自家賀年食品 《腰果酥》

呢期失業，可以有多D時間準備新年o既o野。上年新年因為意外搞到俾師奶佬禁足廚房，今年點都要整番蘿蔔糕、芋頭糕同年糕。但睇一睇個日曆，原來時間已經無多⋯⋯

上兩星期去咗上堂，一路都有追KC個FACEBOOK PAGE，見佢呢排開咗幾班教整賀年食品。我好鐘意食合桃酥，見佢有班教腰果酥，即刻報名！
原來OL都有份教架～我由YAHOO BLOG已經開始追佢個BLOG，好開心可以上佢o既堂。呢個腰果酥就係OL o既食譜喇！材料簡單，做法簡單。可以話係零失敗！

早幾日同屋企人食飯，一於整D唻送俾親戚食下。用咗半日時間整咗差唔多一百塊！

材料有：低筋粉、砂糖、泡打粉、梳打粉、粟米油、雞蛋。（呢個酥餅底，可以配其他果仁，例如合桃、花生、杏仁等等）

所有材料混合晒之後，搓成小圓形，輕輕壓扁，上面放腰果，掃一層蛋漿就入得爐喇！

放入焗爐大約15分鐘，焗至表面金黃色就得lu~

P.S: 最後5分鐘一定要留意住，如果唔係就好易燶晒。


諗住改良下，加入蜜糖或者麥芽糖。

My 1st Bday cup cake (附蜂蜜海綿蛋糕配檸檬奶油餡食譜)

我的好友K小姐1月初生日, 但今年因為我要去大阪旅行而無暇出席佢o既生日派對。所以響12月底同一班朋友BBQ時, 我專程整咗個CUP CAKE 送俾佢。順便搵人做"白老鼠" :p

原本係諗住整一個8吋大蛋糕, 但搵唻搵去都搵唔到我之前買番唻o既蛋糕盒... 唯有放棄改做cup cake啦~ 點知當我整完cup cake之後, 竟然俾我搵番個8吋蛋糕盒!! 真係激死我呀~

蜂蜜海綿蛋糕  (這個份量大約可以做到16個cup cake／10吋圓形蛋糕模)

麵糊材料：
蛋黃          6個 （必須要冰凍的）
細砂糖      30g
蜂蜜          50g
牛油          25g
牛奶          25g
低筋粉     130g

蛋白霜材料：
蛋白          6個
砂糖          6個
檸檬汁      1茶匙

做法：
1) 把蛋黃和蛋白分開，蛋白不能沾有蛋黃，水份或油脂）；
2) 低筋粉過篩；牛油座熱水至溶；
3) 蛋黃和細砂糖用打蛋器拌勻，加入蜂蜜再打至顏色微微泛白；
4) 加入牛油溶液拌勻；
5) 把牛奶和低筋粉交錯倒入麵糊內，快速地拌勻（以免低筋粉起筋，影響蛋糕的口感）；
6) 另一大碗加入蛋白，用電動打蛋器用低速打至微微起泡，加入檸檬汁和將砂糖分2-3次倒入蛋白內，用高速打至企身（尾端成挺立狀）。
7) 將1/3蛋白放入麵糊內，以切拌方式輕輕地拌勻，然後再倒回麵糊內拌勻；
8) 焗爐預熱180度15分鐘；
9) 在紙杯模上掃上牛油，把麵糊倒入至8成滿；放入焗爐內焗15-20分鐘；

10) 焗完後待涼，這時便可開始做檸檬奶油餡。

檸檬奶油餡:

材料:
檸檬汁          1大匙
無鹽牛油      60g
糖粉              4/3杯

做法:

1) 無鹽牛油室溫放軟, 用手動打蛋器打至乳霜狀;
2) 糖粉過篩後和檸檬汁一起加入牛油內拌勻;
3) 將已拌好的檸檬奶油餡放入唧袋, 放入雪柜冷藏3-4小時;


用最細的唧咀，把檸檬奶油餡唧入蛋糕內。

簡易肉醬意粉 (附食譜)

呢個星期我同師奶佬見面的時間加埋都唔超過3小時... 我準備訓覺時佢先番到。早幾日仲以為佢會放早D番唻食個飯, 我響街市度買咗2隻新鮮雞脾, 諗住整俾佢食。點知7點幾打番唻又話要夜D先番...  我明白, 工作要緊嘛~ 但可憐o個2隻新鮮雞脾... 最後又係變咗雪藏貨。

自己一個人, 晚餐真係唔知煮咩好... 又要方便、又要做埋lunch box!  突然間記起屋企有幾包意大利粉, 一於整個肉醬意粉!

