結婚3週年晚餐【附工房種+白神種+低溫發酵小餐包食譜】

俄羅斯經濟陷入困局, 油價創新低, 匯率好似坐火箭咁"一飛沖天"!  我就因為以上種種原因而失業了!!  幸好, 工作上的事已經在聖誕節前settled, 期待下個月番新工。希望一切順利!

上星期同師奶佬靜靜地渡過咗我地3週年結婚紀念日。但我呢個師奶仔為咗慳番個錢, 決定留番響屋企食。

頭盤: 俄羅斯魚子醬芝士併盤 + 自家製小餐包
餐湯: 罐頭雞蓉粟米湯
主菜: 香煎牛仔排, 橄欖油煙肉蜆肉磨菇炒意粉配黑松露鹽


早幾日終於都的起心肝整工房種, 今次試下用佢唻整包。見好多人都係用「星野」唻做工房種, 但我只係整咗白神生種, 我諗應該問題不大...

睇下佢幾咁活躍!

工房種

材料:
高筋粉          100g
糖                  5g
鹽                  2g
煉奶              5g
蜂蜜              5g
水                  92g
白神生種      10g

做法:
1) 容器先消毒, 風乾後備用;
2) 所有材料放入容器拌勻;
3) 室溫發酵22小時, 期間要攪拌一下;
4) 待發酵至2倍大時, 放入雪柜或可即時做包;

續養:
高筋粉          50g
糖                  2.5g
水                  46g
蜂蜜              5g

**室溫發酵至2倍大時便可放入雪柜保存。最多可保全星期。

小餐包食譜:

材料:

高筋粉          250g
白神生種      20g
工房種          100g
三溫糖          25g
鹽                  3g
水                  120-150g
無鹽牛油      25g
蛋漿              少許 (掃包面用)


1)  白神生種和工房種從雪柜拿出, 放置約1小時至室溫 (夏天可因溫度而縮減時間); 牛油切細粒至軟身;
2) 高筋粉、白神生種、工房種、三溫糖、鹽、水 (分數次加入) 放入大碗中搓至沒有粉粒;
3) 把麵糰從大碗中拿出至工作枱面,甩打至麵糰表面光滑;
4) 把已放軟身的牛油加入麵糰, 搓勻及甩打至麵糰表面光滑;



5) 大碗灑上少許高筋粉, 放入麵糰, 再灑少許高筋粉在麵糰上, 蓋上保鮮膜;
6) 發酵1小時至2倍大; 再放入雪柜作低溫發酵;
7) 第二天, 把麵糰從雪柜拿出, 放至室溫回暖;
8) 焗爐預熱180度;
9) 排氣, 靜置20分鐘, 分割;
10) 將麵糰搓揉成圓形, 放在焗盤上, 掃上蛋漿;
11) 放入焗爐焗15mins
12) 放涼後即可食用。

好鬼靚仔!!

 



撕開時見到呢個畫面, 好有快感!

p.s: 番新工前, 去個小旅行放鬆心情。超期待下星期的大阪之旅... 

白神+湯種煙肉粟米卷 (附食譜)

呢個幾月發生太多唔如意的事, 上兩星期都係鬱鬱不歡, 覺得好大壓力!  好在得各方好友的安慰、開解已逐漸逃出困局。但總有絲絲不安... 

係時候做番D自己鐘意o既事, 舒緩下。星期日諗住整曲奇餅, 但原來糖霜用晒... 搞到前一晚調好色的蛋白霜又報銷了!  好在白神種又READY好,  一於搓番個包!

