女人要保養!

由細到大都俾人話我皮膚又白又滑, 當然係因為遺傳咗婆婆同媽咪o既優點啦~ 仲有細細個時, 媽咪成日都煲好多涼茶/湯水俾我地飲。除咗遺傳同飲食之外仲要保養架~

之前成日以為自己仲後生, 唔需要用太貴或者太rich o既護膚品, 而且我好鐘意試新o野, 經常性流連d化妝品連鎖店, 響forum 度見到d人話邊隻好用我就會買唻試...但都只會試made in Japan! 有信心保證d嘛~  但隨住年紀漸大, (已達30大關了~) 覺得皮膚質素好似已經唔再同以前一樣!!! 雖然到而家好多人都話我唔似3字頭的中女, 但為咗唔好衰老得太快, 決定花多少少錢買d品質/成效較好的護膚品。呢個月我已經買咗差唔多3千蚊護膚品了~ 從未試過咁大手筆! 好老實, 係有d肉赤...  但用咗兩星期後, 見皮膚的改變, 覺得都值得o既~

呢個牌子o既洗臉皂, 我想試好耐架喇~ 但一直都唔想花太多錢, 今次為咗靚靚皮膚, 決定一擲千金 (真係差唔多一千蚊架~)

呢個洗臉皂用法雖然有D麻煩, 但用完之後皮膚嫩滑咗好多... 讚~

【無水酵母】之柑桔天酵

唔玩麵包都唔知原來整麵包係有咁多學問, 咁多唔同玩法! 例如要睇天氣溫度去計算發酵時間; 唔同牌子的麵粉同酵母都有唔同"性格", 例如有人話日本粉吸水力比台灣粉強, 所以用日本粉就要用多少少水; 酵母又有分新鮮酵母、乾酵母、天然酵母等等。唔同種類的酵母所用的份量又唔同!

早期玩完"星野"、"米麴"、"提子", 今次玩另一隻叫「無水酵」。上次提子酵母液用的方法係生果+糖+水; 今次呢個「無水酵」即係生果+糖, 唔加水。

星期日買咗D柑桔番屋企, 諗住自己浸番樽咸柑桔。突然心血來潮, 留番幾粒用唻試下做酵母液。

材料:

柑桔     80g

砂糖     40g

消毒玻璃樽1個


做法:

1) 將玻璃樽消毒, 風乾; 柑桔洗淨, 風乾;

2) 柑桔切片, 去核; 放入玻璃樽內, 加入砂糖;

3) 加蓋, 放置室溫5-7日。

浸咗一晚, 今朝起身見到開始嘔泡喇~ 打開蓋陣清香的柑桔味... 好香呀!!!!

Sunday Brunch @ Brunch Club

出完差番唻約咗兩位好友食Brunch, 見見面, 吹吹水! L小姐提議去中環半山, er....半山!? 請恕本人孤陋寡聞, 我從來唔知道原來中環半山都有brunch食。由中環地鐵站行上去, 都幾係辛苦下~ 尤其斜路非常多、非常斜...

因為只限walk-in, 所以去到都要等。由於食店位置於一條特斜的斜路中段, 等候期間都幾辛苦... 旁邊的行人路寬度只限一人經過, 如果企響行人路等, 又阻礙其他人經過, 企響斜路度等又怕會跣腳仆落去...

店舖唔算好大, 基本上利用晒所有空間去擺放餐桌, 所以都幾迫下架~ 不過為咗美味o既egg benedict, 迫少少都冇所謂啦~ 

Egg Benedict最好配mushroom, 夠晒清新健康!


egg  benedict係我最愛之一, 通常weekend可以約到朋友的話, 都會周圍去試試其他地方的egg benedict。so far 我食過最好味o既egg benedict係響Element裡面o既【Coffè HABITŪ】

『星野什錦麵包』(附麵糰份量)

原來麵包係需要一門高深o既學問... 份量雖然可以隨意加減, 但要搵到一個o岩自己o既食譜, 係需要多番嘗試, 多番失敗先能夠成功!  經過多次失敗o既嘗試, 我終於都搵到一個暫時o岩自己o既食譜。

主麵糰:

高筋粉         300g
水                 150ml
糖                 30g
鹽                 3g
雞蛋             1隻 (約40g)
星野生種     60g

呢個份量做出唻o既包包, 我非常之滿意! 組織夠細緻, 氣孔細但密, 雖然唔係太軟熟, 但我好鐘意!!!

