開胃小食 【酸青瓜】

細妹話天氣開始熱, 又潮濕, 最好食D酸may may o既o野…原本趕住出街, 但細妹落到order, 唔敢佁慢, 即刻仆落街買青瓜去也!!!

因為超趕時間關係, 只係整咗個簡易版! 唔駛20分鐘就搞掂!!

材料:

溫室青瓜6條

白醋

白砂糖

做法:

1)  準備好一個玻璃樽, 要先進行消毒, 瀝乾水份;

       2)  青瓜洗淨抺乾水份, 斜刀切件;

 

3)  白醋加白砂糖拌勻;

 

4)  待玻璃樽風乾後便將已加入白砂糖的白醋倒入玻璃樽, 加入青瓜件;
5)  把蓋扭緊後輕輕搖晃, 以拌勻白醋和青瓜件;

6)  放入雪櫃冷藏, 一至兩天便可食用。

 

  

小小心得:

a)  如果有時間的話, 將白醋預熱少許再加入白砂糖拌勻;

b) 如果有時間的話, 可將切好的青瓜用鹽醃一陣, 令多餘水份流出, 青瓜會更爽口;

c)  食得辣的可加入一隻紅尖椒, 酸酸辣辣仲好味;

 

健康調味料【鹽麴】 (附做法)

上個月去東京, 除咗買咗D煲呀~ 碗呀~ 碟呀~之外, 仲買咗好多食材番唻。不過就通通都未用… 唯獨呢個 – 「米麴」。其實「米麴」係咩唻o既呢!!?? 我初時都唔知, 淨係知道鹽麴同醬油麴。但原來鹽麴同醬油麴都係由米麴引申出唻… 而且仲可以自己整!  參考豪姐的post, 就著手開始整喇…

經過網上的搜查, 終於都知道多少少有關『鹽麴』o既背景。『鹽麴』係日本的傳統調味料, 上年開始『鹽麴』又響日本開始流行起來。有學者話『鹽麴』能夠促進健康, 仲可以養顏美容。全因為『鹽麴』係需要經過發酵而成, 經過發酵從而令到此調味料內有活菌, 使『鹽麴』能夠有養顏美容的功效, 而且味道比起普通食鹽更有層次。

既然『鹽麴』咁多功效, 而且製法簡單, 梗係要整番一樽唻試下啦~ 但早前去CitySuper同SOGO都搵唔到… 既然要去一轉日本, 就去東京掃番一,兩包番唻試下先~

材料:

乾米麴50g

水100g

鹽30g (視乎個人嗜咸的程度, 隨意加減)

消毒玻璃瓶一個

做法:

1) 先將玻璃瓶消毒, 風乾備用;

2) 將其餘材料量好份量後, 放入已消毒的玻璃瓶內;

3) 每日搞拌一下, 令材料充分混和;

4) 第7日後便收成, 放入雪柜保存, 可存放大約1個月

 

 

 

【物盡其用】炆冬菇蒂 (附食譜)

 

細細個已經知道婆婆能人所不能! 一個寡母婆湊大4個仔女, 自己拜佛茹素但也能夠煮出美味o既葷菜照顧家人, 滿足家人的口腹。婆婆係寧波人, 我同舅父們一樣係食上海菜長大, 所以對上海菜要求特別挑剔! 自從婆婆仙遊後, 每個人都對婆婆煮o既上海菜念念不忘… 可惜媽咪並冇得到婆婆的真傳…… 每次出街食上海菜, 個個都唔多滿意!! 為咗要食番婆婆煮o既味道,  我要努力! 憑我o既記憶同味道煮番一餐『婆婆的上海菜』俾舅父們懷念下!

記得有次我唔肯食飯, 婆婆拎咗一碟仔小食出唻俾我, 一試難忘!! 以前唔知係咩唻, 只記得個味道。後來媽咪話係「冬菇蒂」,  原來冬菇蒂都可以食架~~ 所以話呢… 我婆婆真係好叻!

為咗要整呢味炆冬菇蒂, 我足足儲咗大半年先儲到咁多!! 整完今次又要再儲過~

材料:

冬菇蒂

薑片
 

調味料:

蠔油

老抽

生抽

糖

鹽

胡椒粉

麻油

做法:

1) 冬菇蒂用水浸軟, 切去最頂部硬o既蒂, 然後再切幼條;

2) 凍油落鑊, 今次用LC 20cm round oven;

3) 薑切片落鑊爆香, 再把冬菇蒂下鍋炒至少少乾身;

4) 將調味料 (除生抽外) 下鍋, 加蓋炆煮30-45MINS;

5) 打開蓋, 加入生抽作最後調味, 再焗多5MINS;

6) 將已煮好的冬菇蒂倒出, 待涼後可放入雪柜保存1個月左右。

 

呢一大盤冬菇蒂, 可其壯觀!!! 淨係剪呢盤o野, 已經剪咗成個下午! 一路剪, 成間屋充滿住冬菇o既香味~

【消暑湯水】冬瓜肉碎榨菜湯 (附食譜)