麵糰材料:
高筋粉       250g
白神酵種   100g
湯種           75g
雞蛋           1隻
糖               10g
鹽               3g
水               50-80g

餡料:
粟米
煙肉

做法:
1) 先將煙肉和粟米炒香, 備用;
2) 所有麵糰材料放入大碗內搓至沒有粉粒;
3) 將麵糰搓圓放回碗內, 蓋上保鮮模發酵1小時;
4) 排氣, 然後舖上濕毛巾靜置10-15mins;
5) 將麵糰擀成長方形, 放上餡料;
6) 向上捲至收口;
7) 焗爐預熱180度
8) 將麵糰切成每份約2-3cm厚, 放上焗盤;
9) 180度焗15mins

冰糖燉雪梨雪耳糖水 (附食譜)

今年冬天遲咗唻... 今個星期先開始凍番少少, 但都係講緊14-18度。近年已經再分唔到春夏秋冬四季, 只分到夏天同冬天o既分別。


見街市生果檔有天津鴨咀梨賣, 即刻買番幾隻唻燉個糖水潤一潤佢!  做法簡單, 而且仲有好多好處: 滋陰潤肺，養胃生津。適用於慢性氣管炎、百日咳、慢性咽炎等病癥


材料:
天津鴨咀梨 4隻
南北杏少許
川貝少許
雪耳3個
冰糖適量

做法:

1) 天津鴨咀梨去皮去芯, 用水清洗一下;
2) 燒滾水後放入所有材料, 大火燉30mins;
3) 再改用中細火燉1.5小時;

李太焗豬扒飯 (附食譜)

焗豬扒飯曾經係我o既至愛, 以前大x樂o既招牌焗豬扒飯真係好好味, 蕃茄味濃、豬扒夠嫩滑。但越做越難食!

其實我發覺好多餐廳, 初初開業時食物質素真係唔錯, 但做得越耐, 食物質素就越差... 明白要控制成本, 不過就壞咗個名而要執笠。小店如是, 大型連鎖店如是。

所以好多時為咗食好o野, 都不得不親自下廚。雖然味道同賣相唔可以同大廚相比 但係至少都唔會太難食!!

蕃茄焗豬扒飯

材料:
急凍豬扒3塊
洋蔥1個
紅椒1個
黃椒1個
蕃茄2個
白飯3碗
雞蛋3隻
菠蘿2片
Mozzarella cheese 少許

醃料:
糖
鹽
魚露
胡椒粉

醬汁:
茄膏半罐
茄汁
罐頭蕃茄醬半罐
清水少許 (約1-2湯匙)

做法:
1) 急凍豬扒先解凍, 然後用刀背拍鬆;
2) 用醃料醃豬扒約15-50mins;
3) 燒熱鑊, 加入少許油炒香茄膏和罐頭蕃茄醬;
4) 然後加入清水, 蕃茄汁和糖調味, 炒至杰身; 盛起備用;
5) 另一隻鑊加入少許油, 燒熱後放入豬扒煎至兩面金黃色, 盛起;
6) 然後炒香紅椒, 黃椒, 菠蘿和洋蔥;
7) 把已煮好的蕃茄醬倒入鑊炒勻, 備用;
8) 預熱焗爐220度, 15mins;
9)白飯煮好後待涼,
10) 燒熱鑊加入少許油, 加入一隻蛋炒勻後放入白飯;
11) 然後把其餘的蛋加入後炒勻;
12) 把炒好的飯倒入焗盤中,舖上豬扒和蕃茄醬;
13) 最後灑上芝士, 放入焗爐, 用上火爐3-5mins;

P.S:
1) 蕃茄醬不能太稀, 因為會令到下面的飯太濕。
2) 蕃茄醬調味時, 可按個人口味加入糖 (味道帶甜) 或加入鹽 (味道帶酸)
3) 可用普通白米飯, 不加雞蛋炒底都可以;

【西式甜品】法式焦糖燉蛋 Cream Brulee (附食譜)

一個完美o既晚餐, 應該配有甜品先可以叫「完美」。甜品係大部份女士們不可抗拒o既美食。就算餐飯食到幾飽都好, 都仲有胃口食甜品。所以好多人都話「女人好似牛咁, 有2個胃」一個消化正餐, 另一個專用唻消化甜品!

