薑檸酵素 (附做法)

早幾個月前我為麵包而瘋狂, 今日我為酵素而瘋狂! 明明兩星期前先整好第一樽檸檬酵素, 仲未收成, 未知成唔成功... 竟然又膽粗粗去整另一隻, 仲要一整就整咗3大樽!!!

中秋已過, 天氣會開始變得乾燥, 氣溫亦都慢慢變得清涼。為準備冬天o既來臨, 我決定要整番樽薑檸酵素唻暖暖身。

材料:

新鮮檸檬6個

薑兩大舊

原糖800g


做法:

1) 前一日把檸檬及薑洗淨, 風乾備用;

2) 玻璃瓶, 砧板及生果刀用熱水沖洗, 風乾備用;

3) 薑切成幼條, 檸檬切片, 把核拿出;

4) 先舖一層原糖在玻璃瓶底, 放一層薑, 一層檸檬及一層原糖;

5) 如此類推, 舖至最頂一層必須為原糖;

6) 用保鮮紙密封樽口, 蓋上瓶蓋;

7) 每天放氣一次, 及搖晃玻璃瓶, 令生果沾滿糖漿;

8) 21日後收成, 隔渣倒出酵素液放入另一膠樽內, 每天早,晚飲用30ml+凍水

中秋做節飯 (冬菇炆五花腩附食譜)

上星期中秋節, 成個禮拜掛住整月餅, 飯都冇煮呀~ 正日當日公司放4點, 好彩細妹幫手去買餸咋~ 原本諗住整味雞, 但媽咪話做節D雞好貴, 平時食就算, 做節唔一定要食雞。既然係咁... 就整個炆餸啦!  好耐冇炆冬菇喇... 朝早叫師奶佬幫手浸冬菇, 等我番唻就可以煮喇。

我最鐘意用Le Creuset唻炆餸, 一來煮完可以原煲上枱,夠晒靚; 二來鎖水好, 唔駛落太多水; 三來傳熱快, 炆餸夠入味;  今次用LC 20cm round


材料:

五花腩

冬菇

薑

蔥


醃料:

鹽麴

麻油

料理酒

糖

胡椒粉

生抽


調味料:

冰糖

老抽

蠔油


做法:

1) 冬菇先浸軟, 冬菇水留起備用;
2) 先將五花腩洗淨, 切成方丁大小;
3) 薑切片, 蔥切段, 備用;
4) 凍鑊落油, 放薑片及蔥白爆香;
5) 把五花腩下鍋, 皮向下煎至金黃色;
6) 加入適量的冬菇水 (可蓋過3分1五花腩)
7) 加入適量冰糖, 蠔油, 加蓋中火煮30MINS;
8) 打開蓋, 加入少許老抽, 用細火炆煮20MINS;
9) 最後加入少許莞茜作裝飾。

小小心得:

a) 五花腩洗淨後, 先走油再切成丁方, 然後再炆煮會較香口, 又可保持肉汁;
b) 加入豆卜可減少油膩感;

中秋節快樂~

『中秋節快樂』,  祝大家人月兩團圓!

細細個o既時候, 最鐘意o既節日除咗新年之後, 最鐘意就係中秋節! 每年臨近中秋節, 媽咪會儲定d月餅罐同埋買好多好多蠟燭俾我地。因為爺爺同嫲嫲係住村屋, 我地成班堂兄弟姊妹最鐘意響屋前塊空地度玩。每年入到去過節, 第一時間走去執磚頭砌"爐頭"... 食完飯就成班堂兄弟姊妹坐響地度玩煲蠟! 玩到唔捨得走架~~

好幾年前政府已經嚴禁煲蠟, 呢樣"傳統活動"又真係幾危險o既~ 而家d小朋友好多都係響個月餅罐裡面插落蠟燭, 睇住佢燒... 唉~ 咁又有乜好玩呢!!! 以前邊會買吹氣燈籠, 俾你都唔要呀! 一定要點蠟燭o既燈籠, 仲要一路行, 怕佢會燒著... 而家個個都拎住個吹氣公仔燈籠, 冇晒氣氛!!

