自家釀酒工場 (梅酒, 檸檬酒)

已經番咗新工一段時間, 雖然工作性質一樣但角色位置唔同咗, 難免需要多少少時間去適應。一直以來我都唔鐘意做工廠, 但而家Buying Office, Trading Office響香港真係買少見少了~  一係就執笠, 一係就將operation搬番上大陸...
而家番工真係比之前忙好多, 有好多仔細o野要跟得好貼。終於都明白到以前d suppliers服侍我真係唔容易 :p

今年夏天我屋企變咗小小的釀酒工場。有日本o既紀州南高梅同意大利o既西西里檸檬! 

梅酒就要浸最少一年; 所以未有得飲住。
西西里檸檬酒只需要浸30日就可以收成了~~ 上星期收成後, 試飲咗一小杯... 陣陣檸檬o既香味, 加冰飲最正!

以後又多一樣撚手o既可以用禮送禮了~~~

蒸水蛋當生日蛋糕

師奶佬尋日生日，因為我失業中所以大家都決定慳番個錢，留番響屋企簡簡單單食個飯就算。師奶佬有時都幾易話為，好似今年咁，我話冇錢買生日禮物俾佢，佢話有冇禮貌都OK。我話2個人食唔晒個蛋糕，所以我唔諗住整，佢又話OK。淨係要求有碗靚湯飲下！

訓醒覺落街食完o野就去買餸，我好enjoy師奶佬放假陪我去街市買餸，感覺好幸福，好老夫老妻FEEL。

今餐生日飯真係好鬼簡單同清淡。花膠瑤柱螺片燉雞、白灼菜芯、蒸水蛋、南乳蓮藕炆豬肉。3餸一湯白飯任裝！

雖則師奶佬話唔介意冇生日蛋糕，但生日吹爉燭是常識吧！所以就搵蒸水蛋代替... 個個都話我好有創意！我自己見到呢張相都覺得好好笑，就咁睇都幾似個蛋糕。

唔知師奶佬許咗個咩願呢～～

徬徨、迷惘、無助...

失業將近一個月，已經變咗做「半宅師奶」！即係除咗落食飯之外，基本上我係足不出戶... 成個人冇晒心機，冇晒動力！早幾個月前透過一位朋友預約咗一個泰國師傅算下運程，終於都等到今日！師傅話算到我運程應該唔錯，但所開o既牌全部都係唔好！連師傅都覺得好奇怪！佢話我呢期運情好差... 做乜都唔得，個人好徬徨、好無助！而且係差到會大喊一場o個隻！咁我又未止於咁軟弱o既... 不過其實我都覺得奇怪，點解send咗咁多信出去，一d消息都冇！從未試過咁樣......

師傅話我身邊冇人幫到我，一直都係靠自己！講得冇錯，由我18歲開始o既人生都係靠我自己！有時真係覺得好攰... 好想抖下！幸好，身邊有家人同朋友o既支持。其實我覺得只有身邊有人支持已經足夠！

師傅話我要到6月，運氣先會好番少少... 6月！仲有3個月呀～ 點捱...... 想搵份part-time做下，等自己唔駛日日都屈響屋企！再咁落去我怕我會有抑鬱症！

李太XO醬 （附食譜）

我細妹好鐘意食XO醬，炒飯、炒麵唔落辣椒油就一定要落XO醬。但市面買o個D一係就唔夠料，一係就唔夠辣。所以我決定自己整！

自從我整咗第一次之後，好多親戚朋友耐唔時都問我幾時會再整。因為整一次都要花成日時間，淨係準備功夫已經用咗大半日去⋯⋯ 所以我逢過年前先會整。一來可以當禮送俾人，二來細妹最鐘意係XO醬用唻炒蘿蔔糕！

材料：

乾瑤柱
金華火腿
蝦米
乾指天辣
新鮮指天辣
花生油

調味料：
蠔油
鹽
辣椒油

做法：

1) 乾瑤柱早一天浸至軟身，瀝乾水份撕成一絲絲備用；
2) 第二天用大鍋先蒸乾瑤柱5mins; 金華火腿蒸8mins (金華火腿蒸完後會有油份留低，要留起);
3) 金華火腿，乾指天辣，新鮮指天辣切碎備用；
4) 蝦米浸軟身；瀝乾水份備用；

5) 大鑊內倒入大量花生油燒滾；
6) 先放入乾瑤柱煮2-3分鐘至半透明（不要煮至金黃色）；
7) 然後放入金華火腿和蝦米，炒勻；
8) 待乾瑤柱開始轉成金黃色便放入所有指天椒和調味料(連同金華火腿的油一齊倒入)；
9) 直至乾瑤柱煮至金黃色便可熄火，待XO醬稍微冷卻便可入樽；
10) 放至完全冷卻後便可放入雪櫃保存，每次用的時候用乾淨筷子／匙羹取出便可。

P.S: 

a) 盛放XO醬的器皿必須要事前消毒(大火蒸5mins)，涼乾才可用；

b) XO醬倒入器皿後，油必須要蓋過材料；

c) 蒸完金華火腿後的油(即精華)會留響碟上，加入XO醬會令味道更加香；

d) 因為係用大量的油去煮，所以油溫好高，係好難試味。(辣椒，金華火腿，蝦米試唔到夠唔夠味) 可以試乾瑤柱。

e) 如果先煮辣椒，就要大火燒滾油後轉中小火。因為淨煮辣椒的話會出勁多煙同埋好嗆喉。先煮辣椒，雖然辣味會勁D同埋會香D，不過辣椒煮過火會變苦同埋會煮穠。
f) 用花生油比粟米油更香；
g) 有老師傅話加入咸魚會令XO醬更加香口，下次可以一試！

