最愛法式甜點Macaroon @ Laduree

我成日都話要對自己好D,  連自己都唔對自己好的話, 仲有邊個會對你好呢!?  可幸o既係我身邊家人朋友都對我好好, 好感恩有佢地響我身邊。

而且響一D「非常時期」我特別會對自己更加好!!  最常見o既就係心情非常之唔好o既時候!  而今次呢個「非常時期」就係《出差前恐懼症》! 因為近呢年成日都流傳出大陸o既食品安全問題, 甚麼地溝油, 老鼠變乳鴿, 假雞蛋, 毒薑, H7N9等等!  之前我響大陸真係食乜都無所謂 (當然除咗一D野味之外啦~) 但而家我只會食白飯, 少許豬肉同埋瓜菜類; 而食水/飲品方面我更加注重安全衛生, 我只會買罐裝/樽裝o既入口飲品, 最常飲o既就係「可口可樂」。

今次出差係我最唔願意o既一次!!! 一來準備呢次行程時, 一改再改; 二來唔講以為佢地係唻旅行而唔係公幹!  老細講明business trip 係唔容許有free time, 竟然大條道理咁同我講因為坐咗十幾粒鐘飛機好攰, 要沖涼, 要休息!!!  唔辛苦得就咪做呢行啦~

 終於都KO咗條麻煩友, 要搵番d o野平衡番我o既心理!!! 難得師奶佬放工陪我行街shopping, 一於去Ladurée買盒macaroon番屋企嘆! 最愛開心果, 雲尼拿同埋焦糖味。好在師奶佬唔係太好macaroon, 如果唔係又同我爭食!!

一餸兩味

有得必有失o既~ 好似決定捨棄微波爐咁, 每次要翻熱食物就要開火蒸熱。煩就係煩咗少少, 但健康咗喎!  而且有咗焗爐之後, 除咗整麵包, 焗蛋糕之外, 有時仲可以一餸變兩味呀~ 所以話呢, 有時一件事情總有幾面o既!

上星期自己炒咗碟螺絲粉做晚餐同埋2day o既飯盒, 點知師奶佬又話番唻食… 知道佢不嬲都唔太喜愛”茄汁”, 而且冇咗微波爐翻熱, 用明火蒸又好似會太濕… 最後諗起用焗爐, 加D芝士落去變成「芝士焗蕃茄炒螺絲粉」。

李太學整餅之奶皇月餅

 話咁快下個月就中秋喇~~ 聽聞今年半島嘉麟樓奶皇月餅加價加到4百幾蚊一盒!! 真係痴晒線~~ 早幾年因為屋企冇焗爐所以整唔到月餅, 今年我決定唔買月餅!! 自己整又平又健康…

雖則上年已經學過, 但因為唔見咗張receipt, 所以今年要再執多一次。當係溫故知新囉~ 今次約埋兩位好友K小姐同I小姐一齊去學。上年就同師奶佬去學, 佢仲要全班唯一一個男性

 

 

 

 

 

 

 


材料已經一早預備好, 著好圍裙, 等夠鐘就開始上堂lu~

8份的材料 - 奶皇餡, 月餅皮

 

新鮮出爐, 熱辣辣, 香噴噴~

為麵包作準備

尋晚同師奶佬去拍拖, 原本係想去買對新鞋, 但奈何間間SHOP都冇晒SIZE! 最後唯有去行CC SUPER… 唔知點解而家對行街買衫冇乜興趣, 反而一去到超市呢, 成個人就醒晒!!

富澤早排唻咗香港, 初時售賣o既種類同埋數量好少, 次次去親都淨係得番吉架! 尋晚去到, 貨源充足, 心大心細都唔知買乜好, 最後買咗幾款常用o既。但要9月中番到唻先可以試玩喇~  因為下星期出差, 一去10日!!!  師奶佬就free啦~

幫敗婦人P小姐敗咗一包Pre-mix麵包粉, 自己買咗肉桂粉同埋黑加侖子乾用唻整麵包, 富澤同日清高筋粉, 試下邊隻高筋粉好d; 仲有糖霜用唻整月餅

最開心係買到星野酵母! 出完差番唻可以開始培養生種… 呢次有排玩lu~~

芝麻扭扭包, 藍莓包, 芝士包

而家每日放工都想即刻番屋企, 唔煮飯都想搓下麵包! 自從有咗個焗爐之後, 平日出街食飯o既次數真係少之又少呀!! 一來可以慳錢; 二來可以整健康麵包俾屋企人食, 一舉兩得。

今次試咗幾款新造型, 同埋新口味!  扭扭芝麻包, 藍莓包, 芝士包同埋腸仔包

 
媽咪話個芝麻扭扭包好好味! 師奶佬就話芝士包食唔出芝士味… 細妹就獨沽一味腸仔包! 而我就最愛藍莓包, 唔太甜又健康! 