米麴酵母液 (附做法)

而家整包開始得心應手咗好多, 係時候向困難挑戰! 早排試咗提子酵液同「星野」, 今次試下用米麴唻做酵母!  響網上參考咗好多位blogger o既做法, 真係非常之簡單! 難就難在買米麴喇~ 呢一年米麴被好多blogger追捧, 突然間成為咗煮婦界o既新寵兒, 家家必備o既材料!

我而家用緊o既呢款米麴係響日本買番唻, 佢冇咗一層霉菌, 日本人話呢隻叫乾米麴。如果用唻做鹽麴/醬油麴的話就要加多少少水。不過今次我用佢唻做酵母, 水o既份量不變。



我呢個米麴酵母液做法係參考Allie

米麴天然酵母液

材料:

米麴    50g

砂糖    20g

水       200ml


做法:

1) 將玻璃容器消毒, 風乾備用;

2) 米麴、砂糖、水放入已消毒的容器內, 拌勻;

3) 先舖上一張保鮮紙在樽口, 弄開幾個小孔, 加上蓋;

4) 室溫放置5-7日, 每天要搖晃容器及打開蓋排出空氣;

5) 第3天開始便會出現氣泡, 及有陣陣像汽水的氣味;

6) 第7日收成, 隔出米麴, 留下酵液; 未用的酵液可以放入雪柜保存1個月。















酵液可以選擇直接用或者做生種。

米麴生種

材料:
米麴酵液     30g
高筋粉         30g

做法:
1) 將材料放入消毒玻璃樽內拌勻, 室溫發酵4-5小時, 發至2倍大和有很多氣泡, 然後放入雪柜;
2) 第二,三天重覆上面的步驟, 第四日便可用唻搓包lu~

每次拎出的份量都要填補番落去架~ 咁樣個生種先會長用長有...
例如: 今次拎咗100g生種出唻搓包, 就要加番50g高筋粉, 50g清水落去。再室溫發酵至2倍大先放番入雪柜。如果一星期都唔用的話, 都要拎最少100g出唻, (掉咗佢又好, 開多一樽餵養都好) 再加番1:1落去餵養。其實生種真係可以源源不絕架~ 除非好耐好耐冇用佢唻搓包, 養死咗啦! 但我提意最好最少3個月再重新整過一樽。

睇下~ 我呢個生種好鬼活躍架!!



Sogo Thankful Week 第一擊

星期日接師奶佬放工, 食完晚飯轉戰SOGO! 原本都冇諗住會有d咩收穫, 世事往往都係咁... 期望越大失望越大, 反而冇乜期望的話就會有少少驚喜。

去SOGO梗係先上7/F啦~ 自從入咗「全宇宙最毒」的谷後, 去親SOGO/CC 叔婆/ 一田/ 呢D百貨公司, 第一時間就去家品部/廚具部! 唔睇唔安落...
今次上7/F因為師奶佬響度, 我都唔敢太放肆! 但見到LC個counter真係忍唔住飛奔過去, 睇下有冇死雞執。當然... 係冇死雞執啦~ 但我都買咗兩隻碟, 仲要係我最愛的紫色!

我見到隻紅色o既22cm marmite, 簡直係愛不惜手呀! 我用一對期盼的眼神望住師奶佬, 而佢竟然好豪爽地問我係咪好想要, 跟住就拎張信用卡俾我..... OMG~~ 開心到飛起呀! 即刻叫姐姐拎個新o既俾我。 搞咗一大輪... 竟然得番display o個隻, 仲要有瑕疵的!!! 心情即刻跌落谷底! :(

走o既時候我問師奶佬做乜突然間咁好人送我一隻煲, 佢話見sales姐姐話買3件6折, 咁抵咪買囉~ 我心諗: 其實唔係thankful week, 呢期都係做緊3件6折! 當然我唔會話佢知啦~ 一定要趕響25號前同師奶佬再去SOGO一轉!! 誓要將22cm marmite收歸我有。

當我帶住失望心情準備離開7/F時, 又俾我見到一件夢寐以求的東東... 就係手提蒸氣燙斗喇~~ 雖然唔係咩大牌子 (其實連我牌子係咩我都唔知), 但3百零蚊... WHO CARE~ 用得到咪得囉!

唻緊呢兩、三日一定要再戰SOGO!!!!!!