上星期六約咗班中學同學上唻食飯, 西式晚餐當然要配西式甜品啦~ 西式甜品, 除咗芝士蛋糕之外我最鐘意就係Cream Brulee。即係鬼佬燉蛋!  原來自家製都唔係好難, 而且仲好好味添。

咁o岩見到鬼嫁post咗個食譜, 一於跟佢試下!

材料:

淡忌廉          500ml
牛奶              100ml
雲尼拿籽     1條
蛋黃              3隻
雞蛋              1隻
糖                  60g

做法:


1) 焗爐預熱120-140度約15mins;
2) 將淡忌廉, 牛奶和雲尼拿籽放入小鍋中, 用中小火加熱, 滾至起泡後熄火;

3) 蛋黃和雞蛋加入糖打至淡白色;

4) 把已煮好的忌廉牛奶逐少加入蛋漿內, 要一邊攪一邊逐少倒入; (因為怕太熱會令蛋漿煮熟)
5) 隔渣倒入碗內; 用火熗燒掉泡泡; (用火熗燒走泡泡時, 記得要離蛋漿遠d, 如果唔係會燒熟埋d蛋漿架~)

6) 焗盤放入水, 把碗放上焗盤內; (水的份量大約到碗底0.5CM高)
7) 120-140度焗40-50mins;

8) 輕輕搖焗盤, 如果表面凝固但有少少搖晃, 表示已經熟透; (若果搖晃得太厲害即係未得, 用上火再焗多5-10mins)
9) 待涼後放入雪櫃冷藏最少4小時;
10) 進食前在表面上灑少許紅糖, 用火熗燒至金黃色即成。

p.s: 冇雲尼拿籽可以用雲尼拿油, 份量大約1tsp。鬼嫁食譜有加橙酒, 但我因為唔多鐘意橙酒陣味, 所以就冇加喇。

【自家製】韮菜豬肉水餃配金華火腿瑤柱蝦米湯底 (附食譜)

十月底至上星期不停咁出差, 搞到坐骨神經痛! 好彩朋友介紹咗個脊醫俾我, 睇咗3,4次已經有好轉。不過要KEEP住睇... 好貴呀~

上星期六冇乜o野做, 理應好好地咁休息一下! 但發覺太耐冇入過廚房, 所以決定搵o野搞!  問下師奶佬意見, 想食酸菜魚定係水餃。師奶食話食韮菜豬肉餃!  即刻落樓買料開工...

好細個過幫過婆婆包水餃, 但婆婆係用正方形o既雲吞皮, 今次我用正宗o既圓形水餃皮!  其實自家製水餃或者雲吞真係一d都唔難, 煩就煩在包o既時候。不過呢d都係功多藝, 整多幾次就冇問題啦~

材料:

免治豬肉 (我用咗五花腩)
韮菜

調味料:

水 (加大約4湯匙)
糖
鹽
麻油
魚露
生粉
蛋白  (我用咗2只蛋白, 預留少許用來包餃)
五香粉 / 大地魚粉
胡椒粉
玫瑰露


湯底:

金華火腿
蝦米
乾瑤柱
日本醬油
鹽


做法:

1) 先預備湯底, 大火煮滾水, 加入所有湯底材料 (日本醬油和鹽除外);
2) 免治豬肉調好味備用;
3) 韮菜切細粒後, 加入免治豬肉內拌勻;



4) 材料拌勻後, 可以開始包餃;

5) 用另一隻鑊煮滾水, 把水餃先落水煮1分鐘, 然後放入另一鍋湯底內繼續煮。


P.S:  a) 因為師奶佬勁鐘意食金華火腿, 所以通常煮中式湯麵, 水餃或雲吞我都會用金華火腿做湯底。

b) 因為水餃皮有好多生粉響面, 為咗唔會影響到本身個湯底, 所以會用另一隻鍋先煮一煮D水餃, 等D生粉冇晒先放落湯底度煮。

c) 因為包得太多, 食唔晒包好佢放入冰格, 慢慢食。連d湯底都可以留番架~

【環保酵素】雪梨+提子+奇異果+香蕉

近期師奶界最熱門的就係「環保酵素」(俗稱: 環酵/垃圾酵素)。好明顯就係用一D冇用o既東東唻整啦~

環保酵素只有3大材料 - 糖 (最好用原糖, 黑糖; 白糖因為經過製練而唔建議使用)、新鮮果皮/菜葉、水 (水喉水便可)。再經過最少3個月o既浸泡發酵而成。

份量3:1:10 (3份糖 : 1份果皮/菜葉 : 10份水)
塑膠容器1個 (要先消毒)

