馬年快樂, 新春大吉

今日係大年初一, 同大家拜番個年先~~

祝大家馬年行大運、馬到功成、馬運亨通、身體健康、心想事成、萬事如意、一團和氣!!

今年年廿九晚同媽咪, 細妹, 師奶佬一齊去行花市。好耐冇試過一家人去行花市喇~ 今年除咗買銀柳之外, 我仲買咗幾扎小花番唻, 點綴下屋企。

呵呵呵... 今年捨棄傳統o既"全盒", 改用咁colorful o既LC。即刻醒神晒~

牛油曲奇 (附食譜)

唔駛煮飯o既日子真係舒服!!!! 繼上次無無聊聊整咗個雙酵吐司後, 今次一於挑戰下曲奇餅!  原來我"收藏"咗唔少曲奇模, 買的; 問工廠拎的; 朋友送的; 放滿一個大盒...

其實整曲奇餅唔係花好多時間, 只係冬天o既時候要多少少時間將雞蛋同埋牛油回溫。基本上過程又簡單又快。

今次呢個食譜係跟Shirley 「印模牛油曲奇」唻做。 材料超級簡單! 屋企有晒所有材料, 可以開工!!

材料:

蛋黃          1個
糖粉          80g
低筋粉      200g
牛油          100g
幼鹽          少許

做法:

1) 先將雞蛋, 牛油從雪柜拎出, 回溫約1-2小時;
2) 牛油放軟後, 用電動打強器打至軟滑ceramy狀;
3) 加入幼鹽及糖粉, 打至發白;
4) 加入蛋黃拌勻;
5) 1/3 低筋粉加入蛋糊, 用最低速打勻;
6) 將其餘的低筋粉倒入, 用膠刮刀以切拌法拌勻;
7) 準備保鮮紙, 將已拌勻的麵糰放上保鮮紙, 用手輕輕壓平, 包好後放入雪柜30mins至變硬身;
8) 取出麵糰後, 用麵粉棍擀平約3mm厚;
9) 焗爐預熱180度15mins;
10) 用曲奇模印壓形狀, 放上已舖牛油紙的烤盤內;
11) 放入焗爐12-15mins至表面金黃色;
12) 待涼後可加入裝飾。

真係好鬆脆!!! 但牛油香味唔多夠, 下次要去烘焙店買番罐"金x牛油"番唻再試。

白神種+湯種雙酵吐司 (附食譜)

被禁煮食3個月呢個「禁令」, 應該好快就會「撤銷」。因為師奶佬已經忍受唔住喇... 再加上差唔多過年... 佢當然希望我快D開爐啦~~ 上星期五已經央求我星期六煮飯食。哈哈哈!!!  呢個禁令對我唻講冇乜特別"懲罰"作用, 唔開爐煮飯, 我仲多咗時間整麵包同曲奇餅添~

想試湯種好耐喇~ 但成日都覺得麻煩... 又要煮, 煮完又要放涼。但而家唔駛煮飯就多咗時間喇! 今次用湯種+白神種唻整吐司。

麵糰份量: (用300g高筋粉作單位)

高筋粉        210g 
湯種            100g
白神種        180g
鹽                3g
砂糖            30g
牛油            30g
水                70-100ml

見好多人話450克吐司模, 用大約300g-320g高筋粉可以做到頂角。但我之前用300g高筋粉做唔到; 今次加到320g都係做唔到, 而且比起上次個吐司仲矮咗..... 請教過高手之後, 個個都話「因為天氣o既錯!」我都希望係啦~~~

可能用咗湯種, 個吐司好濕潤, 但軟熟度就會差少少...

發咗成60分鐘, 8成都冇... 唉~ 唔理咁多, 入爐先再算!

麵包組織好細密... 好夠濕潤。

兩家新年飯@寧波港商旅同鄉會

話咁快下星期就新年喇~ 今年過年比往年忙碌! 最主要係因為家中發生咗小小意外... 呢個教訓我永世難忘呀!!! 以後真係要小心、小心。

新年飯一早已經諗定咗去食寧波菜, 其實每年我都會揀一個大日子去呢間餐廳食寧波菜。一來媽咪係寧波人好鐘意食家鄉菜; 二來香港地越唻越少呢D正宗寧波上海菜食喇; 三來呢間餐廳價錢一D都唔平架~ 梗係要搵個借口唻食啦!