材料:
新鮮蕃茄          4個
雜豆                  1/4 磅
碎豬肉            
意大利粉          1包
Mozzarella Cheese

醃料:
糖
鹽
生抽
胡椒粉

醬料:
蕃茄意粉醬      2大匙
蕃茄醬              4大匙
糖                      2茶匙
鹽                     少許

做法:
1) 大鍋內煮滾水, 加入少許鹽和橄欖油, 把意粉煮大約8分鐘 (按包裝指示減少1-2分鐘)
2) 碎豬肉加入醃料, 醃大約30分鐘;
3) 蕃茄切碎備用;
4) 撈起後馬上過凍水, 瀝乾水後倒入少許橄欖油拌勻;
5) 鍋內加入少許橄欖油煮滾, 加入碎豬肉炒至半熟; 撈起備用;
6) 放入蕃茄碎, 加少許水炒至軟爛;
7) 把雜豆、半熟豬肉加入炒勻;
8) 醬料加入炒勻即成;
9) 把意粉放在可入焗爐的烤盤內，上面舖上剛炒好的肉醬意粉和Mozzarella Cheese；
10) 焗爐預熱180度15分鐘，然後把烤盤放入焗爐焗5分鐘至表現的Mozzarella Cheese溶掉便成。

P.S: 我通常有時間就會整定D肉醬放響雪櫃，有時師奶佬放工番唻都可以隨時有好o野食。

鹽漬檸檬 (附做法)

而家每日番工對我唻講都係一種折磨... 越唔想做份工就越冇心機去做。我阿頭先搞笑, 每次俾o野我做都叫我自己上去server度搵番份文件出唻, 問佢save響邊度, 佢就叫我自己搵下。 我唔係冇時間, 但問題係你自己save o既文件, 你叫我自己搵!? 雖然我而家暫時唔係好忙, 但都唔好咁對我! 又例如上一手o既o野, 你可以問番我, 但唔好suppose我係乜都知!

上星期五, 份文件有一個字串錯咗, 即刻俾VP捉咗入房訓話。我知, 做錯事係應該要俾人話, 但如果係咁o既工作模式, sorry 我頂唔順! resign letter已經準備好, 我要逃離呢度!!!

心情唔好, 要做番令自己開心o既事! 除咗shopping之外, 廚房可以話係我o既避難所。入到廚房搞里搞路心情自自然然開懷。

上星期無無聊聊閒遊於網絡世界, 遊到Carol o既blog見到佢用心為家人調製o既美食, 覺得好幸福。我好鐘意預先準備好一大堆o野, 要用o既時候就隨手可得。所以我好鐘意做醃製品, 每次做一樽, 等待成果o既時間係最開心!  但可惜我屋企廚房空間有限, 唔可以有太多儲存太多, 所以只好揀選常用o既去做。

鹽漬檸檬  (參考Carol 胡涓涓)

材料:
玻璃瓶      1個
檸檬          3個
鹽              80g (檸檬重量的15-20%)

做法:
1) 玻璃瓶先消毒, 涼乾備用;
2) 檸檬先用刷去掉表面的臘, 抺乾, 切薄片;
3) 先放少許鹽在底層, 然後放上一層檸檬, 一層鹽; 再一層檸檬, 一層鹽;
4) 直至檸檬放完後, 最後響頂層再放上鹽, 蓋上蓋子;


5) 放陰涼地方醃製最少15日, 每日要轉動一下瓶子, 待每片檸檬都與鹽混合;
6) 室溫可保存1個月; 放入雪柜可保存1年;

 

第二日d檸檬汁已經出晒唻。



「鹽漬檸檬」原來響日本已經好流行, 可能因為日本人都好鐘意天然o既食材, 而呢個「鹽漬檸檬」就o岩晒! 仲有本書專門介紹呢個「鹽漬檸檬」。

 

因為佢係一個好天然o既調味料, 可以用唻做沙律、醃肉、醃魚、炸雞o既調味等等。好似仲話有減肥效果!

我要耐心咁等多10日... 到時用唻炒下肉試下。

焗蕃薯棉花糖 (附食譜)

而家每日番工都度日如年... 一來唔習慣新公司o既工作模式; 二來好清閒; 三來同事間冇溝通, 唔講o野, 可以打發o既時間可以話係零!!!

其實我都好爭扎係咪應該要離開... 因為番呢度有個好處就係唔忙, 唔駛點出差。仲有就係準時放工, 番屋企又近!!  唉....好矛盾, 好爭扎!


心血來潮想整個甜品。早排FB瘋傳o既呢個甜品, 我到而家先整。會唔會太out呢~

材料:

日本甜蕃薯  1隻
棉花糖          10-20粒 (細)
牛油              15-20g

做法:

1) 日本甜蕃蒸熟, 去皮; 牛油用熱水座溶;
2) 焗爐預熱180度, 15分鐘;
3) 用义壓爛日本甜蕃薯, 加入已溶化的牛油拌勻;
4) 放入碗仔內輕輕壓實;
5) 放上棉花糖;
6) 放入焗爐焗至棉花糖表面金黃色即成。


師奶佬好欣賞呢款甜品....  不過食完真人好飽!

安靜得令人可怕的辦公室 (附自家製士多啤梨果醬食譜)

去完旅行番唻, 不經不覺已經2星期, 但我靈魂仲滯留響大阪......

上星期開始番新工, 直到今日已經第7日。我本身適應能力都好強, 但唻到呢間公司... 我真係完全唔適應!!