日本料理 @ 鮨穴

感覺上好似好耐冇同師奶佬拍下拖, 出街食飯... (因為我通常都會話出街食貴呀~ 番屋企煮飯啦!) 不過又係架, 自己煮飯除咗平D之外, 仲健康D... 唔駛食咁多味精嘛...

尋晚難得星期日可以偷下懶, 去接師奶佬放工順便Shopping!!! (其實今個月已經shop咗好多, 可能因為出差太攰, 要shopping下, relax下! 哈哈哈) 去接師奶佬o既途中, 行經呢間日本料理, 我係俾佢o既「蟹王粥」吸引! (其實本人係非常之唔like食粥的。不過見佢係用蟹唻煮, 嗯... 應該會幾好味)

我地兩條友食咗: 牛肉鍋配讚崎烏冬、什錦天婦羅、梅味冷麵、蟹膏壽司、甜蝦壽司、油甘魚壽司、海膽小卷。

個蟹膏壽司同埋個海膽小卷真係非常之鮮甜呀~ 梅味冷麵個樣就好賞心悅目, 但其實食唔出有梅味。

2人盛惠一千大洋! 嗯... 我覺得都物有所值o既~ 下次帶媽咪去試下先!

『星野』初體驗 (附麵包食譜及星野生種做法)

自從出完差番唻之後, 都不知掉咗幾多個麵糰... 不停咁嘗試、失敗; 再嘗試、再失敗! 終於都成功喇~~ 雖然搓到身水身汗而且手痛, 但見到個麵糰脹卜卜, 真係好興奮, 好開心架~

年初中響CC叔婆度買咗2包星野酵母, 當時對酵母係一無所知, 只係見到唔少講天然麵包o既書都會講星野酵母。但買咗番唻幾個月都仲放響雪櫃, 上星期日終於都試咗整星野生種, 簡單冇難度! 

星野生種

材料:

消毒器皿1個

星野酵母50g

30度清水 100ml

做法:

1) 儲存星野生種的器皿消毒, 風乾備用;

2) 將30度100ml的清水倒入器皿, 逐少加入星野酵母拌勻;

3) 蓋上蓋, 進行室溫發酵:

20度 48小時
25度 30小時
30度 24小時

4) 發酵完後, 放入雪柜可保存1-2星期;

5) 每次拿適量的份量, 用直接法便可。


今次我又整咗幾款唔同口味o既麵包, 原來用咗星野生種, d包包焗出唻比用普通酵母脹好多架~  而且焗完出唻之後, 按落去好軟熟.... 因為第一次用星野生種, 所以現階段仲摸索緊份量, 今次麵包份量如下:

高筋粉          300g  (100%)
鹽                  3g (1%)
糖                  30g (10%)
雞蛋              40g (14%)
星野生種      30g (10%)

**百份比係烘焙比例, 以粉量為100%作準則** (此資料係參考仙姐的食譜書再自行作調整)

今次包包焗得唔夠平均, 搞到鴛鴦色添~

媽咪今朝一早就whatsapp我, 話今次o既包包好好味 :)  今晚再挑戰另一個食譜份量, 睇下結果如何先~

我為『蟹』狂

各個識得我o既朋友仔都知道我好鐘意食o野, 而家除咗鐘意食之外仲愛上咗烹飪! 早排遇見一位朋友, 佢話當初知道我要同師奶佬結婚時, 覺得師奶佬o既將來會好慘... 但後來佢發現佢睇錯咗!! 因為已為人妻的我, 心態上唔多唔少真係改變咗好多... (但一樣都係咁惡!) 我朋友驚訝於我的改變... 由一位十指不沾陽春水, 放工放假掛住去玩o既人, 竟然變成一位精打細算o既師奶仔。好老實, 連我自己都好驚訝! 而家我位朋友覺得幸福o既係師奶佬而唔係我 :p

上個月約咗班敗婦人食飯, 十月份當然食蟹啦~ 上網見到有人去咗一間酒樓度食蟹, 隻蟹蓋仲大過佢塊面呀~~ 搞到我心郁郁要去食下, 提意去食蟹, 點知個個都話好! 一於去訂枱食飯~

坐低咗之後, 部長叫我地出去魚缸度揀蟹! 我未食過呢隻蟹, 唔知應該點揀喎.... 我地一行五人, 部長建議要一隻4斤重o既阿拉斯加蟹。當部長響魚缸度撈出唻時, 大家都O晒咀... 因為真係好鬼大隻!!