1) 塑膠容器注水至半滿, 加入糖勻;
2) 將果皮/菜葉切細後放入容器內, 然後拌勻;
3) 用保鮮紙封口, 放置陰涼地方;
4) 第1個月, 每天到要打開蓋放氣, 用非金屬的用具攪拌或用手將果皮/菜葉壓按至容器底部;
5) 第2~3個月後不用每天都打開蓋放氣或攪拌, 可每隔幾日觀察下。
6) 足月後就可以隔渣取出環酵原液, 加入清潔劑/淋浴露/洗頭水等。

**基本上任何果皮/菜葉都可以用唻整環酵, 但某幾種果皮因為比較難發酵, 所以就唔建議用。(芒果、榴槤、龍眼、荔枝、木樹菠蘿); 另外魚、肉類同埋食剩o既飯同埋餸因為會有腐臭味, 所以都唔建議使用。

**如果一時間冇咁多果皮或者菜葉, 可以先量好水同埋糖o既份量, 有果皮時先放入。到夠晒份量時先開始計時。例如: 容器1000ml, 就放600-700ml水加180-210g糖攪勻, 然後有果皮時就放落去 (要記住份量), 直至果皮份量足夠先開始計3個月。

**環保酵素越耐就越好 (放心, 沒有限期的), 但千萬唔可以少過3個月 (即90日)。有d人會用試紙唻check pH值, 因為唔同材料做出唻o既pH值會唔同。

**環保酵素一定要放置陰涼地方, 唔可以有陽光照射到; 亦都唔可以冷藏,  因為會影響發酵分解。

** 發酵時, 表面會有白色薄膜/啡色/黑色o既浮游物, 呢d都係因為正在分解果皮/菜葉時產生。唔需要擔心! 但如果係綠色/黑色的話就代表呢樽環酵已經發霉, 唔用得喇!

**有網友o既環酵到咗一段時間, 表面會有一層厚厚, 好似豬皮咁o既o野。(但可惜, 我整咗成十桶都冇) 呢塊厚厚o既東東, 係好o野唻架~ 係環酵o既酵母, 整另一桶o既時候就可以當一份糖加入新整o既環酵, 令到發酵效果更加好!

**環保酵素發酵時, 第一個月會有陣陣酒香/果香; 到第2-3個月就開始會有D酸酸地味道。

發酵3日的情況:

發酵10日的情況: 好嘔泡呀~~ 大大話話整咗十桶, 得呢一桶有咁大反應!  網友話每個環酵bb都有佢o既獨特反應。就算用同一材料, 唔代表另一桶都有同樣反應。  因為我有好幾桶都係初頭o個幾日有氣泡, 之後就完全靜晒!!

足月收成了~~~  其實唔只收成咗2枝咁少... 因為我第一次整已經整咗3大桶!!  冇計, 要分俾親朋好友試下。



整環酵除咗因為覺得可以為地球出一分力之外, 最重要係因為師奶佬! 因為佢背脊D瘡瘡幾年都唔好番... 中,西醫都睇過晒!  見網友講到呢隻o野咁勁 (連主婦手都搞得掂!) 梗係要整唻試下啦~

我就用咗環酵+洗頭水、環酵+淋浴露已經3個星期, 跟咗我2個幾月o既濕疹好番晒, 頭髮唔再蓬鬆同埋好有光澤。師奶佬都話用咗環酵+淋浴露沖涼, 背脊d瘡瘡好咗好多。

自家製有「營」早餐

師奶佬上個月底調番去尖沙咀番工, 我地兩公婆又可以放工齊齊行街食飯拍下拖!!  呢幾日我放工都過去接師奶佬放工。我地真係好鬼耐冇行街喇... 近年都係放假留響屋企買餸煮飯又或者叫外賣食。都好少會兩公婆拍下拖!!!

