雙酵提子紅莓吐司 (附食譜)

又好耐冇搓包喇~ 冬天個人真係好似特別懶咁... 上兩星期手痕整咗兩樽酵母, 見已經收成就用唻試下整包。 今次試下玩吐司, 唔整麵包籃!

冬天發酵時間比夏天耐, 不過如果善用焗爐其實發酵時間都唔會太長。造型後, 就將焗爐調較至最細火, heat up約1min, 焗爐就會有少少溫度, 之後放麵糰入去發酵。但每20mins就要check一check個爐係咪已經完全降溫, 如果係的話就將麵糰拎番出唻, 再heat up約1min。雖然係麻煩咗少少, 但時間真係慳唔少架! 又唔怕因為溫度問題而發得唔夠靚。

今次呢個食譜份量又係自家研發的 :)

麵糰材料:

高筋粉          240g

糖                  30g

鹽                  3g

白神生種      120g

藍莓酵液      25g

水 (約30度)  100ml

雞蛋              1隻


做法:

1) 將所有材料搓勻至沒有粉粒;

2) 室溫初發2小時後, 舖上保鮮紙放入雪柜作低溫發酵;

3) 第二日, 做包前2小時從雪柜拿出麵糰回溫;

4) 排氣、分割成兩等份、滾圓、鬆弛約20mins;

5) 用麵粉棍擀平麵糰, 灑上提子乾及紅莓乾;

6) 由上捲向下收口;

7) 放入吐司模中, 末發60-90mins;

8) 焗爐預熱180度;

9) 末發完成後放入焗爐, 180度焗35-40mins;

10) 焗完後那出麵糰放在涼架上, 待涼後切片入袋。


p.s: 因為媽咪唔食牛油/奶類, 所以我的食譜大多數都唔會加牛奶同埋牛油。

末發後, 但都唔算係發得好大! 不過見時間夠, 就放入爐。

出爐喇~~~ 好鬼靚仔啊!

第一次整吐司, 唔會要求太高要頂角。見佢有dd似山形已經好滿足。

唔知係咪白神+生果酵液的威力呢~ 從未試過咁"藕斷絲連"

 非常滿意...十分滿意...超級滿意... 不枉我為"你"捱眼訓!!

充滿童真的世界@TST LCX

師奶佬星期日又放假, 原本都冇諗住出去, 點知一訓醒佢就話同我去尖咀行街! 難得佢開到口話同我去街, 即刻彈起身梳洗、化妝、換衫啦~

師奶佬話帶我去海防道街市食o野, 我真係未去過! 經過就成日都經過, 但唔會走入去囉~ 可能細細個媽咪話入面好恐怖, 搞到我一直都唔敢入去。師奶佬話入面有好多o野食, 佢之前響尖咀番工都會去入面食飯, 又平又好味咁話喎~ 入到去, 正正係一個隱蔽的大排檔。好幾檔集中埋一齊, 環境當然唔好期望乾淨啦~ 只要唔會食到你肚痛就冇問題。我要咗個牛什麵, 而家香港好少地方有得食牛什喇。仲叫咗個咖吷多。

食飽後, 師奶佬又帶咗我去一個地方... (嗯, 好似大鄉里出城咁, 去尖咀都要人帶!) 未行到去門口已經見到"佢" - 『龍貓』

勁大隻!!!! 如果可以拎佢番屋企就好lu~~

 我好鬼鐘意佢! 如果我細妹好似佢咁可愛就好!但奈何....

 

 貓巴士上面隻會發光O既老鼠

好大隻貓巴士呀~~ 每次睇親呢套卡通片, 我同細妹都好想坐落去, 因為睇唻好軟熟。

呢隻藍色龍貓, 又係我另一至愛~

除咗『龍貓』之外, 另一套最愛宮崎駿卡通片就係『魔女宅急變』。呢隻黑色貓仔好鬼抵死!

 

Merry X'mas 2013 & Happy New Year 2014

又到聖誕~ 又到聖誕~ 我未到BOXING DAY已經拆晒D禮物...

雖然結婚週年紀念的晚餐已經響上星期豪食咗一次, 但正日點都要食好少少o既~ 師奶佬最愛TST間SEAFOOD STATION, 今次又有一個借口俾佢大飽口福!

2條友食咗一大隻加拿大蟹, 一打生蠔, 半打裴翠螺, 一大隻瀨尿蝦再加埋一大碟大蝦生果沙律。真係飽到上心口呀!!!


