再來米麴酵 (附詳細圖解)

呢期密密上堂, 學哩學路。時間好鬼充實!  以往放工後都會搓下包, 但早排天氣太凍, 成日坐響電視機前面, 攬住張毛毯就一晚... 而家天氣開始回暖, 又係時候搓番包。但見到個白神種好似處於半死狀態, 怕佢發唔起, 但又唔想掉咗佢喎~  一於拿拿林整多樽天酵, 到時「雙酵齊發」。

屋企仲有好幾包米麴, 真係要快D手用完佢。

 

 

第4日, 嘔好多泡呀~

第5日, 泡泡明顯已經減少。米麴已發脹及浮面。如果留心去睇, 嘔泡情況減慢, 好似熔岩咁, 耐唔耐有氣走出。

第7日, 所有米麴已經浮起晒, 泡泡都冇埋。而家D米麴脹卜卜, 會聞到陣陣咸咸地又帶有少少酒香味。

而家就可以隔渣, 開始做種喇。用剩的酵液可以保留於雪柜1星期左右。搓包時可以加少少。

用1:1酵液同高筋粉起種。放於室溫2小時至1-2倍大。

發至1-2倍大時, 酵種看似糊狀。


酵種要連續餵養3日, 才可做包。每次取出酵種後, 要用1:1份量續養。酵種先會長用長有。

睇得又食得「西瓜方包」

星期日約咗班谷友去上堂。繼上兩星期去咗學整「紅酒朱古力包」之後, 今次又唻新搞作 - 『西瓜方包』

 

真係好鬼得意架~ 拎住佢放入口, 以為食西瓜; 但其實係食緊一片有淡淡綠茶味o既方包。


今次幸得搞手敗婦P, 由出POST收生至確認付款, 只需短短16小時!!! 真係勁呀~  今次我地包堂, 總共有20人, 阿sir又鬼馬, 4小時o既課堂大家都上得好開心。

好壯觀呀~~~

呢個就係我o既成品喇~ 出爐時每個JM都好緊張邊個夠頂角, 邊個整o既西瓜紋最似。好不熱鬧呢~

阿sir專登將個方包切成「三角形西瓜」, 真係好似囉~~

 

紅酒朱古力包 (附食譜)

上星期情人節, 同師奶佬簡簡單單地響屋企茶餐廳食晚飯, 跟住屋企睇碟渡過。但我都買咗扎花送俾佢。無錯! 係我買!  哈哈哈...

星期日約咗班包友去整包, 難得師奶佬又放假, 當然叫埋佢去啦~ 俾佢試下自己搓包。響出面搞到成枱成地都係唔駛我執嘛~ 

手搓包方法有好多, 每個人總有自己一套搓包方法。上過唔同麵包堂, 每個導師都有唔同手法, 焗出唻o既效果大致上都差唔多。我覺得只要自己覺得舒服, 順暢, 點搓都唔係問題。不過最緊要係唔好搓到斷晒筋 :p

導師講解得非常生動有趣, 每個步驟除咗言語上講解之外, 仲加埋生鬼o既動作表情。輕輕鬆鬆就上咗3粒鐘。

第一次落手落腳去搓包, 睇唻都有姿勢有實際喎~

右邊呢個係師奶佬o既成品; 左邊呢個係我o既成品。

呢個食譜真係好簡單, 以後又多款麵包揀喇~

材料:

高筋粉          200g
糖                  10-20g
鹽                  2g
即用酵母      4g
牛油              8g
紅酒+水        120g
朱古力碎      30g

做法:

1) 除朱古力碎外, 所有材料拌勻搓成不黏手的麵糰;
2) 加入朱古力碎再搓勻;
3) 初發45-60mins;
4) 拿出麵糰後, 排氣, 捲成長條狀;
5) 末發45-60mins;
6) 焗爐預熱180度15mins;
7) 入爐前, 用界刀在麵糰上界上一, 兩刀;
8) 放入焗爐焗20-30mins;

P.S: 紅酒和水的比例, 可按照個人口味調較。

Buffet @ Cafe Hyatt

上星期相約咗半工讀時認識的同學仔食飯, 我地十次有九次都係打邊爐, 但呢大半年因為有個大肚婆, 所以就捨棄十下十下, 改食其他o野。一行8人最後決定去食buffet! 原本打算book Clipper Lounge @ Mandarin Oriental, 但係o個度只offer 4人枱, 如果我地8個人就要分開2張枱... 明白o既~ 想環境寧靜d嘛!  一大班人肯定嘈, 影響到其他客人, 再者我地個個"大聲公托世"! 後尾同學仔A提議去Hyatt試下。

而家buffet價錢真係一d都唔平, dinner buffet 起碼5百蚊以上... 所以食物質素係最重要!! 消費者俾5百蚊一位, 當然會有番咁上下期望啦~ 不過 Café Hyatt真係冇令到我地失望。

冷盤 - 雖然冇生蠔, 但有龍蝦仔、裴翠螺、大大隻龍蝦開邊、已去殼的凍蝦、青口、蟹腳等。

最正係有燉湯! 蟲草花圓肉瘦肉湯。冇味精, 我飲咗2大碗!