上星期五我地又去行街街, 行經CitySuper, 師奶佬突然慶起話星期六想響屋企食早餐! 咁我又真係絕少自己煮早餐。難得佢咁有興趣, 我當然樂於配合啦~

買齊煙肉、腸仔、麵包同牛油。屋企有雞蛋同咖啡, 萬事俱備了!

我o個份係炒蛋白, 師奶佬就要太陽蛋。發覺原來台灣雞蛋都幾香蛋味。

蝦醬西蘭花炒鮮魷 (附食譜)

呢幾日真係睇新聞睇到怕... 我對政治冇乜興趣, 亦都唔覺得我地市民對政府可以做到D乜!  但睇番呢幾日所發生o既事, 令我深深咁體會到政治o既可怕!!   但同時亦都好佩服呢班學生, 為香港前途發聲。

難得又可以煮飯, 落街市見到有好鬼新鮮o既魷魚, 拿拿林買番條先! 原本諗住整椒鹽鮮魷, 但又唔想整得太複雜, 最後都係決定簡簡單單唻個炒鮮魷。

材料：
鮮魷          1隻
西蘭花      1棵

調味料:
蝦醬          2大匙
糖              1茶匙
水              1/3 杯

做法:

1) 鮮魷先洗淨; 西蘭花洗淨切件;

2) 蝦醬用1/3杯水開稀備用;

3) 燒滾水, 落少許鹽和生油,  放下西蘭花灼熟, 撈起備用;

4) 燒熱油, 將西蘭花和鮮魷下鑊炒勻後加入蝦醬和糖快手炒勻;  即成。

迷你蛋黃白蓮蓉月餅

今年夏天實在太熱... 響冷氣房一出一入就好易中招! 加上工作又忙, 個個星期都要出差上廠。內地氣溫又比香港高, 搞到我病咗成2星期都未好番晒....   搵日要去睇睇中醫調理下先得!

中秋節又唻喇~ 全年咁多個節日, 除咗新年同聖誕節之外, 我最鐘意就係中秋節! 細細個就因為我可以無王管去玩火, 又有我最愛o既蓮蓉月餅食。而家大咗都係為咗食月餅, 不過近呢兩年我就愛上咗整月餅!  上年都整過廣東同埋奶皇月餅, 得到大家o既一致好評。今年個個都問我整唔整... 我發覺自己整月餅送禮仲平過去買! 尤其而家半島嘉麟樓o既月餅竟然加到成4百蚊一盒 (聽聞炒到8百蚊!!)  我早幾年前都唔駛1百蚊一盒咋~

上星期師奶佬同我講, 話佢d同事已經問佢今年有冇奶皇月餅食。(因為往年師奶佬都係買半島番去俾同事食, 由上年開始就由我一手包辦!)  作為一個貼心而又賢淑o既老婆, 梗係即刻mark個時間整番幾盒俾佢帶番公司啦~ 但因為奶皇餡未有貨,而我又唔夠時間自己煮, 所以只好整住廣東月餅先。下星期繼續有奶皇月餅...

紅燒元蹄 (附食譜)

世事往往就係咁奇怪... 上星期六為家庭聚會準備「紅燒元蹄」, 點知早一星期我自己隻手就變咗隻「豬蹄」!

我今年冇犯太歲... 點解"意外" 總會發生響我身上!!??