一行8人 (我媽媽、細妹、細妹的另一半; 我99、細佬、細佬的另一半; 我地兩公婆) 大家都食到好飽... 我地3母妹每次都好期待唻呢間餐廳食飯! 每次唻到必點以下呢3個主菜:

年糕炒蟹 - 呢個菜, 年糕同蟹都係主角, 但好多人叫呢味餸都係為咗d年糕... 因為個汁夠晒惹味, 年糕又夠煙"un"

蒸鰣魚 - 呢條魚真係不得不吃呀~~ 我諗冇乜地方有呢個煮法。首先用豬網油包住條魚, 上面舖上酒釀、冬菇、金華火腿、冬筍; 然後拎去蒸。條魚好多骨, 但越多骨o既魚就越鮮味。我最鐘意食魚鱗, d魚鱗吸晒味, 正~  呢間餐廳食咗好幾年, 呢條魚由$700食到而家$1,700!!!

蜜汁火肪 - 呢個菜係細妹至愛! 金華火腿、蓮子、甘荀用蜜汁煮好, 配上蒸包夾一齊食, 好味!


呢間餐廳採取會員制, 入會貴比起另一間寧波菜館平好幾十倍。但我覺得呢間水準同另一間都差唔多。因為要每年俾年費, 我決定每年唻多幾次!

禍不單行!!! 李太私房菜暫停煮食3個月...

上星期六請咗一班舊同事唻我屋企食飯, 佢地成日都話要唻試下我手勢喎~ 約咗大半年終於都約到時間! 我舊上司話想食我整o既醉雞, 但因為呢期H7N9太勁, 所以等下次先啦~

當晚煮咗清湯腩、蠔油炆雞翼、白菜獅子頭、木瓜雪耳瘦肉湯。但因為佢地太快手開動, 冇影到相... 唯有下次再煮過啦~

呢個月我真係黑仔到爆呀~ 病咗2次, 又仆親... 但點都唔夠星期日大鑊!!!! 搞到消防爆門入屋....

話說星期六飲淨咗D湯, 咁星期日朝早起身就煲番滾, 等佢唔好咁易變壞。開咗火我就去梳洗, 諗住梳洗完之後熄火啦~ 點知我走咗去打電話俾媽咪, 咁媽咪話佢打算換衫落街食o野, 我就拿拿林換衫落街join佢... 因為星期日約咗堂家姐去佢上水屋企幫佢整XO醬, 咁食完o野就直接去咗上水。

一到咗上水, 收到個電話.... 我真係嚇到六神無主兼個腦一片空白!!! 警察打唻話我屋企煲燶o野, 問我響邊, 我話我響上水。跟住警察話咁叫消防爆門... 跟住叫我地盡快番去收番間屋。媽咪響Mega Box飛的番去, 而我地就飛車由上水番去... 一番到屋企樓下已經聞到好大陣燶味, 上到樓見到度大門爛咗... 入到廚房見到一個煲濃咗個煲... 成間屋都係燶味...

而家臨近新年, 大陸工廠開始放假, 最快都要3月先有大門!!! 唉....

點解我會咁大意!!!??? 不嬲我開完火都會較timer, 提醒自己熄火... 但今次我以為自己會記得, 點知... 搞出個大頭佛!

好彩冇俾師奶佬鬧, 不過就"吊銷"我個"煮食牌照"3個月!!!! 今年新年冇得煮團年飯...

論盡的我

我成日都"哦"媽咪, 行路小心D, 唔好成日都跌親! 點知尋日下午竟然輪到我....  明明睇住唻上樓梯, 咁都會仆親... 好在唔係落緊樓梯咋~
雖然冇乜事, 但都搞到行路要慢半拍 (好似人地大肚婆咁...) 上落樓梯都要扶住, 左手更加因為拉傷咗而無力。星期六仲要請咗班舊同事上唻食飯, 都唔知應唔應付到添架~ 呢次真係麻煩喇...

媽咪話好彩未陀仔咋~ 如果唔係咁樣跌法, 個B都跌埋出唻。其實跌親o個刻我個心都寒一寒, 如果我陀緊B真係唔知點算...

