2014年生日曼谷之旅 - W Bangkok

我同細妹生日相差不過幾日, 所以由細到大都會一齊慶祝。近呢幾年, 每逢生日細妹總會出國渡過... 而我地好耐都冇一齊慶祝。今年, 細妹大破慳囊出錢請埋我一齊去旅行!  原本想去大阪, 但因為我的「經費不足」, 所以最後決定改去曼谷。

出發前2日, 曼谷政局突然變壞!!! 出發前1晚仲提高旅遊警示至紅色, 雖然我地都係如期出發, 但因為我地搭夜機, 又唔知當地情況, 所以我拿拿聲打去W Bangkok叫佢地幫手安排車去機場接我地。

我地去咗4日, 基本上曼谷市面真係冇事。見唔到人示威, 見唔到軍人!  只不過商場同街舖8點關門, BTS最後一班車8點。我地為免同人迫同埋冇車番酒店, 呢幾日都8點前番到去。不過我地都見到有部份人夜晚11點幾12點先番到酒店。其實我本人覺得係新聞報導只focus 響某一d情況而己。

講開W Hotel, 我o既wedding shower同埋結婚出門都係響W Hotel。唔知點解我對呢間酒店有種情意結!  如果響我有生之年可以入住全世界o既W Hotel就好lu~~

今次 W Bangkok入住Wonderful Room, 但check-in時已被upgrade 去Spectacular Room。細妹話之前2次我帶佢入住香港W酒店係Marvelous Suite, 點解唻到曼谷會被downgrade!! (o個2晚真係可一不可再啦~)

W Bangkok位於商業區內, 入黑後週邊都幾靜下。不過交通都算係方便, 因為BTS Chong Nonsi站響正隔離, 行過天橋就到!  雖然唔係中轉站, 但去Siam站都只係相隔3個站, 都算係好方便。不過坐的士o既話就唔係太多司機知道響邊。

漆黑中的粉紅W, 大大隻! 唔怕搵唔到啦~

一入門口又見到大大隻W字

金屬門牌, 簡約得唻又夠晒型格!

床上面o既拳套, 好重泰國口味!

張床大到呢~~ 可以訓到3個人!!

一入房門就見到o既浴缸, 細妹日日都用佢架~ 但我自己就偏愛佢隔離浴簾遮住o既RAIN SHOWER。

呢部好似I-PAD o既平板電腦, 唔係用唻上FACEBOOK或者WHATSAPP, 佢係間房o既remote control, 控制間房o既燈光, 冷氣溫度, "請勿打擾", 接受酒店訊息同埋鬧鐘功能。

W的貼心服務真係冇得頂!! 泰國天氣炎熱, 每日都會準備5枝免費樽裝水響房。但要留意, 寫住"DRINK UP"係免費, 另外有一枝係要俾100THB。

免費o既TWG茶包, 有3種口味!日日都有refill架~


W Bangkok價錢其實同其他5星酒店差唔多, 而家做緊Promotion, 連續入住3晚加送1晚。我細妹有2位朋友跟埋我地一齊去, walk-in價仲平過我地買package!  (真係激死!!!)