Elegant Floral Cupcakes Decorating Class @ Playground

4月份又係繁忙日子o既來臨!!! 隻腳整親都要出差... 所以話呢~ 打工仔份糧真係有血有汗架!!

臨出差前同朋友K小姐去咗玩cupcake decorating, 呢期好興cupcake而且上面o既裝飾真係越唻越真實。見去上開堂o既studio又有班上, 一於去玩下!  當日得我地兩個人, 好似包堂咁, 好爽~
今次教咗4款糖皮花。

呢朵玫瑰花, 整咗成粒鐘架~~ d花瓣係逐塊痴。

呢朵唔記得係咩花, 簡單, 加埋銀色糖粒做花芯, 即刻高貴晒!

呢朵係mini 板, 用咗珍珠色糖粒做花芯。

呢4朵玫瑰花仔, 做法超簡單。加埋d葉做襯托, 好靚呀~



原來呢d糖皮, 如果保存得好係可以keep好耐架~ 我準備去年$12店買d透明display盒仔番唻安放佢地。

2014年4月份 LC開倉

今年Le Creuset開倉由往年o既3月份延至4月份, 其實農曆年後有好多人都問幾時問倉, 直到3月中有人放聲話今年無開倉... 搞到好多人都認為因為上次o既事令到Le Creuset怕怕。  之不過, 做生意o既人邊會理得咁多閒言閒語, 八婆o野~ 最緊要有錢賺!  當大家擔心緊冇開倉, 冇得掃平貨時, Le Creuste已經寄出咗invitation card喇~

好老實, 經過上年9月份o個一役, 真係諗唔到仲有咩好買!!! 師奶心態 "不買白不買, 都係要去睇睇o既!"~ Pre-Sales當日因為係平日關係, 我請唔到假, 幸得好敗婦幫我掃咗些少o野~

Dijon色o既trivet。好靚啊~

粉藍色oven glove, 只得一隻色。



正當我諗住weekend去開倉八卦下o既時候, 點知飛來橫禍.......... 響屋企撞親隻腳趾尾, 原本都以為冇乜事, 點知訓醒覺又痛又腫!  走咗去醫院照完X光, 如果冇乜事就去睇跌打。點知隻腳趾尾骨裂咗!!! 唉.... 雖然唔駛打石膏, 不過要著住隻"滑雪鞋"同埋撐住枝拐杖!!!!  都打定輸數冇得去開倉.... 但師奶佬竟然自告奮用地話陪我去!!! YEAH~~

今年開倉, 秩序係好咗好多。但貨品選擇比上年少!

 以上o既東東絕大部份都係代朋友買架~

我只係買咗3件o野咋~


 原本想買個大o既crock用唻放tools, 因為屋企o個隻crock實在太細 (其實係我太多廚具), 呢個mug大得唻剛剛好!!!

我家廚房又增加咗d色彩喇~

【袪濕湯】粉葛鰂魚扁豆赤小豆瘦肉湯 (附食譜)

尋晚真係嚇死人!!! 無啦啦橫風橫雨, 又行雷閃電... 細妹8點鐘度打唻問我有冇飯開, 話由青衣出緊唻。過咗十零分鐘, 打唻話青衣落雹.... 佢都嚇到三魂唔見七魄咁。淨係話要遲D先番到唻!  我等咗半粒鐘再打俾佢, 就話慢駛緊... (因為冇油!) 差唔多9點幾先唻到! 一入到唻就抖晒大氣話"唉... 好彩安全到埗"  我仲問佢做乜唔影低d雹同埋執番幾粒番唻俾我睇。即刻俾佢鬧我我上天!!!

跟住成晚電話響不停, 朋友們個個都爭相SEND d 片同埋相唻... 最得人驚係又一城同九龍塘站! 一個搞到水舞澗咁, 一個就水浸到可以游水咁... 搞到全城惶恐, 好似世界末日打到唻!!!
雖然我安坐家中, 但聽到出面d行雷聲同救護車聲, 自己一個人響屋企都幾驚架~


原本諗住今日焗曲奇, 但又心癢癢想煲湯... 而家最多人煲o既湯一定係粉葛!  袪濕嘛~
去到街市買完粉葛, 行去買鮻魚, 點知冇~~ 好在魚檔老闆夠醒目, 知道我買鮻魚係煲咩湯, 佢話鰂魚煲粉葛都得架! 如果唔係我就唔落魚, 佢又冇咗單生意。

材料:
粉葛       1大個
鰂魚       1大條
扁豆       少許
赤小豆   少許
陳皮       1塊
蜜棗       2粒
薑片       3-4片


做法:
1) 瘦肉汆水, 洗淨; 赤小豆和扁豆用清水洗淨; 陳皮浸軟;
2) 鰂魚洗淨後抺乾水份, 魚肚內灑上少許胡椒粉;
3) 大煲煮滾水, 加入已汆水的瘦肉、赤小豆、扁豆、已浸軟的陳皮和蜜棗; 大火煮滾;
4) 燒熱油鑊, 爆香薑片後放入鰂魚;