 

李師奶學煮泰菜@Rachel's Kitchen

上星期五約咗敗婦人P小姐去Rachel’s Kitchen學煮泰菜。今堂學整斑蘭葉包雞、沙嗲豬,牛,雞串、泰式金邊粉、明爐烏頭、香芽蘋果梳打特飲。Rachel’s Kitchen係響觀塘其中一個工商大廈裡面, 入到去即刻覺得”如果我個廚房有佢一半就好喇~”

大家一路上堂, 一路諗緊上完堂之後, 有邊幾個菜係會煮番出唻呢!?  我一定唔會整斑蘭葉包雞! 因為睇極都唔識包… 我對手同個腦永遠都唔一致!!! 所以唔識摺紙, 唔識畫公仔。睇完Rachel示範, 之後就開始我地o既dinner喇。

 

食飽後, 大家都迫不及待去搜購心頭好… 而我就買咗黑松露醬、意大利粉、天使麵、藏紅花、牛肝菌。個牛肝菌真係好鬼香呀~ 拎到番屋企放咗響飯枱, 行開一陣再行番埋去執o野, 即刻聞到陣香味… 為咗保存佢o既香氣唔好咁快留失, 我將佢放咗入密實袋, 再放入雪柜。

老翻吉野家牛肉飯 (附食譜)

屋企個電飯煲上星期煮飯時無啦啦壞鬼咗!! 好在我夠醒目, 即刻拎個LC出唻, 倒晒D米落去開火煲!  唔駛10分鐘, 已經煮好咗! 我個電飯煲最少要30分鐘先煮好呀~ 而家10分鐘已經煲好飯, 煮兩個餸就可以開飯喇!  前後唔駛30mins… 夠晒方便快捷!  拎我重拾番放工煮飯o既樂趣~

今次係煮俾師奶佬食o既, 佢好耐冇食過煮家飯喇~~ 之前淨係煮佢一個人o既晚餐係好頭痛, 因為用電飯煲煮咁少米, 好易會煮到變晒飯焦!  而家煮一人前, 真係話咁易呀~  因為用LC 17 oval,  煮一杯, 半杯米都唔成問題!! 

材料:

火鍋牛肉薄片1盒

洋蔥半個


醃料:

糖

胡椒粉

麻油

料理酒

生粉

調味料:

日式燒肉汁

鹽

味醂

料理酒

日本醬油

做法:

1)  牛肉片先分散, 用醃料醃10-15mins;

2)  洋蔥切成幼條, 備用;

3)  凍鍋落油, 下洋蔥絲炒至軟身, 下日式燒汁炒勻;

4)  牛肉片落鑊炒勻;

5)  下調味料, 料理酒最後贊鑊邊,

6)  炒勻, 即成

梅菜炆五花腩 (附食譜)

上星期真係好攰… 星期四湊住個靚仔去蘭桂芳同朋友飲o野;  星期五晚11點同班朋友去玩逃出密室; 星期六約咗好敗友交收順便食個tea; 星期日晚就要煮飯。

講開呢位小朋友, 佢就係我姨甥仔喇~ 閒時會湊佢唻我地度訓番一, 兩晚。上星期四阿妹又湊咗佢過唻, 咁我又約咗班朋友去happy hour, 提議不如帶佢去見識一下! 難得我班朋友唔介意, 仲搵埋邊間酒吧可以帶小朋友去。佢都不知幾咁受歡迎呀~ 仲成晚望住隔離枱d姐姐, 我地開玩笑話佢響度”目及”女, 佢笑得勁古惑! 但請記住… 佢只係得2歲人仔架咋~ 番到屋企, 佢仲同我媽咪講「我今晚”目及”咗成晚女呀~」笑到我地死!!!!

星期日回歸平靜… 係時候諗下煮咩餸喇! 早前響嬸嬸度拎咗一大袋梅菜番唻 (嬸嬸響街市開咗幾檔o野, 佢入o個d梅菜係我食過最好食架~) 為咗要清減d「庫存」, 要好好咁計劃下煮咩餸…  阿妹唔響度食, 唔駛蒸魚; 老公夜d番唻食, 要留餸; 而我又要準備未來3日o既lunch box… 炆煮就最好架喇~ 而且又可以用LC唻炆, 慳水, 慳力, 又慳石油氣!


材料:

五花腩1斤

梅菜3棵

豆卜6-8個

薑片

蔥

乾蔥1粒

醃料:

糖

鹽

胡椒

麻油

魚露

料理酒

生粉

調味料:

片糖

老抽

生抽

鹽

麻油

做法:

1)  五花腩切件, 用水洗淨後瀝乾水份, 用醃料醃10mins;

2)  薑, 乾蔥切片, 蔥切段; 梅菜切碎;

3)  豆卜用筷子篤開一個洞;

4)  LC 22cm凍鑊凍油, 燒熱油後放下薑片, 乾蔥和蔥白下鍋炒香;

5)  下五花腩, 先煎香外皮至金黃色, 炒至5成熟;

6)  把梅菜下鍋炒勻, 下調味料 (除生抽外); 加少許水, 加入豆卜;

7)  加蓋用中小火煮20-30mins, 打開蓋試味; 最後加入生抽調味;

8)  熄火加蓋焗5mins, 上枱前加入少許蔥花

 

小小心得:

a)  梅菜先用水洗淨, 揸乾水份後切碎後, 然後用少許糖及麻油醃5mins 或者用白鑊炒至乾身, 以減去咸味;

b)  豆卜先用筷子篤開一個洞, 炆煮時更加入味; 如切開一半的話, 豆卜裡面的豆渣會散開, 成鍋會都有一粒粒白色/深啡色;

c)   用五花腩較肥, 但先將肥的部份煎香, 吃時會更好味; 或可改用腩排;