時代唔同, 玩o既o野都唔同! 今年我都叫師奶佬買個吹氣燈籠俾我玩下, 應下節!

自製檸檬酵素 (附做法)

結婚前為咗健康地減磅響網上面做咗好多資料搜集, 知道有一種叫「酵素」o既o野, 當時未愛上"自家製", 所以響一間著名美容中心度買咗唻試。效果出奇地好, 但因為價錢太貴, 結完婚之後就冇再飲lu~

呢期「自家製酵素」非常之盛行, 家家戶戶都總有一樽半樽。酵素除咗可以用唻食用外, 仲有一種叫做環保酵素, 係for清潔用。

我今次整個檸檬酵素, 因為自結婚以唻, 心廣體胖咗唔少... 見自製食用酵素咁簡單方便, 唔駛再買幾百蚊一樽啦~ 


材料:

檸檬

冰糖

玻璃樽



做法:

1) 玻璃樽, 砧板, 刀等等用具先用熱水沖洗, 作消毒;

2) 檸檬洗乾淨表皮後風乾; 之後切片;

3) 樽底先放一層冰糖, 然後一層檸檬, 再一層冰糖, 一層檸檬, 如此類推; 頂層必須為冰糖;

4) 入好樽後, 用保鮮紙蓋面, 再上樽蓋;

5) 每日要打開樽蓋放氣和攪拌一下;

6) 21日收成後, 隔渣倒出酵素, 放入另一個樽 (可用膠樽);



P.S:
a) 剩低的果渣可供食用或用作酵種重新制作新的酵素。

b) 每日放氣一次, 以免食用酵素變成生果酒; 而且發酵時會出現大量氣泡, 如果不放氣會引致爆樽。

c) 不同的生果都可以制作食用酵素, 糖類可以冰糖/原糖/庶糖/黑糖等, 但不要用砂糖。

d) 食用酵素時必須使用玻璃器皿, 因發酵時會釋放一些氣體, 怕膠樽會出現氣味或引起化學作用。

e) 生果必須洗淨果皮, 用具必須消毒和完全乾爽。

 

 

上圖為第五天的收成, 但還未起泡。

脆皮奶皇月餅

中秋節係我其中一個最愛o既節日, 因為本人十分之喜愛食月餅同玩燈籠! 未禁玩爉燭時就最愛煲爉!! 儲月餅罐亦都係我興趣之一呢~

早幾年前開始興起奶皇月餅, 仲要必買嘉麟樓。但近呢兩年越唻越多人欣賞, 可謂一盒難求呀~ 為咗唔同人爭, 今年決定自己整!!

量好晒材料, 準備開工~~

尋日就全日hea響屋企做阿茂! 唔夠咸蛋黃, 只夠整24隻!

呢幾日會不停咁整月餅, 奶皇餡已經整晒, 呢幾日開始整白蓮蓉同黃蓮蓉。


**下年整番個自家月餅模先**

電飯煲 VS Le Creuset

兩個月前, 我家的電飯煲失靈... 在毫無先兆下結束了它短短一年多的生涯! 而我, 竟然感到興奮, 高興!! 無他的, 因為有了Le Creuset~ 早已經想改用LC來煮白飯, 但怕師奶佬覺得我「無o個樣整o個樣」難得電飯煲壞了, 終於可以明正言順地用LC來煮白飯。

參考了數位資深煮婦的經驗, 再加上自己的觀察, 不用20分鐘便搞掂了~~

直到目前為止, 我用LC煮白飯已有個多月, 但師奶佬一直都唔太歡喜用LC煮出來的白飯... 反覆思考, 發覺我用LC 20cm round oven跟17cm oval oven煮出來的白飯是有分別。師奶佬一直投訴用LC煮出來的白飯, 有一少部份的米粒未完全熟透... 但我用LC 20cm round oven是沒有這個問題的...... 是否因為oval shape的問題呢!!??

