香辣娃娃菜 (附食譜)

今次廣州、潮州、山東9天遊! 行程緊密, 9天內坐咗4次飛機.... 真係疲憊不堪!! 仲要應付俄國同事的無謂/無知/無腦問題。從未試過帶客帶得咁辛苦!!!

尋晚由濟南飛番深圳, 好好彩地提早咗15分鐘到埗! 細妹搵朋友幫手安排咗架中港車, 去深圳機場接我。番到屋企都10點幾... 雖然響飛機度食咗個飛機餐, 但仍然覺得好肚餓!!! 拿拿聲訓覺, 唔好諗!  出差為咗補充體力/怕體力不足, 強迫自己食到好飽, 食好多... 唉~ 又唔知會肥幾多磅!

出完差番到公司, 差不多有2千幾封電郵, 爭D塞爆我個inbox! 除咗要處理日常電郵, 仲要整理呢9日行程裡面開過無數次meeting的資料... 天啊~~~~

突然諗起一味菜... 係細妹要求我煮。呢味菜簡單得唻又好味!


材料:

娃娃菜1包

指天椒2隻

蒜頭4粒

調味料:

鹽少許


做法:

1) 娃娃菜分開一片片, 洗淨瀝乾水份;

2) 蒜頭切細粒, 指天椒去籽切粒;

3) 燒熱鑊, 下蒜頭炒香, 加入娃娃菜炒熟;

4) 最後加入指天椒粒炒勻, 即成。


小小心得:

炒娃娃菜時加少少水, 如果唔係好易炒焦。

脹卜卜芝士包 (附食譜)

好鬼耐冇搓包喇~ 自9月份出完差番唻之後, 個人好懶散... 已經成個月冇搓包! 上星期得閒又搓番個低溫麵糰, 今次第一次用日清強力粉, 好香小麥味。

因為時間關係, 冇準備到餡料, 唯有用芝士啦~


麵糰材料:

日清強力粉     250g (100%)

水                     175ml (70%)

酵母                 5g (2%)

鹽                     5g (2%)

牛油                 37.5g (15%)

糖                     12.5g (5%)


餡料:

芝士


做法:

1) 先將所有材料 (除牛油外) 搓至沒有粉粒;

2) 加入牛油搓至滑手, 再攤至起筋 (根據Carol o既方法, 麵糰要攤200至250次);

3) 將麵糰放入容器, 加保鮮紙, 放置室溫發酵30mins;

4) 放入雪柜進行低溫發酵 (不要超過72小時);

5) 第二晚把麵糰從雪柜拿出, 放至室溫回暖;

6) 在麵糰上灑上少許高筋粉, 壓按麵糰排氣;

7) 分割成等份, 滾圓後放上濕布蓋面, 鬆弛10mins;

8) 包入芝士餡料, 收口收緊;

9) 在包面上灑少許水, 灑上芝士粉;

10) 進行第二次發酵約60mins;

11) 焗爐預熱200度, 放入麵糰;

12) 180度焗15mins;

p.s: 其實今次呢個麵糰放多過72小時, 但見佢冇酒味, 仲有淡淡o既酵母香味, 心諗應該未死得晒。一於博一博! 點知焗出唻脹卜卜, 好鬼靚仔!

自家製咸旦 (附做法)

上星期去開九龍城買大閘蟹, 當然要周圍行下啦~ 好耐冇去過九龍城買餸喇。因為當日拎住一袋大閘蟹, 所以唔行咁耐喇~ 突然間記起九龍城有一間賣潮州食品o既舖頭有鴨蛋買, 而我一直都好想試下自己整咸蛋, 所以就走去碰碰運氣...

見到有唔同種類o既雞蛋, 有美國大蛋, 農場新鮮雞蛋, 有機雞蛋等等。仲有一隻超級大隻o既蛋, 原來係駝鳥蛋... 唔知點煮唻食呢~ 下次再去九龍城一定要花時間去請教下姐姐。見到有一籮鴨蛋, $10有4隻, 拿拿林買4隻番屋企試下先~

材料:

玻璃瓶1個

鴨蛋4隻

海鹽5湯匙

花椒八角少許


做法:

1) 玻璃瓶先消毒, 涼乾; 鴨蛋洗淨表面污垢, 用乾布抺乾;

2) 海鹽用熱水煮溶, 待涼;

3) 鴨蛋小心地放入已消毒及風乾的玻璃瓶內;

4) 倒入已待涼的鹽水 (要蓋過鴨蛋);

5) 加入花椒八角;

6) 保鮮紙蓋面, 加上蓋; 浸30天便可。

一年一度大閘蟹

每年十月對我唻講真係又愛又恨!! 愛十月因為有我最愛o既大閘蟹食; 恨十月因為我又要離開師奶佬2星期!