1) 公司將不同部門分開不同o既大房;
2) 同事除咗公事之外, 係冇任何交流。(even朝早見到面, 都只會係點下頭。我已經好主動地講早晨, 但得到o既反應都係....);
3) 公司環境安靜得似自修室, 冇人講o野, 冇電話響。只有輕輕的打字聲;
4) 食lunch各人返各人座位食; 食完lunch後有人會訓覺; 有人會上網; 但冇人會同其他同事溝通;
5) 左右隔離同事放假冇人會知;
6) 放工時大家會默默地拎袋走人; 試過番工第二日, 全間公司得番我同另一個同事我都唔知, 最後o個位同事走唻問我收工未 (以為佢關心新同事) 原來係佢都差不多要走, 如果我未走的話我要熄燈, 熄冷氣; 但當時只係6.03pm....

雖然工作時間應該專心工作, 但同事係你每一日對得最耐o既一班人... 點解可以係咁呢?  我係一個幾鐘意講o野o既人, 響呢個咁o既工作環境, 我唔知可以捱幾耐!!!


早前我嬸嬸送咗兩盒日本士多啤梨俾我, 但放咗2星期都冇時間食。諗諗下唔好浪費, 一於試下整樽士多啤梨果醬。

我參考咗肥丁個做法

材料:
士多啤梨          330g
冰糖                  130g
檸檬汁              30ml

做法:

 

1) 玻璃容器先用熱水消毒, 涼乾備用;

2) 士多啤梨去蒂, 然後切開4份;

 

3) 將冰糖和檸檬汁加入已切好的士多啤梨拌勻; 放置15分鐘待冰糖有少少溶化;
**根據肥丁的食譜, 因為士多啤梨比其他生果多水份, 果醬顏色會因為氧化而變色, 所以先用冰糖同檸檬汁醃下一陣, 可以防止氧化。**


4) 預備一隻小鍋, 倒入所有材料用中小火煮滾;
5) 期間不停輕輕攪拌, 因為糖很容易會煮焦;


6) 煮至滾起時會產生很多汽泡, 這時便要把汽泡撈起;

 

7) 10-15分鐘後會開始濃稠; 大致上已經完成;

8) 熄火後馬上放入玻璃容器, 蓋上蓋後馬上倒轉放置;

9) 待涼後便可放入雪柜存放。


網上有不同的方法去測試果醬是否已經完成, 我用了最簡單的方法:
一隻杯放滿冰水, 然後滴一滴果醬落去, 如果直接沉底便等於已經煮好; 若果途中散開溶化, 便要再煮多3-5分鐘。

大阪美食

自己一個人去旅行, 最苦惱o既問題就係「食」!因為人得一個, 胃又係得一個... 食得到幾多o野呢~ 所以呢2次我去大阪, 我通常都係去高島屋或者大丸supermarket買壽司番酒店慢慢嘆。雖則我唔多介意自己一個人入餐廳食, 但問題係入到去見到個餐牌乜都想食。叫一、兩碟自己食, 但見隔離枱叫到成枱都係... 不是味兒!

買番酒店食有個好處, 就係買多咗都可以放入雪柜留番聽晚食。而且食幾耐又冇人理你, 食到一半執下戰利品又得!  雖然有人會話 "你咁早番酒店? 浪費晒d時間, 去日本梗係行耐d啦~" 但我覺得去旅行應該係放慢腳步, 每日咁行法唔攰咩~ 咁辛苦不如唔好放假, 上班去吧! 

好彩今次行程有2日晚餐都同朋友&她的家人一齊食飯, 所以都食咗唔少好o野!

單單一個麵包都落足心機。

 



我好鐘意食炸串。呢間店仔係響心齋橋d橫街度, 係無心插柳下搵到, 除咗炸串, 仲有提供前菜, 沙律。不過就冇拉麵/烏冬同飯提供。

唔講唔知, 原來食炸串沾o個兜醬汁係唔會換架, 所以每次只可以沾一次。如果食咗一啖唔夠的話, 可以用餐廳提供的椰菜沾d醬落去, 但千萬千萬唔可以沾第二次! 冇人想食你口水尾, 而你都唔想食人地o既口水尾架~ 

酒店隔離有間family mart, 我通常都會番酒店前去買d o野飲或者小食。夏天時我買咗盒西瓜汁, 好清甜。今次冬天, 我試咗呢隻士多啤梨酒。我本身好怕飲士多啤梨味o既飲品, 但因為「期間限定」呢4個字, 我決定買唻試下!  一打開, 見到係粉紅色o既液體, 心諗唔會人藥水味卦~ 聞落又冇... 飲咗一啖, 好好飲! 好香o既士多啤梨味, 酒味唔濃!

 



日本人好鐘意食布丁, 又係響family mart度見到... 第一日買咗唻試, 點知食上癮! 日日番酒店前都要去買番個食。

響大阪o既最後一晚, 我決定豪氣d買盒長腳蟹, 肥美o既拖羅同一盒靚靚壽司番酒店慢慢嘆!