師奶佬話今次係一個好好o既教訓, 睇我以後仲會唔會行路唔睇路, 行得太快, 做事咁心急!  唉... 我呢d死人性格係時候要改一改!

慳水慳力之【日式海鮮一品煲】

尋晚同師奶佬去咗上環「X記」買鮑魚, 響屋企等巴士等咗成半粒鐘... 真係激死人! 上環海味街出晒名, 平時都多人去買海味, 再加上而家臨近新年, 更多人走去掃貨! 入到去舖頭, 好似唔駛錢咁...

師奶佬入到去, 第一時間睇鮑魚。真係花多眼亂呀~ 1-2頭、4頭、5頭、7-8頭......  經濟實惠o既我地就買唔駛煮, 只係用熱水浸番熱就食得o個d啦~ 仲要買3送1... 不過師奶佬對一罐4頭鮑好有興趣! 愛佬心切o既我當然准許佢買一罐食啦~ 行咗個圈, 佢又對d乾鮑好感興趣!

我話:「你食我唔介意花2-3日時間去整。但我真係未整過, 而且整乾鮑花時間花功夫, 一個唔覺意整衰咗, 就浪費晒。」
好在佢自己都識都兜, 「如果食完呢d乾鮑, 我唔再食o個d即食鮑魚, 咁開支咪好大!? 都係睇下算喇~」
哈哈哈!!! 雖然我都好想挑戰下, 不過d乾鮑實在太貴, 我輸唔起! 或者他日我有錢輸得起時再算啦~

任務完成, 師奶佬竟然叫我番屋企煮飯食!!! 以為今晚可以輕鬆下... 坐地鐵番屋企o個45mins, 我不停咁諗煮乜好呢~ 因為當時已經4點幾, 去街市買餸, 煮得唻已經8點有多。最後決定去日本超市睇下有咩買。俾佢見到一大包火鍋料, 好啦~ 就煮番個日式海鮮鍋! 慳水慳力, 唔駛半粒鐘可以開飯! 買埋包手打烏冬, 米都唔駛洗呀!

惹味好送飯 (附魚香茄子煲食譜)

星期六煮完泰菜, 星期日難得媽咪, 細妹同師奶佬都番唻食飯, 又再煮過!  唔知點解媽咪同鬼鐘意用我d LC整煲仔飯, 每次我話煮飯食, 媽咪都話整煲仔飯... 真係俾佢激死!  難得一家人食飯, 當然要煮餐豐富D啦~

3餸1湯, 白飯任裝!!! 但係電飯煲又出事... 年初我個電飯煲壞咗, 媽咪就拎咗佢o個個電飯煲過唻 (冇計! 媽咪已經唔再踏入廚房了~ 飯堂已經移師唻我呢邊...) 但我個電飯煲膽就冇掉到, 諗住留唻有用, 但留咗大半年都冇用, 上兩星期就掉鬼咗佢。點知.... 我竟然掉錯咗媽咪個電飯煲膽!! 因為我o個個電飯煲係8-10人份, size比媽咪o個個大!! 洗完米, 放落個煲到先知出事.... 拿拿林拎個LC出唻煲飯。真係有驚無險呀!


而家市面上有好多唔同o既現成醬料買 (例如: 魚香茄子醬、咕嚕骨醬、等等), 我冇用過, 雖然方便但總覺得味道唔係太好。情願花多少少時間自己去調味, 再加上唔駛食咁多防腐劑落肚。


材料:

茄子          2條
碎豬肉      $20
乾蔥          3粒
獨子蒜      3粒
指天椒      1條
咸魚          2件
薑片          3片
蔥頭          大量
莞茜莖      大量      

調味料:

豆辨醬      2湯匙
甜麵醬      1 tsp
魚露          少許


豬肉醃料:

鹽              1/4 tsp
糖              1/2 tsp
麻油          少許
水              少許


做法:

1) 用醃料醃碎豬肉15-30mins;

2) 乾蔥、蒜頭切碎; 茄子切粗條;

3) 凍鍋凍油, 中火燒熱油後放薑片爆香, 放咸魚煎至離骨, 拿出待涼後拆肉備用;

4) 同一鍋下少許油, 把乾蔥、蔥頭、蒜頭、莞茜莖炒香;

5) 把碎豬肉下鍋炒至5成熟後, 下1湯匙豆辦醬炒勻, 炒至8成熟後, 盛起備用;

