【天然酵母】提子酵母

又唻養番個酵母BB先~ 夏天養酵母真係方便過冬天養!  記得上年冬天養酵母, 真係玩到我頭暈... 因為天氣太凍, 酵母BB養極都唔起, 搞到我每日一番到屋企就開著個焗爐pre-heat一陣再放酵母BB入去養, 仲要耐唔時注意溫度.... 總之就麻煩到暈!

而家夏天只需要5-7日時間, 唔駛點理佢, 每日開蓋搞搞佢就得。好似我今次呢樽紅提子酵母BB咁, 嘔泡嘔到呢~~~

第2日已經開始嘔泡....

第4日D泡多咗成2倍!! 勁活躍呢~

第5日D泡明顯少咗好多lu~

連續餵養3日就可以用唻整包喇~



下次用咩生果好呢~ 檸檬、橙、蘋果?

久違了的自家製麵包

我真係懶到爆!!!! 早排養咗樽米麴酵母, 點知用唔夠兩次就死咗.... 唉~ 浪費晒D時間同心機!! 上星期日響屋企百無聊賴, 一於搓番兩個麵糰先!!  一個做低溫發酵, 一個就即做即焗。

可能真係好耐冇搓包... D手勢生疏晒!  之前跟韋太學過搓包, 覺得佢教o既搓包方法慳水又慳力, 不過... 完全唔記得晒!  唯有用番Carol個甩打麵糰方法.... 雖然係攰d, 不過就簡單易學。之但係就唔可以夜媽媽做, 因為我試過11點幾慶起搓包, 俾樓下投訴...

我覺得搓包能夠舒緩/平衡心理。因為無論當日心情如何唔開心。睇見d包包焗出唻脹卜卜, 心情隨即開心番晒!

2014年生日曼谷之旅 - 泰式雪糕三文治

我發覺我同細妹係好有冒險精神!! 去到泰國見到唔少街頭小食, 我地兩條友仔真係乜都夠同膽放入口...  

好似呢檔咁, 響Central World出面。都見有唔少當地人買唻食, 我同細妹又忍唔住買埋一份!! 其實真係唔知咩唻... 叔叔又唔識英文, 我地又唔識泰文!! 好似大約20THB。

叔叔知道我地係遊客, 邀請佢合照, 仲專登擺埋POST, 又望晒鏡頭咁, 非常之NICE!

 

 

其實呢件o野係咸係甜我地都唔知..... 一咬落去, 原來係椰子味雪糕三文治。個椰子味雪糕裡面有少少果仁碎, 香草。而外加咗花生, 雪糕底下有甜甜糯米飯。大熱天時食呢件甜品小吃, 真係涼透心.........

 

貴婦面膜 SUISSE Renewing Cream Mask

年紀越大, 皮膚質素就越差... 以往都係去SaSa買d平價日本skincare, 但隨住年紀o既增長, 呢d日本skincare已經唔再o岩我用! 真係不得不承認, 我已經踏入中女階段...

除咗日常o既toner, serum, lotion之外, mask對我唻講真係好重要。有一期我係每晚一mask, 但後來懶咗就冇再每晚一mask了~ 而家屋企仲有好多paper mask存貨, 當時認為paper mask夠晒方便, 而且又唔貴, 日日敷都唔會肉赤。但原來cream mask或者gel mask比paper mask更加有效。雖然價錢略貴, 不過女人o既皮膚=第一層衫, 當然唔可以慳啦~

其實我一直都好想試下神級貴婦品牌"Valmont" o既 Renewing pack同埋Purifying mask, 之不過價錢實在太~太~太貴!  仲要唔會有discount又或者promotation... 而SUISSE Programme 價錢雖然比Valmont平少少, 但功效其實都差唔多。

SUISSE Programme Renewing Cream Mask 我等咗成年幾, 終於都俾我無意中發現SaSa做緊會員換購, 原價千幾蚊, 會員換購再加$100現金coupon, 唔駛$700就可以帶佢番屋企!!! 心情真係極度興奮!!!!!  (師奶仔心態)

好老實, 買o既時候我真係冇為意到係幾多ml, 只係一心想帶佢番屋企。點知番到屋企拎出唻用時, 先發覺原來係salon size, 200ml... 以後真係要多d去SaSa行個圈!

超大SIZE!  我諗應該可以用到半年至一年.... 又要睇緊時機入貨。

佢o既質地比牙膏裝o既mask稀。

薄薄一層搽上面, 等10-15分鐘。

呢款mask含有DNA & RNA等活性成份, 主要係重建肌膚, 撫平皺紋又可以滋潤肌膚。雖然皺紋就未有, 但係重建肌膚就有呢個需要!

用後感: 用咗呢隻MASK差不多一個月 (其實我大約2星期用3次左右, 不過說明書就話一星期可以用2-3次。), 本人覺得因為呢隻唔係deep clean mask又或者保濕mask, 更生皮膚就唔駛一星期更生幾次... 太密啦~ 
敷完皮膚真係光滑d, 毛孔收細咗少少, 摸落手仲嫩滑咗唔少... 不過頭3次敷的時候, 搽上面唔駛1分鐘就覺得好"拿".... 放心, 呢個係正常現象! 忍受咗5分鐘後就冇事, 過完水塊面都冇因為"拿"面而紅腫。

正所謂「一分錢一分貨」, 為咗白滑無暇o既肌膚, 有d錢係應該/有需要洗o既~~ 最多平時咪食少兩餐囉!