聖誕節除咗食, 最重要緊係收禮物啦~~ 今年師奶佬超級豪爽地送咗2大份禮物俾我...

第一份禮物 - 拍拖+結婚週年禮物

買呢份禮物真係無心插柳架~ 事緣當日我地放工後都不約而同發現電話冇乜電, 咁我就提意去Apple Store度义义電。點知一义就义咗幾千蚊去...  師奶佬唔係成日都咁豪爽架~ 我地企咗響度差唔多成20mins, 師奶佬突然間問我想唔想要部IPhone5S, 話送俾我做結婚禮物。我當然係即刻點頭, 再問sales有冇現貨啦~ 點知咁o岩又有現貨, 又唔駛拎籌, 即刻叫人拎部新機!  遲一秒都怕師奶佬反悔呀... 哈哈哈!!! 就係咁, 呢部土豪金IPhone5S就咁到手喇...


第二份禮物 - 聖誕+新年禮物

呢份禮物又係無心插柳下買的。 原本都冇諗住買, 但一聽到做緊discount, 唔買又好似對唔住自己, 而我又真係幾鐘意呢個袋, 加上師奶佬又發揮佢o既「富豪本色」, 我當然又即刻叫人拎個新袋唻啦~

真係大大大豐收呀! 師奶佬除咗結婚後第二日買咗兩個"C"字手袋俾我後, 呢年幾以唻都冇試過咁豪爽!! 不愧我成日都煮好o野你食。

薑餅人聖誕曲奇 (附食譜)

先預祝大家聖誕節快樂~~ 往年聖誕節我通常都會整朱古力拎番公司送俾同事, 但今年唔同喇, 今年屋企多咗個好幫手 - 『焗爐大佬』所以真係整乜都得呀!!!

今次應下節, 試下整薑餅人曲奇。其實本人唔太好薑餅人, 一來唔太like佢陣豆蔻味, 二來食過一次係勁硬!! 所以咁多年以唻我都冇買過薑餅人送人或自己食... 但今次唔同喇~ 我自家製, 當然寧舍不同啦~ 坊間好多唔同o既薑餅人食譜, 真係唔知跟邊個好架.... 但睇完Christine簡易食譜之後, 覺得份量又好似OK, 而且可以做到50-55塊曲奇, 一於試下先! 


材料: (原食譜份量, 再按個人口味自行加減)

低筋粉          300g

泡打粉          1/2 tsp

薑粉              2 tsp

肉桂粉          1 tsp

豆蔻粉          1/4 tsp

鹽                  1/8 tsp

糖                  85g (原食譜係75g)

牛油              120g (原食譜係100g)

金黃糖漿       55g (原食譜係45g)

雞蛋               1隻

牛奶                90g



做法:

1) 牛油置室溫中至軟化; 雞蛋從雪柜內拿出後置室溫; 粉類過篩後備用;

2) 牛油放置於不銹鋼大盆內, 加入砂糖, 用電動打蛋電器 (4號速) 打至軟身;

3) 先加入雞蛋用電動打蛋器打拌 (用3號速); 再加入金黃糖漿打勻, 最後慢慢加入牛奶打勻, 再改為4號速打發至鬆軟;

4) 粉類分3次加入蛋糊內, 用膠刮刀輕手拌勻;

5)  將麵糰分成2份, 用保鮮袋包好放入雪柜1hr;

6) 麵糰取出, 用保鮮紙舖於麵糰的面和底部, 用麵粉棍壓成3-4mm厚;

7) 麵糰上灑上少許低筋粉, 用模具壓出形狀;

8) 烤盤舖上烘焙紙, 放上已壓成形的麵糰;

9) 焗爐預熱180度, 放入焗爐焗13mins;

10) 從焗爐取出後先侍涼才上裝飾。

香蔥雞卷 (附食譜)

成日想整釀雞翼, 但偏偏的唔起心肝去整… 因為去雞翼骨實在太花功夫! 唯有用去骨雞脾肉頂住先… 今次買番唻d雞脾肉比較厚, 肥膏又多, 卷起上唻o既時候都幾吃力! 而家d蔥一扎$2得o個3條仔… 貴到死~

我習慣買呢d急凍肉番唻會先用水沖5分鐘, 沖去d雪味。跟住放響碗度解凍, 解凍完就要切底地清洗。因為解凍時d急凍肉會浸住咗響d血水度, 要清得好乾淨先會冇咗陣味!

