐」做法超簡單, 買磚絹豆腐番唻, 食的時候放上自己喜愛的配料就搞掂。今次試兩種口味 – 傳統的鰹魚片+少許日本醬油同埋海苔芝麻飯素。

通常日本人會用芝麻醬唻做涼拌小食的醬汁, 但本人對芝麻醬有種難以接受的感覺, 所以係唔會有芝麻醬出現響我屋企個廚房!

將絹豆腐從包裝盒倒出, 放在碟上, 在豆腐面上舖上配料/調味料, 即成。

Wasabi醬油焗三文魚 (附食譜)

早幾日買咗兩塊急凍三文魚番屋企, 想整個焗三文魚但又唔知用咩調味好… 我諗起曾經睇過鬼嫁個BLOG, 佢用Wasabi唻做醃料。三文魚同Wasabi可以話係絕配, 材料簡單, 又唔駛專登去買, 一於試下!

材料:

三文魚2大件

調味料:

Wasabi

Olive oil

日本醬油

味醂

做法:

1)   先將三文魚解凍, 用水沖洗一下後用廚房紙抺乾, 放在焗盤上;

2)   調味料拌勻後淋在三文魚上, 醃15-20MINS;

3)   焗爐預熱180°C

4)   把焗盤放入焗爐, 180°C焗15-20MINS;

焗盤唔夠大… 兩件三文魚好迫夾!!!

【深夜食堂】蟹子沙律 (附食譜)

我好怕夏天! 天氣又熱又焗, 行出街唔駛半粒鐘已經FEEL到自己開始溶緊呀~ 放工搭地鐵先最攞命… 個個行到落地鐵站, 唔係身水身汗, 就俾雨淋到濕晒, 大家迫埋一齊 o個種「肌膚之親」的感覺…… 我通常都會等多一,兩架車先上, 都唔知點解好多人見到個車卡已經冇晒位, 都仲要迫入去… 地鐵已經加開咗班次, 等兩,三分鐘上另一架咪仲舒服~ 都唔明點解要迫…

夏日炎炎最好食冰涼的前菜! 去食日本菜我好少會叫前菜, 因為唔抵食! 細細碟, 兩, 三口就已經食晒… 自己整就唔同喇, 價錢平, 份量又多! 好似呢個蟹子沙律咁, 出面餐廰一碟起碼四,五十蚊… 仲要冇咁大碟喎~~~

切青瓜切到眼矇矇呀… 細如髮絲, 食落先夠爽口!

材料

溫室青瓜1條

蟹柳6-8條

蟹子1盒

調味:

BB沙律醬

做法:

1)   溫室青瓜略略洗一洗個皮, 切頭切尾, 去囊;

2)   切開一半, 再分成4份然後切絲;

3)   蟹柳解凍後拿掉包裝膠, 用熱水浸20MINS;

4)   用手撕成絲;

5)   將青瓜絲和蟹柳絲瀝乾水後放入雪櫃,

6)   食前由雪櫃拿出, 加入BB沙律醬和蟹子混和, 即成。

一年一度母親節 (附蝴蝶酥食譜)

世上只有媽媽好~ 有媽的孩子像個寶~

尋日係母親節, 大部份人都響呢一日一盡孝道。而我… 好老實冇同媽咪/奶奶慶祝! 因為我覺得孝順媽媽唔係一年得一日, 如果係乖, 係孝順o既, 日日都可以係母親節! 飲茶, 送花, 陪行街平時都可以做, 只係睇你有冇呢份心o者… 老人家唔需要太多花巧o野, 閒時打個電話俾佢地, 有時間同佢地食個飯, 已經好開心!

尋晚媽咪難得下廚, 煮咗我同阿妹最愛o既”炒潮州麵”! 有人會覺得點解母親節要媽咪煮飯俾我地食, 覺得我地好唔o岩… 但我想講, 做女人肯企響廚房幾粒鐘去煮餐飯, 雖然辛苦… 但屋企人番唻食, 食得開心已經好滿足。媽咪尋晚煮得開心, 我地又食得窩心。一路食一路傾計… 吵吵鬧鬧又一晚!

 

呢期師奶佬好似愛上咗蝴蝶酥, 走咗去著名o既餅舖買咗一盒成$2xx o既蝴蝶酥! 唔駛一星期已經食完… 既然師奶佬咁鐘意食, 不如自己整啦~ 肯定平過出去買!  上星期五叫師奶佬買定材料, 放工食完飯拿拿林趕番屋企焗o野! 超簡單, 毫無難度!!!!