前天, 師奶佬軟硬兼施地強烈要求我家廚房一定要增添新的電飯煲... 我決定這星期再給自己/LC一個機會!!! 若果也未能煮出師奶佬的要求 (用LC煮的白飯要跟電飯煲煮出來的一樣) 我想逃不過買新電飯煲的命運了~~~~

My Le Creuset Collection

Le Creuset係煮婦界o既殿堂級廚具, 我呢位敗家精又點會唔搜羅一番呢~

記得初次接觸係2012年9月份開倉, 總共去咗3日!! 當時仲係新手一名, 唔知頭唔知路就走去掃貨, 毫無計劃可言。到第二次開倉, 吸收咗上次o既經驗同埋日日夜夜咁刨各敗家煮婦o既blog, 終於知道敗要敗得夠精明, 所以第二次開倉總算入到手頭好!

上兩個月, 由數名殿堂級煮婦級於facebook開o既group, 認識咗唔少新朋友仔, 令我o既敗家指數以倍數升至頂點!!!! 得知「天外有天, 人外有人」, 我唔算係最瘋狂, 最狂熱o既敗家精! 見到唔敗婦人o既收藏品真係流晒口水呀~~ 師奶佬成日都話我太多煲, 我俾佢睇咗幾張相, 佢終於都知道... 佢老婆其實o既敗家指數只係BB班, 佢見到我對羨慕o既眼神, 即刻同我講"你都係用咗年幾o者~ 慢慢你o既收藏品都會好似佢地咁架喇~ 慢慢唻啦!" OH~~ 真係超感動! 放心, 我一定會努力地敗家...

自家製 - 砵仔糕 (附食譜)

我諗80前的都食過砵仔糕, 以前架木頭車前面有塊玻璃, 見到裡面裝住黃色, 白色, 有豆, 冇豆的砵仔糕... 次次都要白色有豆, 仲要揀個最多豆o既!! 大大個用兩枝竹籤拮住, 食到一半梗會"搖搖欲墜"。仲食唔晒添…

但呢d車仔檔買少見少, 係耐唔時響某d小食店見到有得賣。而家改良o左, 冇咁大個, 細細隻, 一口一啖唔駛煩食唔晒。家下興懷舊, 上網搵recipes睇落一d都唔複雜, 坐言起行尋晚跟住整…. 得o左! 

此recipes係響"yahoo知識"度搵到, 整出o黎無論賣相, 口感, 甜味都同街邊買的冇乜分別!!!

(呢個份量可以整到大約15個迷你版砵仔糕)

煮紅豆材料:

水 400ml

紅豆

材料B:

粘米粉 80g

澄面 70g

水250g

片糖250g

做法:

1. 先將紅豆浸軟, 大約兩小時;

2. 大火燒滾水煮紅豆, 煮至軟身便成;

     3. 保留400ml紅豆水備用 (煮片糖);

     4. 先燒滾紅豆水才放片糖, 片糖最好預先整成一小塊, 方便煮溶;

5. 將水250ml 加入已篩好的粘米粉同 澄面; 另將已煮溶的片糖水, 趁熱慢慢加入粉漿 (一邊拌勻粉漿, 一邊加入片糖水), 然後過篩;

6. 鑊放入水煲滾, 放蒸架及模具蒸2MINS

7. 倒入蒸模約9成滿, 再加入熟紅豆

8. 大火蒸15mins (蒸的時間係用"瓦煲砵仔"size, 如果模具大的話要蒸耐d時間)

搬新家!

Yahoo Blog結束運作!! 作為Yahoo blog o既一份子, 我當然好唔捨得啦~ 因為Yahoo Blog我結識到唔少朋友仔, 雖然大家素未謀面, 只透過留言交談, 交流煮食心得。正所謂「天下無不散之筵席」, 希望大家可以透過另一個平台再次見面!!

好記得當初寫網誌, 好怕被比較, 因為我入廚經驗始終太少, 竟然膽粗粗學人寫網誌!! 全賴一位朋友的鼓勵。 響呢年幾兩年以唻, 寫網誌已經成為一種習慣。除咗分享我的入廚心得之外, 耐唔時都會借呢個平台舒發下心情。紀錄下我身邊所發生o既事。

我會將呢年幾兩年以唻o既食譜整理一次, 再螞蟻搬家咁將佢地搬過唻呢度。