材料:

急凍雞脾肉2塊

蔥1扎(即3條)

醃料:

鹽

糖

胡椒粉

魚露

 

麻油

做法:

1)  先將急凍雞脾肉解凍, 切成4等份, 洗淨後瀝乾水份;

2)  用醃料醃30MINS;

3)  蔥洗淨切段備用;

4)   用雞肉包住蔥段, 用竹籤固定;

5)   燒熱油, 下薑片爆香後盛起;

6)  下雞卷煎至外面金黃色後, 下少許水加蓋煮至雞卷全熟;

7)  盛起雞卷;

8)   加生粉水埋芡後淋上雞卷, 即成。

 

2nd Annuiversary Dinner @ The Steak House

尋晚我地提早慶祝結婚2週年, 原本我地係12月24號結婚, 呢個日子, 出去外面食一定俾人斬到一頸血! 第一年的結婚週年紀念我選擇響屋企自己煮, 今年想出去外面食。唔知點解總覺得週年紀念係應該食西餐... 可能因為張枱枝蠟燭卦~

今年我地決定去試下InterContinental 間 The Steak House, 師奶佬於11月底訂位, 餐廳經理好快就e-mail咗個menu過唻, 但我睇完個menu同埋價錢之後, 決定cancel 12月24號個booking, 改早一星期去食。雖則都明白到12月24號一定會好貴, 唔係話價錢唔抵, 而係冇得選擇。既然都預咗budget點解唔好好地利用呢!? 一於提早一星期去慶祝, 冇咁多人之餘仲有大把choice你揀。

雖然安排唔到窗口位, 但佢地安排o個張枱都唔錯。入到去最吸引我o既唔係環境, 而係個salad bar... 好多芝士向我say Hi~

環境雖然比較暗, 但睇menu完全冇問題!  因為個餐牌係識發光架~~~

點完食物, 侍應拎咗籃麵包同埋自家製o既手打牛油。麵包幾好食, 但牛油就冇乜味...

坐咗大約10分鐘度, 我實在忍唔住喇~ 我同師奶佬決定加多個salad bar, 雖然價錢係貴咗少少, 但我覺得係物有所值架!!! d芝士實在太吸引, 太美味~~ 不過都唔肯食太多, 怕之後o既頭盤同埋主菜都食唔落, 莫講話想試埋佢呢度o既signature desserts...

Seared Hokkaido Scallops and Applewood Bacon - 其實我係唔食帶子... 但師奶佬點咗呢個頭盤, 點都要試下!  好好味呀~~ 帶子燒到外面好香, 睇落以為熟晒, 點知一切開就知道裡面係生生地, 帶子好鮮甜, 配埋塊煙肉同埋個炭燒菠蘿一齊放入口....... 有帶子的鮮甜味、蘋果木煙肉的香味、燒菠蘿o既酸味。感覺好奇妙, 好多層次...

Wild Mushroom Soup - 西餐通常都係得兩種湯揀... 高級餐廳就多數係Lobster Bisque同埋Wild Mushroom Soup.  The Steak House真係照顧週到, 將兩種湯份量減少, 然後設計出50/50, 即係一份"50/50"有齊Lobster Bisque and Wild Mushroom Soup.  份量雖然少咗, 但可以同時品嚐到兩種湯。真係一舉兩得。 個湯唔算好Creamy, 不過好香mushroom, 而且仲有好多mushroom粒粒。正~~

Rib Eye Steak 16oZ with Gilled Boston Lobster Tail - 賣相雖然單調, 平平無奇地放響隻大圓碟上面, 但有時太多花巧又未必係一件好事, 反而喧賓奪主。點菜時侍應提意4成熟, 我食牛不嬲都鐘意rare, 但侍應話4成熟雖然會較為熟咗少少, 但都好juicy, 既然佢咁講, 就試下啦~ 佢知道我地份Rib Eye Steak係share, 而師奶佬o個份就多件lobster tail, 所以廚房拎出唻時已經幫我地份好。真係好細心!

 

份steak睇落表面好似好熟咁... 但會見到裡面係紅色, 望落都好juicy!  食入口係外脆內軟, 非常之美味呀~~~

我地仲叫咗兩個side dish - Black Truffle Mashed Potatoes with girolle, Sautéed Button Mushroom











其實已經好飽架喇~~~ 但我真係好想食佢個signature desserts... 所以唔理咁多, 叫咗先講!
Traditional Apple Crumble (with Vanilla Ice-Cream and Caramel Sauce) - 個份量好大... 應該係FOR 4-6人食!!

