材料:

急凍酥皮磚一包

白砂糖

牛油

做法:

1)   急凍酥皮磚解凍, 用麵粉捧壓至2-3MM厚;

2)   枱面灑上一層白砂糖, 將酥皮放上面; 再灑上一層白砂糖;

3)   將酥皮兩邊向入摺4份1, 再摺多次4份1, 中間留有少少空間;

4)   牛油用熱水座溶, 酥皮兩邊分別摺了兩次4份1之後, 掃上一層薄薄的牛油後再對摺;

5)   然後用保鮮紙包實, 放入雪櫃雪30MINS;

6)   同步預熱焗爐180°C;

7)   將酥皮從雪櫃拿出後, 切成1CM厚;

8)   焗盤掃上一層牛油, 放上酥皮, 每件之間留1CM空間; 放好後再於蝴蝶酥面掃上一層牛油;

9)   將焗盤放入焗爐, 180°C焗20-30分鐘;

10)  焗完後將蝴蝶酥放出放置在鐵架上待涼即可食用。

 

姊妹淘飯聚

 好耐冇招呼朋友上唻, 適逄上星期五公眾假期, 約咗班姊妹淘唻我屋企開餐。佢地話好耐冇上唻試菜… 難得有人願意做白老鼠, 我當然樂意煮啦~ 我早於一星期前已經草擬好菜單, 為咗要清除家中的清酒存貨, 一於整個日本和風料理。

5個女人相聚, 少不免講下化妝, 講下護膚, 講下八婆o野… 我響廚房忙東忙西時, 班姊妹好似小朋友睇媽媽煮飯咁, 坐響門口陪我傾計。(個場面都幾搞笑~) 今晚菜式簡單, 洗洗切切已經一早做好晒, 所以今晚等齊人就可以開飯喇。

今晚有: 蟹子沙律, 奴豆腐, 清酒煮蜆, 日式炒雜菜, 芥辣醬油焗三文魚

 

飯後收到份好窩心的禮物! 知我鐘意massage, 送我Oriental Essence o既massage 90mins… 係一份好有heart o既禮物, 好surprised, 好開心!! 多謝你地~~

我的生日禮物 (附蜜汁义燒食譜)

上年已經揀好咗今年生日禮物...  往年生日都係手錶/手袋, 但升呢成為李師奶後, 生日禮物已經由手錶同手袋改為廚房用具!! 阿妹話我降咗grade, 但我就唔同意喇! 我而家所揀選o既生日禮物, 可以話人人受惠!! 我係為大眾謀福祉。再者, 為咗加強我煮飯o既功力, 菜式的多元化, 師奶佬個胃... 今年決定忍痛, 放棄一直想要o既手袋, 改為呢個大牛龜玩具...

各位, 請以熱烈o既掌聲歡迎我的新寵兒 – TEFAL OF2658

呢位新歡, 集齊晒我想要的條件於一身 - 24L容量, 2000W火力, 加埋『自動清洗內壁功能』! 呢7個字已經令我雙眼發光...淨係睇呢個賣點已經不作他選!! 不消十分鐘已經叫sales姐姐拎個新o既俾我!

原本諗住可以即時捧走, 即晚有得用。 點知冇現貨, 要響倉度拎…. 好彩SALES姐姐夠好人, 二話不說幫我安排”URGENCY DELIVERY”, 第二朝早10點零鐘已經安全運送到我家!

SIZE剛剛好… FIT晒個位

即晚唻個試驗品 – 蜜汁燒义燒

材料:
柳梅一條約$30

醃料:

糖

玫瑰露

胡椒粉

义燒醬

調味料:

蜜糖

水

做法:

1)   先將豬肉洗淨, 抺乾水;

2)   用醃料醃2小時;

3)   將焗爐預熱240°C約 20分鐘;

4)   焗盤掃上油, 將豬肉放上並掃上蜜糖水;

5)   焗盤放入焗爐, 用240 °C焗10分鐘;

6)   反轉另一面, 掃上蜜糖水再焗10分鐘; 即成。

 

小小心得:

a)   因為义燒醬帶咸味, 所以醃料不用放鹽。

b) 醃豬肉前先泡水3-5分鐘, 令豬肉吸收多d水份, 焗出唻就唔會太乾。

c)   應該揀肥少少o既柳梅, 食起上唻會較juicy

 因未充分掌握到焗爐o既火力同時間, 出唻效果冇預期中咁好! 真係要多d同「佢」溝通溝通, 互相了解下先得!

特別鳴謝師奶佬送我呢份生日禮物! 往後的日子, 我會為你鑽研不同的美味菜式。誓要將你變做一個大肥佬~~