6) 同鍋下大量的油, 茄子下鍋炒熟; 下1湯匙豆辦醬, 1湯匙甜麵醬炒勻;

7) 茄子已變軟身後, 把已炒熟的碎豬肉, 料頭和指天椒全部倒入鍋內炒勻, 加入少許魚露;

8) 待所有材料已煮好後, 加入少許水, 加蓋, 轉細火炆多5-10mins;

9) 熄火, 打開蓋加入少許莞茜葉便成。

泰宴 (附大蝦粉絲煲食譜)

上星期六請咗班朋友上唻食飯, 因為朋友V係12月底生日, 大家都諗唔到食乜好,  佢地又話未上過唻食飯, 所以我就提議由我掌舵今次o既生日飯!! 因為我地幾位都好鐘意食泰菜, 所以就提議煮泰菜喇。

雖然係普通一餐飯, 但為咗盡善盡美, 我決定去九龍城買材料。咁先夠地道架嘛~ 同師奶佬食完o野就坐車出九龍城買餸。我已經同自己講, 出到去買完就要番屋企, 如果唔係我真係有排行呀~ 九龍城實在太吸引!!!

6個人煮咗4餸1湯, 除咗咖喱之外其他全部清晒碟! 真係多謝大家捧場 :)





 

早排託英國的敗婦 (冇錯! 敗家敗到英國去~ 仲要有專人去買貨, 驗貨! 呵呵呵...) 買咗一隻全黑的BIS, 係咪好靚仔呢~~ 開光菜就係「大蝦粉絲煲」

材料:

中蝦          10隻

粉絲          2扎

乾蔥          3粒

蒜頭          3粒

莞茜          2條


調味料:

泰式海鮮醬     1包

糖                     1/4 tsp

鹽                     1/8 tsp

魚露                 1/4 tsp

水                     少許


做法:

1) 中蝦去腸洗淨, 備用; 粉絲用水浸軟;

2) 乾蔥和蒜頭切碎, 莞茜切段, 備用;

3) 凍鑊凍油, 用中火煮滾油爆香乾蔥, 蒜頭, 莞茜莖;

4) 中蝦下鑊炒至5成熟後下海鮮醬炒勻, 加入少許清水;

5) 下粉絲炒勻, 熄火 , 把莞茜葉放上面, 加蓋焗2mins;

P.S: 如果吃辣的, 下海鮮醬時可同時加入泰國辣椒醬和指天椒。

芥末香草烤羊架 (附食譜)

上星期的聖誕敗婦聚會, 大家都玩得好盡興。耐唔時都要搞番個扒地又食又玩先得! 當晚大家食都差唔多, 諗住上甜品時師奶佬就番咗唻。有幾位敗婦第一次見師奶佬, 之前都係響Facebook睇相, 佢地不停咁讚師奶佬靚仔... 仲對師奶佬讚口不絕... 原因係師奶佬番到唻後主動幫我洗埋餘下的碗碟。搞到敗婦們話要番屋企同佢地另一半"宣揚"下喎~ 哈哈哈!!! 搞到師奶佬勁飄飄然囉~~ 真係俾佢激死!


其實我本身唔多好羊, 印象中只煮過兩次羊扒, 今次第一次挑戰羊架... 點知搞咗好耐先有得食! 唔知係我焗爐問題定係件羊架太大呢!?  賣羊架俾我o個個人話先煎至每面金黃色, 待涼後先加面上的醃料放入焗爐焗35mins... 但點知焗出唻都仲好生!!!!


材料:

羊架           1件 (約8條骨)

甘荀           半包

洋蔥           半個


醃料 (1):

海鹽           2 tsp

黑胡椒       1 tsp

Thyme        1 tsp


醃料 (2):

芥末            3 tsp

Thyme         1 tsp

Rosemary    1 tsp

牛油            50g

麵包糠        3 tsp



做法:

1) 羊架早一日從冰格拿至普通格解凍;

2) 洗淨羊架, 抺乾水份; 用醃料 (1)塗勻全隻羊架, 再用保鮮紙包緊後放入雪柜一晚;

3) 第二日下午拿出羊架, 退回室溫;

4) 牛油起鑊, 將羊架每面煎至金黃色, 放焗盤中待涼;