上星期細妹湊咗堂家姐個仔 (嗯… 即係我侄仔!?) 過唻訓, 下午去咗沙田接佢, 行咗陣街再去埋街市買餸就返歸煮飯。咁樣搞一搞又冇咗大半日… 師奶佬就安安靜靜咁留響屋企溫書。番到屋企仲要幫個靚仔沖完涼, 氹埋佢訓覺先可以開始煮飯!! 坐低抖下o既機會都冇呀~ 仲辛苦過番工, 出差…

呢期出差出到暈… 搞到WEEKEND都唔想煮飯, 想偷下懶! 但眼見師奶佬少咗好多湯水, 就煲番個超簡單又好飲o既消暑湯啦~


材料:

冬瓜2斤

榨菜1個

碎豬肉$20

醃料:

糖

鹽

胡椒粉

做法:

1) 先將冬瓜去皮, 去籽洗淨後再切粒;

2) 榨菜洗淨後切粒;

3) 碎豬肉用醃料醃15mins;

4) 煲滾水後將所有材料放入煲內 (今次用LC 25cm Round French Oven)

5) 加蓋用小火煮20mins;

6) 加入鹽調味, 再焗多5mins, 即成。

第一次用LC唻煲湯 (嗯… 其實係滾湯!) 用最細火已經OK, 時間又唔駛太耐, 慳火又慳力! 下次試下用唻煲老火湯先~

和風一人前

上星期六我又自己湊仔!! 帶咗我個姨姪仔由尖咀坐船去中環, 再坐電車落金鐘。O個日真係好曬… 行行下佢竟然同我講「大姨, 超級熱呀!」哈哈哈~ 真係笑C我! 呢位小朋友, 人仔細細但好古惑!! 成鬼日都呃我, 又蝦我…

呃我事件一, 耐唔時同我講佢bu咗, 嘩~ 即刻高度戒備啦, 首先聞下有冇異味! 跟住再問多佢一次係咪bu咗, 佢竟然用好狡滑o既表情話”係呀!”, 跟住再問佢係咪講大話, 呃大姨, 佢又用番同一個表情講”係呀!”。真係俾佢吹脹!

蝦我事件一, 特登行得好慢… 要你抱! 問佢係咪蝦大姨, 佢會毫不掩飾地承應”係呀!”

連細妹都話「一個兇悍的大姨竟然俾一個2歲人仔蝦, 係一個奇蹟!」

原本呢個CP 17oval係買唻整豆腐花架嘛… 點知而家變咗做師奶佬o既專屬一人前餐具!!! 等我再敗多個17oval番唻先得!!

日本鰹魚湯拉麵+香煎咸三文魚

鰹魚湯底

鰹魚粉2湯匙

乾魚仔2-3條

日本醬油1湯匙

鹽少許

煎呢個三文魚, 最重要係煎到塊魚皮夠脆口! 油要多少少, 油溫唔好太高。

呢個一人前晚餐係師奶佬o既至愛!!

Le Creuset 26cm PINK buffet 【附蒜蓉豆豉蒸蟶子食譜】

響FACEBOOK個「全宇宙最毒的GROUP」度識咗一班志同道合的朋友仔, 好開心可以一齊SHARE下敗家o既心得同埋戰利品。最最最開心係可以一齊去敗家!!! P小姐係我第一個響個GROUP度識o既朋友仔, 佢… 風趣可愛仲有好多爛gag! 相識短短2星期齊齊相約去敗家兩次了~~ 真開心!

6月底去咗東京旅行, 出發當日竟然有LC special online sales (只限日本)…. 幸得P小姐相助, 我先可以敗到呢SET 超靚, 超好用o既26cm buffet同埋trivet! 日思夜想o既pink pink終於響上星期都到手喇~ 淨係睇相已經口水流… 而家已經到手, 直情想攬住佢訓呀!!

尋晚終於都同我隻pink pink 26 buffet開光喇~~ 為咗隆重其事, 點可以煮d咁普通o既菜呢!? 為咗要親身體驗下佢o既”無水蒸”威力,  買唻10隻蟶子… 整番味蒜蓉豆豉蒸蟶子!

材料:

蟶子10隻

豆豉1湯匙

獨子蒜 2粒

粉絲1包

調味料:

生抽

做法:

1) 蟶子洗淨, 去掉內臟, 用刷清洗外殼;

2) 獨子蒜切碎, 加入豆豉一齊壓爛, 拌勻;

3) 粉絲用水浸軟, 瀝乾水備用;

4) 26cm buffet搽少許油, 先放入粉絲墊底;

5) 再放入蟶子, 然後在上面加蒜蓉豆豉;

6) 舖好後加蓋, 用小火蒸大約10-15mins;

7) 上枱前加入少許生抽調味, 即成。

小小心得:

a) 放入粉絲後, 加入少少水, 因粉絲沒有足夠的水份就不能夠吸收海鮮的鮮味;

 

b) 10隻蟶子放入26cm buffet要放3層; 每放完一層就加蒜蓉豆豉;

c)  如果蒸完後, 加入少許蔥花再贊熟油, 會更加美味;



睇下… 26cm buffet原鍋上枱, 幾咁靚~~