敗婦聚會之驚喜的泰式晚餐 (附香檸焗鱸魚食譜)

上星期六又約咗兩位敗婦人上唻我屋企飯聚。敗婦人話想食泰菜, 開正我o個飯~ 好老實, 西餐我真係一d都唔在行! 淨係記d香料用落咩食材度都已經搞到我一頭煙... 都係亞洲菜比較有信心!  今次4條友 (加埋師奶佬) 總共煮咗4個餸, 開咗一小枝香檳+一枝白酒 (唔記得邊個送, 但桃味唔係我杯茶)。

cheers~~~

今次又試咗個新菜式 - 香檸焗鱸魚。真開心我班「試食敢死隊」成員又增多咗兩位。呢幾日d天氣真係又熱又焗, 下午出咗去九龍城買餸, 真係香汗淋漓!!! 一路行d汗不停咁滴, 仲勁過跳鄭多燕!!! 雖然又熱又攰, 之但係我又好enjoy買餸煮飯呢個過程。


材料:
鱸魚          1條

醃料:
南薑          1小舊
香茅          1枝
青檸          1個
檸檬          1個
檸檬葉      4-6片
粗鹽          大量

做法:

1) 鱸魚洗淨 (不要去鱗), 抺乾水份;
2) 南薑切小塊, 香茅切段, 青檸榨汁, 檸檬半個榨汁, 半個切片;
3) LC 26cm buffet 錫紙舖在上面, 放上一層粗鹽, 少許香茅, 3片檸檬和檸檬葉, 然後鱸魚放上面;
4) 在鱸魚肚內放入香茅, 南薑, 檸檬片; 在鱸魚身上放一層粗鹽,  3片檸檬和檸檬葉, 在放上餘下的南薑和香茅; 在淋上青檸汁和檸檬汁, 最後用錫紙包好, 醃1-2小時;
5) 焗爐預熱200度, 放入26cm buffet (不加蓋) 焗35mins;

打開錫紙時, 聞到陣陣的香茅和檸檬香味。



《同場加映 - 失驚無神嚇死你!! 》
話說當我響廚房煮緊o野時, 門鐘就響起, 媽咪幫我開口。我以為係細妹上唻搵我, 點知過咗幾分鐘都聽唔到人聲.... 好奇下就走出廚房睇睇啦~ 點知見到媽咪打開咗大門, 呆呆咁企咗響度... 而我就見到鐵閘出面有舊o野, 當我打開個鐵閘時, 淨係見到個喼但見唔到人... 真係俾佢地兩個嚇死!!!

我真好開心, 好驚喜!  好多謝呢兩位敗婦人送我呢份生日禮物。放心! 唻緊o既泰國同台灣之旅一定會敗d好物番唻同你地分享!!