今次家庭聚會, 主要係幫我堂大佬搞番個PRE-WEDDING PARTY, 咁o岩英國番唻o既堂家姐生日, 所以大家決定搞大佢!!!  我被欽點負責2個餸, 分別係我最拿手o既醉雞同埋初嘗試o既紅燒元蹄。

其實我一直都好想試下整「紅燒元蹄」, 但因為元蹄太大隻, 我地4條友根本食唔晒。今次真係一個好機會俾我試下煮呢味餸!  上網睇咗幾份食譜, 材料都係差唔多。以下食譜係參考咗網上幾份食譜綜合而成。

材料:
元蹄一隻   (重約2-3斤)

汆水:
薑片       
蔥           
花雕酒   

炆元蹄汁:
八角         
花椒         
蠔油         
老抽
桂皮
香葉
紅棗
圓肉
冰糖/片糖
紹興酒
水
薑

獻汁:
炆元蹄汁
鎮江醋
生粉
喼汁


做法:

1. 元蹄先用薑片, 蔥段和紹興酒汆水5分鐘, 撈起抺乾水份後用老抽茶勻後風乾;
2. 燒滾油, 放下元蹄走油3-4分鐘; 瀝乾油份;
3. 另一鍋加入炆元蹄材料, 大火煮滾後放入元蹄;
4. 加蓋改轉細火炆煮30分鐘; 熄火焗30分鐘; 重覆4次; (即炆煮時間約2小時)

     5. 元蹄取出後, 去骨放碟;
     6.  用大約3-4湯匙炆元蹄汁加入其他獻汁料煮至濃稠, 淋上元蹄即成。

加埋D白菜仔伴碟, 食落又唔會太油膩。

5日4夜熱辣辣台北遊之貓空半日遊

上星期我同細妹+3位堂家姐+1位小朋友去咗台北玩。好老實, 我從未試過暑假去旅行... 今次之後, 7,8月真係唔好預我去旅行! 熱到呢~~~

因為今次有小朋友o既關係, 行程/景點係比較大路。好似貓空、九份、十分、動物園。因為天氣實在太~太~太熱喇!! 小朋友呢幾日不停咁扭計, 發脾氣... 搞到我地班大人都好攰!

台北我去過4、5次, 但從未考慮過去貓空。一來我畏高; 二來我對風景區冇乜興趣! 今次因為有小朋友, 而且我地租車o個位司機又推介我地去下...  去到纜車站就見到個巨型HelloKitty!!!

除咗呢個巨型HelloKitty之外, 原來貓空站周圍都係HelloKitty!!!

價目表+路線圖

大型壁畫

緊急出口

詢問處

纜車車身

洗手間出入口+指示方向

山頂貓空站

坐大約20分鐘纜車就上到山頂。貓空最多o既係茶園, 不過天氣實在太熱, 而且茶園係室外多, 所以我地冇去到嘆茶, 只係試咗一杯鐵觀音味o既雪糕, 再逗留咗大約30分鐘就走人! 

愉快的週末晚餐 (附白玉葡萄食譜)

上星期六師奶佬放早, 前一晚已經ORDER要我煮飯! 仲要落ORDER一定要食豬頸肉! 佢話我整過咁多次豬頸肉佢都係食得兩,三片( 仲要係食剩o既!) 今次佢話要一個人食晒成碟豬頸肉...

二餸一湯, 份量剛剛好! 


行過街市, 見到有好多冬瓜!  令我又諗番起呢個餸 - 「白玉葡萄」

自從上兩年我煮過呢味餸之後, 而家每到夏天師奶佬一定會叫我煮呢味餸。經過多次o既試驗/修改, 最終演變出o岩晒師奶佬口味o既食譜!
《原食譜係來自大少奶》

材料:
冬瓜              3斤
金華火腿      3小塊
乾瑤柱          少許
清雞湯          1小盒

做法:

1) 冬瓜用小工具挖成小球; 其餘的冬瓜肉用鐵匙刮成蓉備用;
2) 乾瑤柱用水浸軟備用;
2) 燒熱一鍋水, 冬瓜蒸煮約10分鐘;
3) 金華火腿1塊切成小粒;
4) 另一隻鍋加入清雞湯, 乾瑤炷水, 乾瑤柱, 冬瓜蓉和2小塊金華火腿煮滾;
5) 放入已蒸熟的冬瓜, 大火煮5分鐘 (見到湯底剩番3份1)
6) 熄火, 曬上金華火腿粒便成。

【天然酵母】提子酵母

又唻養番個酵母BB先~ 夏天養酵母真係方便過冬天養!  記得上年冬天養酵母, 真係玩到我頭暈... 因為天氣太凍, 酵母BB養極都唔起, 搞到我每日一番到屋企就開著個焗爐pre-heat一陣再放酵母BB入去養, 仲要耐唔時注意溫度.... 總之就麻煩到暈!