咸肉炒塔苦菜 （附食譜）

過完年應該會有好多工見啦～但點解到而家都冇乜聲氣呢!? 唔通個天要我做少奶奶？呵呵呵⋯⋯ 咁就要辛苦師奶佬lu~

今晚約咗朋友仔食飯，原來我地不經不覺已經相識咗十二年。我地係做暑期工識架，短短2個月o既相處，眨下眼已經十年。所以話呢～友情就係咁奇妙！今晚仲講番當年好多趣事呢～ 年輕o既時候真係開心，無憂無慮。


『塔苦菜』好多人都唔知係乜，聽都未聽過。但其實應該見過下，只不過大家唔知係乜唻所以先冇買唻煮。但我就由細食到大，因為以前婆婆耐唔時都會煮唻食。

呢個就叫做『塔苦菜』喇。(因為煮之前唔記得影相，呢張相係響網度搵o既。)
通常都係響南貨舖有得買，我見九龍城街市有某一，兩個菜檔都有得賣。

上一上Google就搵到好多唔同o既名。塌菜、烏塔菜、塌棵菜、太古菜、烏菜、塌姑菜、月菜等等。係安徽省出產，係白菜o既一種，因為響塌地生長而命名。

上海菜好多時都會煮呢種菜。婆婆以前多數都係用冬筍炒，有時會加埋落年糕度。今次我用咸肉炒，鹽都唔駛落。

材料：
塔苦菜    10棵
咸肉        8-10兩
蒜頭        6粒

做法：
1) 塔苦菜一開4或者8, 視乎菜o既大小；
2) 切好後用清水浸大約5-10分鐘，撈起瀝乾水份；
3) 咸肉用清水洗一洗表面 (如果怕太咸，可以先汆一汆水。)
4) 大火燒滾油，用蒜頭起鑊；
5) 爆香後加入塔苦菜，加少許清水炒；
6) 加入咸肉炒至塔苦菜軟身，即成。

食落好似白菜仔咁，都幾好味架。

大年初一開年飯 （附雪菜毛豆百頁食譜）

恭喜發財、身體健康、萬事如意、羊年行大運！

失業將近一個月，雖然係好舒服，但壓力越唻越大⋯⋯  好希望可以快D有工番！

今年大年初一，因為大舅父過完年之後就要番加拿大，所以請咗兩位舅父唻我度食飯。婆婆早幾年仙遊，大家都好懷念婆婆o既手勢，但因為我當時仲未對廚藝有興趣，所以冇向婆婆偷師。而家唯有依靠記憶裡的味道，嘗試煮出婆婆的味道。

醃篤獅、咸肉炒塔苦菜、雪菜毛豆百頁、上海春卷、旺菜粉絲燴蛋角、醃獅蚶、蟲草花蒸雞。

《雪菜毛豆百頁食譜》
材料：
罐頭雪菜 1罐
毛豆 約3-4兩
百頁 約4-6塊
鹽 少許
水 約1-1 1/2杯

做法：
1) 罐頭雪菜瀝乾水份，切碎備用；
2) 毛豆去殻，燒滾水加少許鹽汆水5分鐘，瀝乾水份備用；
3) 百頁切成約半吋闊，大碗內注滿水，加入2湯匙食用梳打粉浸至軟身和少許反白(30-45分鐘)，瀝乾水份備用；
4) 大鍋內燒熱油，放雪菜和少許鹽炒勻；
5) 加入百頁和清水，炒至百頁軟身後，加入毛豆炒勻，即成。

正正因為失業，好多時響屋企都無無聊聊，上兩星期我PAT PAT痕響Facebook度開咗個Page
「李太私房菜」。希望大家都多多捧場！

【滋潤湯水】花膠螺片瑤柱瘦肉煲雞

之前去睇中醫，醫師叫我最好每日都飲花膠湯，話對身體好。（每個人體質唔同，有
D人唔可以食花膠，所以早好都係去問下醫師）但花膠始終都唔平，唔日日都煲，一星期煲兩次都係燒銀紙。經敗婦P介紹，原來價真棧有平靚正花膠買。一大包有26隻，都係三百零蚊度。原先都怕發完之後唔會好大隻又或者好薄身，但發完之後都有手掌咁大隻而家都算係厚身。起碼煲完湯都仲有得食！
一次過發晒佢，再逐隻用保鮮紙包好放入冰格。到要用時解凍就可以用，好方便！

每逄大時大節師奶佬就會好忙，呢期又係成日都好夜先番，梗係要煲啖靚湯俾佢飲啦～ 煲足3粒鐘，超好味呢～

材料：
花膠6隻
冰鮮雞1隻
乾螺片6-8片
瑤柱5粒
瘦肉1斤

1) 燒滾水，瘦肉汆水；
2) 冰鮮雞洗淨；
3) 花膠解凍；瑤柱，乾螺片浸軟備用；
4) 另一大鍋燒滾水，將所有材料放入大鍋內；
5) 打開蓋用大火煲30分鐘，然後加蓋用中火煲2小時。
6) 最後加鹽調味。