師奶佬叫餐廳幫雪糕加工....






















話咁快就結咗婚2年... 希望明年/後年可以多一個人一齊慶祝!

鱈場蟹@千兩

難得師奶佬星期六放假, 兩條友訓醒食完個brunch響屋企hea下就搵街出。感覺好似好耐都冇同師奶佬去行街喇~ 自從結咗婚之後, 如果佢weekend都放假的話, 我地通常都係響屋企煮飯食。難得今日唔想煮飯, 出去拍下拖...

第一站去咗旺角先達, 呢位大細路話要去買漫畫喎~  唔知係咪我地太耐冇響weekend行街呢!? 覺得去到旺角好似去咗遊行咁! 成條街d人多到呢~~~ 當然大部份都要操國語o既強國人啦!! 等師奶佬買完佢d漫畫之後, 我地係極速地離開呢個地方! 人實在太多...

本以為Elements應該會比較少人, 但唔知點解都係勁多人! 人雖然係多, 但都算行得舒服。可能又係食飯時間啦, 間間食肆門口都堆滿晒人... 尤其係強國人!! 感覺好似去咗羅湖城咁...

而係係食鱈場蟹o既季節, 我呢個蟹痴又點會放過呢~ 所以去咗『千兩』。排咗二百個籌, 等咗差唔多一粒鐘就有位 (都算快架喇~) 坐低二話不說就點o野食, 望都冇望過條迴轉帶... 因為今次目標唔係壽司, 而係鱈場蟹!!!

原本只想要個鱈場蟹刺身, 但個侍應話併盤抵食d, 相差一百個大洋... 要埋佢啦~

嘩~~ 正呀! 啖啖肉... yummy~~~

食飽梗係要去行下街, 等落格食甜品嘛~ 響Elements行街有咩行!? 間間都係名店... Chanel, Prada,  Celine, Dolce&Gabbana, etc.  難得有機會就扮住一晚闊太咁多啦~ 哈哈哈!!!

米麴生種包

好耐冇整包喇~~ 見我個米麴生種咁鬼活躍, 忍唔住要搓番個麵糰唻試下。今次又再調整下份量, 睇下效果點先~

冬天整麵包時間真係要好耐...好耐... 低溫麵糰, 由雪柜拎出唻回溫都花咗我咗唔多2個鐘!!! 排氣, 鬆弛又用咗40分鐘、造型又用咗15分鐘、末發用咗差唔多個半鐘。搞下搞下成凌晨2點先出爐....

已經放咗杯熱水入焗爐幫助發酵, 但等咗成個鐘都發唔夠2倍... 激死人呀!

今次搞搞新意思... 整咗唔同造型。但焗出唻效果唔太靚, 要再研究下!

今次呢個份量, 焗出唻o既包好似質地實咗少少... 又要再繼續鑽研!!!

Simple dinner @ Frites Belgium on Tap

上星期五, 細妹無啦啦打唻約我食飯。真係幾驚訝架~  不嬲都只有我問佢得唔得閒食飯, 永無佢約我o既!  梗係o個晚冇人約啦~  但咁o岩我又響公司拎咗個麵包機, 諗住拎番屋企試下... 正苦惱緊點抬番屋企之際, 就有人自動獻身...

麵包機雖然唔係好重, 但拎住佢搭地鐵都幾麻煩下, 尤其放工時間! 我地兩個決定抬住部機去食飯先, 等埋師奶佬放工就一齊搭的士番屋企! 呢個計劃真係完美呀~~

細妹話想食fish & frites, 咁就去灣景中心度睇睇啦~ 好老實, 呢度裝修完咁耐我都未唻過, 真係大鄉里呀!! 細妹話之前唻過呢間餐廳度食, 都唔錯喎。一於試下啦~ (我細妹勁挑剔, 佢話唔錯的話其實都唔會差得去邊)

我地兩個人點咗 Fish and Frites 同埋 sausages, 細妹話食fish and frites要配啤酒, 就叫咗杯Hoegaarden俾佢, 但呢度冇我想飲o既cocktail, 求其要杯可樂就算!

d o野食唻到, 最吸引我o既並唔係d食物, 而係佢d用具!!! 有種即刻想拎佢番屋企o既衝動...