而家夏天只需要5-7日時間, 唔駛點理佢, 每日開蓋搞搞佢就得。好似我今次呢樽紅提子酵母BB咁, 嘔泡嘔到呢~~~

第2日已經開始嘔泡....

第4日D泡多咗成2倍!! 勁活躍呢~

第5日D泡明顯少咗好多lu~

連續餵養3日就可以用唻整包喇~



下次用咩生果好呢~ 檸檬、橙、蘋果?

久違了的自家製麵包

我真係懶到爆!!!! 早排養咗樽米麴酵母, 點知用唔夠兩次就死咗.... 唉~ 浪費晒D時間同心機!! 上星期日響屋企百無聊賴, 一於搓番兩個麵糰先!!  一個做低溫發酵, 一個就即做即焗。

可能真係好耐冇搓包... D手勢生疏晒!  之前跟韋太學過搓包, 覺得佢教o既搓包方法慳水又慳力, 不過... 完全唔記得晒!  唯有用番Carol個甩打麵糰方法.... 雖然係攰d, 不過就簡單易學。之但係就唔可以夜媽媽做, 因為我試過11點幾慶起搓包, 俾樓下投訴...

我覺得搓包能夠舒緩/平衡心理。因為無論當日心情如何唔開心。睇見d包包焗出唻脹卜卜, 心情隨即開心番晒!

2014年生日曼谷之旅 - 泰式雪糕三文治

我發覺我同細妹係好有冒險精神!! 去到泰國見到唔少街頭小食, 我地兩條友仔真係乜都夠同膽放入口...  

好似呢檔咁, 響Central World出面。都見有唔少當地人買唻食, 我同細妹又忍唔住買埋一份!! 其實真係唔知咩唻... 叔叔又唔識英文, 我地又唔識泰文!! 好似大約20THB。

叔叔知道我地係遊客, 邀請佢合照, 仲專登擺埋POST, 又望晒鏡頭咁, 非常之NICE!

 

 

其實呢件o野係咸係甜我地都唔知..... 一咬落去, 原來係椰子味雪糕三文治。個椰子味雪糕裡面有少少果仁碎, 香草。而外加咗花生, 雪糕底下有甜甜糯米飯。大熱天時食呢件甜品小吃, 真係涼透心.........

 

貴婦面膜 SUISSE Renewing Cream Mask

年紀越大, 皮膚質素就越差... 以往都係去SaSa買d平價日本skincare, 但隨住年紀o既增長, 呢d日本skincare已經唔再o岩我用! 真係不得不承認, 我已經踏入中女階段...

除咗日常o既toner, serum, lotion之外, mask對我唻講真係好重要。有一期我係每晚一mask, 但後來懶咗就冇再每晚一mask了~ 而家屋企仲有好多paper mask存貨, 當時認為paper mask夠晒方便, 而且又唔貴, 日日敷都唔會肉赤。但原來cream mask或者gel mask比paper mask更加有效。雖然價錢略貴, 不過女人o既皮膚=第一層衫, 當然唔可以慳啦~

其實我一直都好想試下神級貴婦品牌"Valmont" o既 Renewing pack同埋Purifying mask, 之不過價錢實在太~太~太貴!  仲要唔會有discount又或者promotation... 而SUISSE Programme 價錢雖然比Valmont平少少, 但功效其實都差唔多。

SUISSE Programme Renewing Cream Mask 我等咗成年幾, 終於都俾我無意中發現SaSa做緊會員換購, 原價千幾蚊, 會員換購再加$100現金coupon, 唔駛$700就可以帶佢番屋企!!! 心情真係極度興奮!!!!!  (師奶仔心態)

好老實, 買o既時候我真係冇為意到係幾多ml, 只係一心想帶佢番屋企。點知番到屋企拎出唻用時, 先發覺原來係salon size, 200ml... 以後真係要多d去SaSa行個圈!