一早已計劃好星期六去九龍城幫襯老店, 但一日前新聞得知老店失火, 損失慘重! 最大件事係大閘蟹無晒!!! 原本諗住去九龍城第二間店買, 點知去到見到老店仲有做生意, 咁當然幫襯番老店啦~ 同肥叔叔打個招呼, 佢幫我揀咗6隻靚蟹, 仲送咗一打湯圓我食! 我仲買咗一樽蟹粉, 今次又大把新菜式試lu~   但今年大閘蟹麻麻地... 膏唔夠多, 唔夠香! 可能老店失火, 最靚o個批大閘蟹已經報銷! 唯有十一月初再食過!!

今次加多味蟹粉小籠包!

天然酵母 - 提子酵母 (附做法)

除咗飲用酵素之外, 呢近響麵包界最流行就係「天然酵母」。即係用生果唻做的酵母, 味道天然且帶有少少果香。坊間有好多不同做法, 而我就揀最簡單的方法。


材料:

新鮮提子 80g

糖 1湯匙

清水 240g

玻璃瓶 1 樽


做法:

1) 提子洗淨, 瀝乾水份; 切開一半, 去核;

2) 玻璃瓶用熱水沖洗消毒後風乾備用;

3) 將所有材料放入玻璃瓶內, 舖上保鮮紙;

4) 每天搖晃瓶身, 打開蓋放入空氣;

5) 第三日開始會產生汽泡及氣味會較為難聞, 第四至七日難聞氣味會變得清新, 但液會開始混濁;

6) 第八日早上便可隔渣留下酵液。倒入另一玻璃瓶入, 存放雪柜可保存1個月。

第一天浸的酵母液, 還很清澈。

這是第三日的酵母液, 有大量的汽泡, 而且水變很混濁。

汽泡帶有雜質

這是第七天的酵母, 提子明顯變很細粒。


這時倒出液體便可直接做麵或加粉餵養。

鹽麴豬扒 (附食譜)

近年好多人都追求健康飲食文化。 無添加、天然香料、有機食材等等產品不斷推出。較多香港人熟悉o既係日本o既健康飲食文化, 因為日本人長壽係世界聞名。全因日本人愛天然, 食材新鮮。近期盛行o既「鹽麴」就係由日本人發明。

6月份我去東京時, 鹽麴剛開始盛行, 各大型日本連鎖超市都仲有貨賣。但見有幾位blogger都自己醃製, 方法又簡單, 所以去東京時順便買番一,兩包米麴番唻自己試玩。第一樽o既鹽麴份量極少, 因為唔知成唔成功, 炒咗幾次菜就冇晒~ 上星期第二樽鹽麴收成, 即刻用唻醃豬扒試下。

醃咗一晚, 煎完出唻, 肉質真係比較嫩滑, 一d都唔"鞋"! 而且能夠帶出豬扒本身o既味道。真係好好味!


材料:

急凍豬扒



醃料:

鹽麴

糖

胡椒粉

麻油

料理酒



做法:

1) 豬扒解凍後洗淨, 抺乾水份;

2) 用鹽麴醃一晚, 蓋上保鮮膜, 放入雪柜;

3) 第二天煮前1小時, 從雪柜拿出豬扒, 解凍後加入其餘醃料, 醃30MINS;

4) 燒熱油, 放入豬扒煎至熟透。

秋冬清潤之選『雪耳燉雪梨』(附食譜)

尋日上完深圳開會, 3點零鐘走人, 梗係唔番公司啦~ 直接番屋企! 番到屋企5點零, 大把時間梗係要好好利用啦~ 煮晚餐、整麵包、燉糖水。真係好鬼充實的一晚!

中秋過後, 天氣開始轉涼同乾燥。早幾日阿妹拎咗兩隻大雪梨俾我, o岩晒!! 一於用Le Creuset湯盅唻整燉雪梨。


材料: (4人份量)

雪梨4隻

雪耳2大個

南北杏少許

冰糖適量


做法:

1) 雪耳先用清水浸軟, 去蒂;

2) 雪梨去皮, 去芯; 切成8件;

3) 燒熱鍋, 大火煮滾水;

4) 所有材料放入湯盅, 水滾後放入鍋內;

5) 轉中火加蓋燉2小時, 即成。

泰式紅咖喱雞 (附食譜)

上個月真係忙到甩轆! 出咗差成2星期, 番到唻又要為Le Creuset開倉作準備... 今次開倉識到好多朋友仔, 大家有共同"嗜好"特別o岩咀型架! 諗番起開倉o個個星期, 係我同師奶佬相處得最少時間o既一段日子... 番工放工手機不離手, 無時無刻響facebook同group chat度同d「敗家戰友」互通消息, 交流意見同埋草擬購物清單! 都俾佢哦咗我幾句... 話Le Creuset重要過老公!! 唉~ 真係冤枉呀~~ 我都係為咗煮好o野俾你食o者... 呢句說話我成日都講架, 正所謂工慾善其事就必先利其器。要煮得一枱好餸, 當然要有好o既廚具啦~

不過今次開倉最令我驚喜o既係... 買到個煲架!!!!





