2014年生日曼谷之旅 - B-day dinner @ The Kitchen Table W Bangkok

話到明係生日之旅, 梗係要食番個FINE DINNER慶祝下啦~ 我呢個做家姐o既算係咁... 一早send e-mail去訂枱, 我仲request甜品上要寫上"Frankie, happy 30 birthday"! 原先我係book咗細妹正日生日食飯,但因為細妹2位朋友比我地早一日番香港, 所以我地決定提早一日。4條友可以食多d o野嘛~

落到去, reception已經問我邊位係生日主角, 仲安排我地坐響比較入o既位置。唻之前我已經叫酒店e-mail份menu俾我睇睇先, 雖然食物選擇唔係太多, 但都好多完化。泰式, 西式都有。

坐低後, 先唻一碟麵包。


我地4條友, 叫咗4個course!  份量其實唔係好多, 不過都剛剛夠食飽我地....

先唻個小食 - Crispy Crab Spring Rolls

冰鎮海鮮拼盤 - Chilled Seafood

拋打肉碎炒飯 - Wok fired pork with Jasmine rice

呢個唔響menu度, 係細妹朋友點o既smoke salmon pizza

呢杯充滿泰國風味o既飲品, 係由我最愛o既Mojito演變而成, 叫做Mango Mojito


食飽飽後, 我地出咗露台吹吹風。突然間D staff一路唱住生日歌, 一路拎住個蛋糕過唻... 真係好鬼surprised架~   呢個生日蛋糕係The Kitchen Table FREE俾我, 原先我係諗住叫細妹自己ORDER甜品, 酒店再on top幫我加d字上去, 但既然酒店E-MAIL覆我時寫Complimentary Birthday Cake, 我梗係唔再叫甜品啦!

W Bangkok呢間The Kitchen Table食物質素比我想像中...差!! 好老實, 一間5星酒店o既餐廳食物質素真係唔應該比外面其他普通食肆差唔多。再者, W Bangkok只得一間餐廳..... 係咪應該要做得更加出色呢!?


細妹正日生日當日, 我地送咗佢2位朋友走之後, 食埋晚飯先番酒店... 入到房就見到有4個CUPCAKE放咗響枱度。原來係幫我地訂PACKAGE o個個人special request, 可能佢幫我地訂機票時, 見到咁o岩係細妹同我o既生日, 所以request酒店送個生日蛋糕俾我地。

枝Baileys係我地自己架~ 個setting都係我地自己擺。

2014年曼谷生日之旅 - 「泰地道」雞絲河

去泰國, 除咗有行唔完o既超市, 商場同埋night market之外, 仲有食唔完o既美食!! 本人對泰國菜情有獨鐘, 尤其係冬陰公湯!  響香港經常幫襯唔同o既泰國餐廳, 就係為咗一碗正宗o既冬陰公湯...

2年前同班姊妹唻曼谷旅行, 唔打唔撞地搵到一間街邊檔。原先都唔係好敢食, 但行經2次都見到有好多本地人, 甚至對面酒店員工唻開餐... 應該值得一試!

識我o既人都知我係超級怕熱!  響曼谷呢個咁鬼熱的天氣底下我竟然會選擇坐街邊食, 可想而知係有幾好味呢~

佢係響正馬路邊, 環境就唔可以話好衛生但又未至於好惡劣o既~  其實就好似我地香港廟街煲仔飯o個d環境咁囉。

 

 

 醬料任加!!! 有魚露、砂糖、泰式辣椒粉、乾蒜。

我最鐘意呢個醬, 好香好惹味!!!

 

 就係呢碗雞絲河喇~~ 湯底好濃, o個片白蘿蔔入味到呢~~ 上機前一日我都仲要同細妹專乘坐車過唻食多一次!!  而家諗起都好食呀~~

呢間麵檔除咗雞絲河之外, 好似仲有豬手o個d... 下次要試晒佢!!!

2014年生日曼谷之旅 - Chatuchak AND Or Tor Kor Market

去Bangkok更係要疊住個weekend去啦~ 皆因要行weekend market嘛... 去Bangkok唔去weekend market行下, 你都唔好同人講你去咗Bangkok呀!

Chatuchak可以話係全球最大型o既weekend market, 裡面真係應有盡有! 衫褲鞋襪、家居擺設、廚房餐具、寵物用品等等。食得o既, 唔食得o既都有!!! 真係行極都行唔完....  如果各位搬屋/裝修前, 可以飛一轉去Bangkok, 行下Chatuchak買家居擺設。又平又有特色!

我諗好多人對Chatuchak已經好熟, 邊個section賣d咩都知道一清二楚! 但當然去之前溫故知新 下, 實冇死o既~

呢張圖係響官網DOWLOAD落唻

泰國出名手工藝品, 今次行過其中一檔賣自家畫o既Tee。真係好鬼靚!!! 而且唔貴喎~ 都係3xxTHB左右, quality都唔錯架!

泰國另一出名o既就係按摩同埋香薰/香包。我響呢檔都掃咗唔少貨...



我地去o既時候, 正值中午!   真係熱到暈呀~~~ 好彩呢度行幾步就有一檔賣飲品。我地梗係要買番杯唻降下溫啦~

呢杯係咸檸冰! 


我地真係敵不過太陽伯伯o既照料, 行咗個零鐘就宣布投降! 去咗隔離一個market度食lunch。

就係呢個安多哥市場喇~ 只要行番落BTS, 就有條路直去安多哥。炎熱的天氣下, 可以順便嘆下冷氣, 過一過冷河。

呢度除咗係生果市場之外, 行入少少就有好多檔熟食檔。但因為天氣實在太~太~太熱喇! 我地4條友只係叫咗呢幾樣。呢個地道o既food court, 唔算有太多遊客, 大部份都係當地人。

食完lunch, 買咗些少生果就直接坐的士番酒店。