超大SIZE!  我諗應該可以用到半年至一年.... 又要睇緊時機入貨。

佢o既質地比牙膏裝o既mask稀。

薄薄一層搽上面, 等10-15分鐘。

呢款mask含有DNA & RNA等活性成份, 主要係重建肌膚, 撫平皺紋又可以滋潤肌膚。雖然皺紋就未有, 但係重建肌膚就有呢個需要!

用後感: 用咗呢隻MASK差不多一個月 (其實我大約2星期用3次左右, 不過說明書就話一星期可以用2-3次。), 本人覺得因為呢隻唔係deep clean mask又或者保濕mask, 更生皮膚就唔駛一星期更生幾次... 太密啦~ 
敷完皮膚真係光滑d, 毛孔收細咗少少, 摸落手仲嫩滑咗唔少... 不過頭3次敷的時候, 搽上面唔駛1分鐘就覺得好"拿".... 放心, 呢個係正常現象! 忍受咗5分鐘後就冇事, 過完水塊面都冇因為"拿"面而紅腫。

正所謂「一分錢一分貨」, 為咗白滑無暇o既肌膚, 有d錢係應該/有需要洗o既~~ 最多平時咪食少兩餐囉!

2014年生日曼谷之旅 - B-day dinner @ The Kitchen Table W Bangkok

話到明係生日之旅, 梗係要食番個FINE DINNER慶祝下啦~ 我呢個做家姐o既算係咁... 一早send e-mail去訂枱, 我仲request甜品上要寫上"Frankie, happy 30 birthday"! 原先我係book咗細妹正日生日食飯,但因為細妹2位朋友比我地早一日番香港, 所以我地決定提早一日。4條友可以食多d o野嘛~

落到去, reception已經問我邊位係生日主角, 仲安排我地坐響比較入o既位置。唻之前我已經叫酒店e-mail份menu俾我睇睇先, 雖然食物選擇唔係太多, 但都好多完化。泰式, 西式都有。

坐低後, 先唻一碟麵包。


我地4條友, 叫咗4個course!  份量其實唔係好多, 不過都剛剛夠食飽我地....

先唻個小食 - Crispy Crab Spring Rolls

冰鎮海鮮拼盤 - Chilled Seafood

拋打肉碎炒飯 - Wok fired pork with Jasmine rice

呢個唔響menu度, 係細妹朋友點o既smoke salmon pizza

呢杯充滿泰國風味o既飲品, 係由我最愛o既Mojito演變而成, 叫做Mango Mojito


食飽飽後, 我地出咗露台吹吹風。突然間D staff一路唱住生日歌, 一路拎住個蛋糕過唻... 真係好鬼surprised架~   呢個生日蛋糕係The Kitchen Table FREE俾我, 原先我係諗住叫細妹自己ORDER甜品, 酒店再on top幫我加d字上去, 但既然酒店E-MAIL覆我時寫Complimentary Birthday Cake, 我梗係唔再叫甜品啦!

W Bangkok呢間The Kitchen Table食物質素比我想像中...差!! 好老實, 一間5星酒店o既餐廳食物質素真係唔應該比外面其他普通食肆差唔多。再者, W Bangkok只得一間餐廳..... 係咪應該要做得更加出色呢!?


細妹正日生日當日, 我地送咗佢2位朋友走之後, 食埋晚飯先番酒店... 入到房就見到有4個CUPCAKE放咗響枱度。原來係幫我地訂PACKAGE o個個人special request, 可能佢幫我地訂機票時, 見到咁o岩係細妹同我o既生日, 所以request酒店送個生日蛋糕俾我地。

枝Baileys係我地自己架~ 個setting都係我地自己擺。