我地叫咗幾碟小菜, 一個湯再加一隻蟹... 埋單位位二百零蚊, 抵到爛啦~~

睇下~~ 個蟹蓋真係大過我塊面架!!!

秋冬滋潤湯水 『花膠螺頭燉雞』 (附食譜)

好耐冇煲番啖靚湯飲喇~ 而家天氣開始乾燥, 係時候燉番D滋潤湯水補一補。諗咗好耐應該煲咩湯水飲, 有成日時間可以整番盅靚燉湯。早前媽咪俾咗一舊已經發好咗o既花膠俾我, 一直都唔捨得用! (而家d花膠好貴呀~) 既然放咗響度咁耐, 師奶佬又話今年辦年貨時再買番d俾我,  咁就決定用咗舊花膠佢啦~~

原來燉雞只需要買隻雞殼就得。雞殼即係冇雞脾同雞翼, 價錢平好多架~


材料:

急凍響螺1隻

雞殼1隻

花膠1隻

瘦肉$10

桂圓2粒

淮山4片


做法:

1) 急凍響螺解凍, 雞殼洗淨, 連同瘦肉一齊汆水;

2) 將所有材料放入湯煲內, 倒入清水蓋過所有材料;

3) 另一隻大煲倒入清水, 煮滾後, 將燉湯煲放入;

4) 先用中小火燉煮30mins; 轉用小火燉煮2hrs;

5) 約1.5hrs後加入鹽調味。

小小心得:

a) 響螺出汆後, 用刀背刮走表面上黑色的污物, 打直切開一半後, 去除腸臟;

b) 煲雞湯用新鮮雞最鮮味, 但要帶出雞的鮮味, 需要加入瘦肉;

c) 乾淮山不用洗, 如有灰塵只需要用濕布輕輕抺走便可;

d) 加入桂圓可令燉湯帶有少許甜味;

大排檔經典菜式之『椒鹽豆腐』(附食譜)

出完差番唻, 麵包唔識搓、飯都唔識煮了~~ 過去的2個月實在太折磨人了... 在家的時間只有一半, 其中9日行程內坐了5次飛機... 真的很可怕!!

忙碌的日子總算結束, (當然未計番到OFFICE的FOLLOW UP!) 這兩星期一有空檔便到各大shopping mall血拼!! 錢花光光, 心情爽YY~

師奶佬話我好耐冇煮飯... 星期六煮咗味佢最愛的"豆腐"!  街外閒閒地六七十蚊一碟架~ 自己整材料都唔駛$10。


材料:

布包豆腐 2磚

指天椒 1隻

蒜頭 2粒

粟粉


調味料:

五香粉

鹽

乾蒜


做法:

1) 布包豆腐用水洗淨, 抺乾水份, 切成一口大小備用;

2) 五香粉, 鹽拌勻備用;

3) 蒜頭, 指天椒切粒備用;

4) 燒熱油, 豆腐沾上適量粟粉;

5) 用半煎炸方式把豆腐炸成金黃, 撈起瀝乾油份;

6) 倒掉油, 原鑊爆香蒜粒和指天椒;

7) 把已炸成金黃色的豆腐回鑊, 下調味料炒勻; 即成。

小小心得:

a) 用布包豆腐, 軟硬度較為適中;
b) 不吃辣的可不加指天椒/把指天椒的籽去掉;
c) 因蒜頭很易燒焦, 爆香時請留意火喉; 因燒焦的蒜頭帶有苦味;
d) 粟粉不要太厚, 否則便吃粉多過吃豆腐;
e) 油要夠熱才下豆腐, 否則粟粉吸了過多油份便會淋;
f) 煎炸完第一次, 瀝乾油份後再翻回鑊翻炸, 外皮便會香脆;

什錦麵包籃

我為麵包瘋狂! 自從學識手搓麵包之後, 真係一日唔搓包唔安落!! 雖然手搓麵包時間長, 又花氣力, 但係當見到一個個搓好o既麵糰發得肥肥白白, 送入焗爐後焗到金金黃黃, 心情真係好興奮! 成功感好大架~

屋企人各好喜好, 所以每次整親o既麵包總會有唔同口味! 細妹最愛腸仔包; 媽咪最愛提子/豬仔包; 老公就好易服侍, 乜包都o岩!

今次試咗個辮子包, 好鬼靚呀~~~