食物水準... 其實都算係滿意。因為呢兩款食物好難整得難食!  呢餐飯太賞心悅目喇~~ 

【滋潤湯水】青木瓜雪耳煲唐排

今年冬天天氣雖然唔係好凍, 但都幾乾燥下, 所以湯水真係唔少得架~ 老人家成日都話冇時間煮飯都煲啖湯飲下嘛... 但我想講, 既然冇時間煮飯, 又何來會有時間煲湯呢~~ 煲個湯看似簡單, 洗乾淨D材料, 掉晒入個大煲度由佢煲個零鐘... 但買材料, 洗洗切切時間都唔少架!  再者師奶佬唔響屋企的話成煲湯飲一個禮拜都似... 因為師奶佬係一個「湯王」, 佢可以一個人飲晒一大煲湯... 好勁架~

青木瓜雪耳煲唐排

材料:

青木瓜 1個

雪耳 1個

唐排 1斤

南北杏少許

蜜棗 2粒

陳皮1少塊


做法:

1) 青木瓜刨皮, 去囊, 切大件; 洗淨備用;

2) 唐排汆水, 洗淨備用; 陳皮浸軟備用;

3) 雪耳浸軟, 汆水, 切成4份;

4) 煲滾水, 將所有材料放入煲內, 大火再煮滾後轉中小火煲1小時;

5) 下鹽調味即成。

爆炒雞件 (附食譜)

前日去睇中醫, 醫師叫我戒牛、雞、蝦、蟹。咁... 即係叫我食齋!? 呢幾樣係我最愛的食材,  唔可以食呢D咁我不如改食齋lu~

我好鐘意用薑、蔥頭、蒜頭唻爆炒, 貪佢夠晒香, 夠晒鑊氣! 如果我可以換番個菊花芯o既爐頭, 仲一流呀!! 不過等我換咗個大廚房先啦... (師奶佬~ 你要加油呀!)

今次呢味餸, 如果可以的話我真係要食兩大碗飯呀!!!

材料:

鮮雞半隻

薑 4-5片

蔥 大量

蒜頭 5-6粒

豆豉 2湯匙


醃料:

鹽

糖

麻油

魚露

胡椒粉

料理酒


調味料:

生抽

老抽

玫瑰露


做法:

1) 鮮雞件洗淨, 瀝乾水份後用醃料醃30mins;

2) 薑切片; 蔥切段; 蒜頭拍好備用;

3) 燒熱油鑊, 下薑片、蔥頭、蒜頭、豆豉爆炒至有香味;

4) 加入雞件炒勻, 下調味料炒至熟;

5) 把餘下的蔥段下鑊炒勻, 即成。

上湯豆苗浸脆鯇腩

全城哄動的新聞終於都真相大白, 願B女安息!  雖然我並不為人母, 但都深深感受到母親的偉大, 母親對自己仔女的愛護。 唔明白點解呢位母親可以咁樣做... 利用香港人的同情心, 愛心去遮掩你的罪行!!! 呢到全港父母虛驚一場!!!  太可恥了~


冬天係豆苗盛產的季節, 所以好多時新年的時候, 豆苗可以賣到差唔多一百蚊斤架~  而家豆苗雖然未係最靚的時候, 但價錢都唔平架! 差唔多$16半斤.... (菜芯先賣$16一斤!)

星期六同師奶佬拍拖去街市買餸, 因為99過唻食飯。去到街市睇下有乜菜, 佢話要食豆苗, 冇問題~ 行行下去到魚檔又話要食脆鯇腩... 又唔係打邊爐, 食乜鬼脆鯇腩呢~~~ 是但啦, 買到番屋企再諗諗點煮... 

原本諗住清炒豆苗就算, 而家多咗份脆鯇腩.... 改做上湯啦~

係咪display得好靚呢~~


材料:

豆苗

脆鯇腩

清雞湯


調味料:

鹽

胡椒粉

水

醃料:

鹽

胡椒粉

雞蛋白


做法:

1) 豆苗洗淨瀝乾水份備用; 脆鯇腩洗淨後切雙飛, 用醃料醃20-30mins;

2) 把上湯煮滾, 下調味料及放入豆苗;

3) 另一隻鍋煮滾水, 把脆鯇腩灼一灼, 撈起備用;

4) 豆苗煮好後, 便放入脆鯇腩, 再用上湯放脆鯇腩上灼一灼;