5) 其餘配料用原鑊炒至5成熟, 盛起放入焗盤中;

6) 焗爐預熱200度;

7)  將羊架用刀於每條骨之間切開 (不要切斷);

8) 將醃料(2)材料全部拌勻, 塗上羊架面上;

9) 將焗盤放入焗爐, 200度焗45-60mins; (羊架面上的醃料已成金黃色後, 可舖上錫紙繼續焗)

聖誕敗婦聚會 (附香草白酒煮法國黃春雞食譜)

剛過了13、14, 今年除夕特別開心, 因為可以同細妹, 師奶佬一齊響屋企打住邊爐渡過。好溫馨呢~ 今年聖誕+除夕都冇出街玩, 我諗應該係因為人越大, 越追求平淡。以前呢D大時大節響Facebook度必定見到身邊好多朋友出街蒲, 但今年反而大部份朋友都安坐家中。

雖然聖誕節冇出街玩, 但都叫咗班朋友上唻我度開party!  今年相約咗一班敗婦上唻開聖誕扒地。講開呢班敗婦, 相識經過非常之特別! 縱然大家相識不過半年, 但感覺就好似識咗好耐o既老朋友咁。或者大家都係"同道中人"啦~

本人對西餐真係冇乜研究, 但因為聖誕節的關係, 都係煮西餐好似o岩feel D... 咁o岩又搵到間網上訂購凍肉食品的公司, 所以決定借呢個機會訂d番唻試下。我訂咗一包羊架, 2隻法國有機黃春雞, 2包24個月西班牙火腿。埋單都係4百零蚊, 都幾抵喎... (不過交收時就出現咗少少問題, 仲考慮會唔會再向佢訂貨。)

外國人聖誕節必吃火雞, 但我對火雞有種難以形容的抗拒! 所以用咗法國春雞唻代替。今次試下用西式煮法, 上網搜尋過好多煮西式雞的食譜, 十居其九都係用白酒唻煮。等我又試下先~


材料:

法國有機黃春雞          2隻

小椰菜                          1 包

洋蔥                              半個

黃椒                              半個

紅椒                              半個



醃料:

海鹽                              2tsp

黑胡椒                         1tsp

Thyme                          1tsp


調味料:

白酒                             200ml

黑胡椒                          1/4 tsp

海鹽                              1/4 tsp

Thyme                           1/8 tsp

新鮮Rosemary              2條


上色汁:

青檸                               1隻

牛油                               2 tsp

老抽                               1/2 tsp


做法:

1) 早一晚將雞洗淨, 抺乾水份後, 用醃料塗勻, 用保鮮紙緊緊地包好, 放入雪柜;

2) 第二日開煮前2小時從雪柜拿出回溫;

3) 將牛油座溶後, 加入青檸汁和老抽拌勻, 備用;

3) 小椰菜、甘荀、黃紅椒先用牛油炒香, 下少許鹽和黑胡椒調味;

4) 倒入100ml白酒煮滾;

5) 放入雞隻, 待水再煮滾後, 下其餘調味料和70ml白酒 (除新鮮的Rosemary外);

6) 煮大約10mins後熄火, 在雞上掃上一層上色汁, 加蓋焗5mins;

7) 焗爐預熱180度;

8) 打開蓋, 掃上一層上色汁, 放入焗爐180度焗10mins;

9) 打開焗爐 (不要熄爐), 再掃上一層上色汁, 再焗5mins; (重覆2-3次)

10) 用牙籤插入雞脾最厚肉位置, 沒有血出水便成;

11) 從焗爐拿出後, 馬上灑上新鮮的Rosemary和倒入餘下的30ml白酒, 加蓋焗3mins/直至開飯便成。

p:s: 我今次用LC 26cm Buffet, 剛好放入2隻春雞。煮出唻又香, 雞肉又夠滑! 正~~ 敗婦們幫我掃清呢碟餸, 可想而知幾咁好味!!!



除咗食, 當然仲有交換禮物環節啦~ 我抽中咗敗婦P的禮物。呵呵呵~~ 係LC!!! 雖然我唔好心心, 但有人送的又另計!! 連師奶佬都好喜歡呢~

另外又收到敗婦P同敗婦A的禮物... 很貼心呢~~ 我愛死你地!