甜品 - 雖然唔係自助, 但見到成個廚柜放滿晒一小杯、一小件甜品, 真係睇見到開心呀!

因為本人食buffet係唔食熱熏, 所以就冇得評論喇。但同學仔匯報話熱熏都好出色。呢間buffet可以再encore!

【止咳湯水】鱷魚肉川貝淮山百合瘦肉湯 (附食譜)

而家D天氣真係變幻莫測!! 上星期熱到成廿幾度, 前日竟然跌至11, 12度... 真係唔病都變病呀!  本身已經咳到甩肺, 再加上咁o既天氣, 簡直係加重我o既病情呀!!! 已經睇咗2次西醫, 朋友又介紹飲蛇膽川貝末, 中、西藥雙管齊下。希望可以快d好番!!!

記得早排辦年貨時, 買咗包鱷魚肉乾。聽聞鱷魚肉有止咳、補肺益腎同埋治療哮喘o既功效。見星期日冇o野做, 一於煲唻試下。原本諗住煲海底椰, 但去藥材舖, 醫師話加川貝同百合最好。

材料:

鱷魚肉乾          2兩 (約1.5塊)
川貝                  3錢
淮山                  1兩
芡實                  1兩
陳皮                  1角
南北杏              少許
蜜棗                  2-3粒
瘦肉                  1斤

做法:

1) 川貝、淮山、芡實、南北杏洗淨備用;
2) 瘦肉汆水, 洗淨備用;
3) 薑片和鱷魚肉乾一齊汆水, 洗淨備用;
4) 凍水將所有材料下鍋, 大火開蓋滾30mins;

5) 加蓋後改用中小火煲1小時, 下鹽調味即成。

媽咪話之前煲鱷魚肉湯時有腥味, 咁我就試下用薑片將鱷魚肉乾汆水, 去腥味。原理同牛腩一樣。出唻效果非常之好, 個湯一d腥味都冇, 仲好清甜。

虛不受「賭」

話說1月時我真係黑仔到暈! 但一過咗年三十晚, 好事齊來! 但原來我受唔起... 一連兩晚贏咗錢, 之後就病到死... 年初三去完馬場後, 就開始咳!!!

年初二的「大三元」

年初三係我咁大個女第一次入馬場, 當然要買番份「專業」扮下o野啦~

雖然係大熱, 但都係一個好開始!

由第7場開始買到第10場, 唔算贏好多!

唉....贏埋都唔夠我俾錢睇醫生!!!

年初一開年飯 (附蒜仔香芹炒雞食譜)

祝大家馬年進步、身體健康!! 話說過年前我真係黑仔到暈... 但一過咗年三十晚就好運連連~

年初一"特赦"可以回歸廚房;

年初二打牌贏咗舖大三元;

年初三跑馬仔又贏馬!

YEAH~~ 真係好運齊來呀!


冇錯! 李太終於可以回歸廚房喇~~ 因為師奶佬再頂唔順日日都出街食, 為咗隆重其事, 我就響大年初一開爐~

今年有菜、有魚、有雞、又有蝦! 仲有「發財好市」! 真豐富呀~

 

過年前政府大舉殺雞, 搞到又一次過年冇新鮮雞食...  唯有退而求其次, 買冰鮮雞啦~ 細妹指明話想食「蒜仔香芹炒雞」。呢味餸... 好多年都冇食過, 以往都係麻麻或者媽咪煮。


材料:

冰鮮雞          1隻
蒜仔              8棵
香芹              5棵
乾蔥              3粒
蒜頭              4粒
薑片              4片

調味料:

蠔油
糖
鹽
生抽

醃料:

糖
鹽
胡椒粉
麻油
魚露
老抽


做法:

1) 將雞件洗淨後, 瀝乾水份, 用醃料醃大約1小時;
2) 蒜仔、香芹洗淨, 切段備用 (蒜仔頭用菜刀拍扁); 乾蔥、蒜頭去外皮, 備用;
3) 燒熱油鑊,  下乾蔥、蒜頭、薑片、蒜仔頭爆香;
4) 下雞件炒至8成熟後盛起備用;
5) 下蒜仔和香芹炒香, 把雞件回鑊炒勻;
6) 下調味料炒勻即成。