5) 當上湯再煮滾時熄火, 加蓋焗5mins即成。


小小心得:

a) 脆鯇腩用雞蛋白醃, 煮出唻肉質較嫩滑;

b) 用另一隻鍋灼脆鯇腩, 避免雞蛋白留在上湯中;

c) 用一小盒的清雞湯再加同等份量的水, 煮出唻的湯便不會太油膩;

自家製咸旦收成了~ (附咸旦蒸肉餅食譜)

呢幾日天氣都幾凍下, 搞到我都冇乜心機煮飯。但見到樽咸旦放咗響度成個半月... 唔整又唔抵得! 拿拿林走去街市買豬肉番唻整個肉餅。

浸咗個半月, 唔知味道如何呢~~

嘩~~ 個咸旦黃超靚呀!!!


咸旦蒸肉餅

材料:

攪碎豬肉  $30

麥皮少許

自家製咸旦 2隻


醃料:

糖

鹽

魚露

麻油

蠔油

胡椒粉

料理酒

水


做法:

1) 將攪碎豬肉放入大碗中, 混和所有醃料 (除水外);

2) 咸旦分開旦黃及旦白, 咸旦白加入碎豬肉中, 旦黃備用;

3) 將已醃好的碎豬肉放入保鮮袋中, 撻十幾下至豬肉起筋;

4) 撻完後放回大碗中, 慢慢加入清水拌勻, 直至碎豬肉充分吸收水份;

5) 倒至蒸碟中, 舖上錫紙, 大火煮滾水, 放入蒸碟;

6) 大火蒸20mins, 即成。

自家製咸旦成唔成功!? 可以話超出我預期之外呀~ 雖然味道較淡, 但都好好味。淨番兩隻, 再浸多一個月, 睇睇味道如何。


小小心得:

a) 蒸肉餅加入少許麥皮, 口感較嫩滑;

b) 醃肉時加入清水, 令肉類吸收水份, 吃時更有肉汁;

c) 因醃肉時會加入水, 所以調味要稍稍增加;

d) 舖上錫紙防止倒汗水流入肉餅中, 保持肉汁的鮮味;

女人要保養!

由細到大都俾人話我皮膚又白又滑, 當然係因為遺傳咗婆婆同媽咪o既優點啦~ 仲有細細個時, 媽咪成日都煲好多涼茶/湯水俾我地飲。除咗遺傳同飲食之外仲要保養架~

之前成日以為自己仲後生, 唔需要用太貴或者太rich o既護膚品, 而且我好鐘意試新o野, 經常性流連d化妝品連鎖店, 響forum 度見到d人話邊隻好用我就會買唻試...但都只會試made in Japan! 有信心保證d嘛~  但隨住年紀漸大, (已達30大關了~) 覺得皮膚質素好似已經唔再同以前一樣!!! 雖然到而家好多人都話我唔似3字頭的中女, 但為咗唔好衰老得太快, 決定花多少少錢買d品質/成效較好的護膚品。呢個月我已經買咗差唔多3千蚊護膚品了~ 從未試過咁大手筆! 好老實, 係有d肉赤...  但用咗兩星期後, 見皮膚的改變, 覺得都值得o既~

呢個牌子o既洗臉皂, 我想試好耐架喇~ 但一直都唔想花太多錢, 今次為咗靚靚皮膚, 決定一擲千金 (真係差唔多一千蚊架~)

呢個洗臉皂用法雖然有D麻煩, 但用完之後皮膚嫩滑咗好多... 讚~

【無水酵母】之柑桔天酵

唔玩麵包都唔知原來整麵包係有咁多學問, 咁多唔同玩法! 例如要睇天氣溫度去計算發酵時間; 唔同牌子的麵粉同酵母都有唔同"性格", 例如有人話日本粉吸水力比台灣粉強, 所以用日本粉就要用多少少水; 酵母又有分新鮮酵母、乾酵母、天然酵母等等。唔同種類的酵母所用的份量又唔同!

早期玩完"星野"、"米麴"、"提子", 今次玩另一隻叫「無水酵」。上次提子酵母液用的方法係生果+糖+水; 今次呢個「無水酵」即係生果+糖, 唔加水。

星期日買咗D柑桔番屋企, 諗住自己浸番樽咸柑桔。突然心血來潮, 留番幾粒用唻試下做酵母液。

材料:

柑桔     80g

砂糖     40g

消毒玻璃樽1個


做法:

1) 將玻璃樽消毒, 風乾; 柑桔洗淨, 風乾;

2) 柑桔切片, 去核; 放入玻璃樽內, 加入砂糖;

3) 加蓋, 放置室溫5-7日。

浸咗一晚, 今朝起身見到開始嘔泡喇~ 打開蓋陣清香的柑桔味... 好香呀!!!!