前排P小姐去完泰國梳乎, 幫我買咗幾包"藍象牌"咖哩番唻。上星期日就煮咗煲紅咖哩雞, 師奶佬食咗3大碗飯!!!


材料:

雞脾肉3件

甘荀1條

薯仔1大隻

洋蔥1大隻


醃料:

鹽、糖、魚露、胡椒粉、料理酒、麻油


咖哩汁料:

藍象牌紅咖哩1包

乾辣椒1條

Basil 少許

印度咖哩醬2湯匙

鹽少許

糖少許



做法:

1) 雞脾肉解凍, 瀝乾水份後切成一口大小;

2) 薯仔, 甘荀去皮後切小件; 洋蔥切小塊;

3) 燒熱油, 下薯仔煎至金黃色; 再加少許油炒香洋蔥; 盛起備用;

4) 凍鍋落油, 下"藍象牌"紅咖哩醬, 中小火炒至出油;

5) 下雞件炒勻, 加一碗水; 加蓋煮5mins;

6) 把其餘材料下鍋, 再加2碗水, 加蓋煮15mins;

7) 打開蓋, 加入其餘咖哩汁料, 拌勻;

8) 轉細火, 加蓋煮30mins; 即成。

 

 

 

小小心得:

 

a) 薯仔先用鑊煎至金黃色, 再落鍋煮咖哩時唔會溶晒, 而且會香口d;

 

b) 加入印度咖哩醬, 令泰式咖哩多一份香料味;

 

c) 用LC唻煮咖哩, 又快又入味;

 

d) 咖哩醬先炒出油後再加材料及水煮, 咖哩味會更香;

清甜湯水 【青紅蘿蔔粟米湯】

而家湯水少咗好多, 但都盡力響weekend時煲啖靚湯飲下。媽咪早排俾咗猴頭菇同五指毛桃各一包俾我, 諗住煲番個五指毛桃湯飲下, 買晒材料番到屋企先發覺唔見咗包五指毛桃…連包猴頭菇都冇埋!!! 可能早排執廚櫃時唔覺意掉鬼咗… 唉~

即刻落街買其他材料, 煲番個清潤湯水… 趕頭趕命! 下次一次要睇清楚d存貨先。

呢個湯好清甜… 連唔多飲湯o既媽咪同細妹都每人飲咗2大碗

 

材料:

粟米3條

紅蘿蔔2條

青蘿蔔1條

瘦肉1斤

無花果2粒

南北杏少許

調味料:

鹽

做法:

1)  青,紅蘿蔔刨皮, 洗淨, 滾刀切件;

2)  粟米切開兩至三段;

3)  瘦肉汆水, 用凍水沖淨;

4)  燒滾水後放所有材料落鍋, 大火滾30mins;

5) 加蓋, 轉細火煲1.5mins;

6)  打開蓋加入少許鹽調味;

小小心得: 如果想d湯濃d, 煲完後打開蓋, 大火滾多15-20mins。咁d湯就會濃d!

 

尖椒炒肉絲 (附食譜)

而家天氣咁潮濕, 最好食番d辣o野驅一驅d濕氣。呢期每個禮拜總有一日要番上大陸, 食LUNCH真係”R”爆頭都唔知食乜好…  因為H7N9 o既關係令到可選擇的食物唔多! 以往最愛番大陸食雞, 因為皮下脂肪少, 肉又嫩, 又有雞味… 但而家真係聞雞色變!!! 呢幾次上去我都係食同一味餸, 雖然普通, 但味道一流。


 

材料:

青, 紅尖椒各一隻

梅頭瘦半斤

蒜頭3粒


 

醃料:

糖

鹽

魚露

料理酒

麻油

胡椒粉


調味料:

台式辣油半茶匙
 鹽



做法:

1)  梅頭瘦洗淨, 切絲; 用醃料醃30MINS;

2)  青,紅尖椒去籽, 切絲備用;

3)  蒜頭去衣, 拍扁備用;

4)  燒熱油鑊, 下蒜頭爆香, 梅頭瘦落鑊炒至7成熟盛起備用;

5)  原鑊炒香青,紅尖椒; 下少許鹽調味;

6)  將梅頭瘦回鑊, 下半茶匙辣椒油炒勻, 即成。

小小心得:

A) 用梅頭瘦唻炒就最好, 肉質炒完唔會過鞋。

B) 切辣椒最好都係帶番對手套… 今次我又辣親對手!!! EVEN用刀背去刮D籽, 手指唔多唔少都會掂到D辣椒籽, 成晚對手好似俾火燒咁!!