Sunday Brunch @ Brunch Club

出完差番唻約咗兩位好友食Brunch, 見見面, 吹吹水! L小姐提議去中環半山, er....半山!? 請恕本人孤陋寡聞, 我從來唔知道原來中環半山都有brunch食。由中環地鐵站行上去, 都幾係辛苦下~ 尤其斜路非常多、非常斜...

因為只限walk-in, 所以去到都要等。由於食店位置於一條特斜的斜路中段, 等候期間都幾辛苦... 旁邊的行人路寬度只限一人經過, 如果企響行人路等, 又阻礙其他人經過, 企響斜路度等又怕會跣腳仆落去...

店舖唔算好大, 基本上利用晒所有空間去擺放餐桌, 所以都幾迫下架~ 不過為咗美味o既egg benedict, 迫少少都冇所謂啦~ 

Egg Benedict最好配mushroom, 夠晒清新健康!


egg  benedict係我最愛之一, 通常weekend可以約到朋友的話, 都會周圍去試試其他地方的egg benedict。so far 我食過最好味o既egg benedict係響Element裡面o既【Coffè HABITŪ】

『星野什錦麵包』(附麵糰份量)

原來麵包係需要一門高深o既學問... 份量雖然可以隨意加減, 但要搵到一個o岩自己o既食譜, 係需要多番嘗試, 多番失敗先能夠成功!  經過多次失敗o既嘗試, 我終於都搵到一個暫時o岩自己o既食譜。

主麵糰:

高筋粉         300g
水                 150ml
糖                 30g
鹽                 3g
雞蛋             1隻 (約40g)
星野生種     60g

呢個份量做出唻o既包包, 我非常之滿意! 組織夠細緻, 氣孔細但密, 雖然唔係太軟熟, 但我好鐘意!!!

米麴酵母液 (附做法)

而家整包開始得心應手咗好多, 係時候向困難挑戰! 早排試咗提子酵液同「星野」, 今次試下用米麴唻做酵母!  響網上參考咗好多位blogger o既做法, 真係非常之簡單! 難就難在買米麴喇~ 呢一年米麴被好多blogger追捧, 突然間成為咗煮婦界o既新寵兒, 家家必備o既材料!

我而家用緊o既呢款米麴係響日本買番唻, 佢冇咗一層霉菌, 日本人話呢隻叫乾米麴。如果用唻做鹽麴/醬油麴的話就要加多少少水。不過今次我用佢唻做酵母, 水o既份量不變。



我呢個米麴酵母液做法係參考Allie

米麴天然酵母液

材料:

米麴    50g

砂糖    20g

水       200ml


做法:

1) 將玻璃容器消毒, 風乾備用;

2) 米麴、砂糖、水放入已消毒的容器內, 拌勻;

3) 先舖上一張保鮮紙在樽口, 弄開幾個小孔, 加上蓋;

4) 室溫放置5-7日, 每天要搖晃容器及打開蓋排出空氣;

5) 第3天開始便會出現氣泡, 及有陣陣像汽水的氣味;

6) 第7日收成, 隔出米麴, 留下酵液; 未用的酵液可以放入雪柜保存1個月。















酵液可以選擇直接用或者做生種。

米麴生種

材料:
米麴酵液     30g
高筋粉         30g

做法:
1) 將材料放入消毒玻璃樽內拌勻, 室溫發酵4-5小時, 發至2倍大和有很多氣泡, 然後放入雪柜;
2) 第二,三天重覆上面的步驟, 第四日便可用唻搓包lu~

每次拎出的份量都要填補番落去架~ 咁樣個生種先會長用長有...
例如: 今次拎咗100g生種出唻搓包, 就要加番50g高筋粉, 50g清水落去。再室溫發酵至2倍大先放番入雪柜。如果一星期都唔用的話, 都要拎最少100g出唻, (掉咗佢又好, 開多一樽餵養都好) 再加番1:1落去餵養。其實生種真係可以源源不絕架~ 除非好耐好耐冇用佢唻搓包, 養死咗啦! 但我提意最好最少3個月再重新整過一樽。

睇下~ 我呢個生種好鬼活躍架!!