5) 慢慢將鰂魚煎成兩面金黃色;

6) 將已煎好的鰂魚撈起, 輕輕放入湯煲內;
7) 從湯煲中取水1碗水, 衝落煎魚的炒鑊內, 攪拌一下, 然後把湯連同魚的精華一同倒回湯煲中;
8) 大火煮1小時, 加蓋後改為中小火煮1.5小時;
9) 最後加鹽調味。

【滋補燉湯】蟲草花雞脾瘦肉燉湯 (附食譜)

好耐冇煲湯喇~ 師奶佬最鐘意飲湯, 佢簡直係「湯怪」! 每次煲湯, 佢最起碼飲成4-5碗... 所以屋企個湯煲要夠大!!! 過年前, 我最心愛o既湯煲因為一次意外而報銷咗... 好彩我用credit card積分redeem咗一個靚靚湯煲。

話晒都係生日飯, 點可以煲湯咁單調呢~ 今次整個燉湯俾師奶佬飲。又可以出動我對靚靚湯盅!


材料:
蟲草花
新鮮雞脾
瘦肉


做法:
1) 蟲草花浸軟, 約5-10MINS;
2) 新鮮雞脾去皮, 去肥膏, 洗淨備用;
3) 瘦肉汆水, 洗淨;
4) 將所有材料放入燉盅, 加入凍滾水;
5) 大火燒滾水, 放入燉盅; 先用大火煮1小時, 後改用中小火燉煮2小時;
6) 燉煮1.5小時後, 打開始蓋加少許鹽。

個湯好清甜... 師奶佬一打開個盅蓋, 飲咗一啖湯, 即刻歡呼!  因為實在太美味了~~

 

 

P.S:我已經盡量去晒D肥膏, 但都仲係有唔少雞油浮面。下次唔用雞脾, 改用雞殼燉。

日本人氣店 「一蘭」

星期一請咗假陪師奶佬, 佢話不如去試下「一蘭」。雖然我唔多鐘意食, 但見師奶佬興奮個樣, 我就捨命陪君子啦~  可能係平日關係, 而且又過咗LUNCH TIME, 所以唔算係好多人排隊。

我地等咗大約20分鐘就有位

其實我不嬲都唔好豬骨湯底, 可以話係抗拒!  可能之前食過一碗豬骨湯拉麵, 係超級油膩, 非常重味精。我連豬軟骨都唔鐘意食.... 好彩呢度可以揀埋湯底o既油膩度, 呢個真係非常之讚!  雖然唔知道佢寫o既"清淡油膩度"有幾"清淡"....

好老實, 碗麵一唻到, 我都怕怕地.... 因為見到個湯都唔係話好"清淡"。試咗啖湯..... 好OK喎~  我最鐘意係佢個麵底, 正!!!! 义燒就肥咗D, 不過好薄。令我諗起打邊爐o個d肥牛, 哈哈哈! 不過點解冇筍架~~ 我最鐘意食拉麵有埋d筍絲同埋栗米粒... 呢個要改進一下。

以後食豬骨湯底拉麵, 我只會唻呢間。

蒜泥白肉 (附食譜)

又一道師奶佬最愛的菜式。佢每次食完, 我都唔俾佢行埋我5步範圍之內, 因為佢陣蒜味實在太~太~ 太勁喇!!!

不過食蒜頭真係好有益架~
- 可以抑制/預防癌細胞生長及心臟病、
- 有助保持血管暢通、提高免疫力、殺菌
- 降膽固醇、血脂
- 天然坑生素
**以上好處, 都係因為蒜頭內的蒜辣素 (allicin)的作用。不過蒜頭切好後, 要擺放一陣 (約15mins) 先用唻煮餸, 咁樣蒜辣素先會釋放出唻。**

其實整呢個蒜泥白肉真係唔簡單呀~ 材料唔多, 不過處理過程都幾多。


材料:
五花腩
花椒
八角
蔥頭
薑片
紹興酒
蒜蓉
指天椒
蔥花
白芝麻

青瓜
鹽

醬汁:
辣椒油
花椒油
生抽
香醋
糖
麻油

做法:
1) 五花腩先洗淨;
2) 將花椒、八角、蔥頭、薑片、紹興酒及1大碗水放入大鍋中, 然後放入已洗好的五花腩;

3) 用小火煮滾後, 加蓋焗5-10mins; 留起小量煮豬肉水備用;
4) 五花腩撈起待涼後, 放入雪柜1小時;
5) 準備另一小鍋, 生抽+小量豬肉水+糖放入小鍋中, 用小火煮至糖溶化後, 加入麻油、香醋、辣椒油及花椒油, 最後加入少許蒜蓉煮滾, 熄火待涼;
6) 從雪柜中拿出五花腩, 切薄片;
7) 青瓜切成絲, 用鹽醃5mins, 榨乾水份後放於碟底備用;
8) 上枱前, 先加熱五花腩; 再舖在青瓜絲上, 灑上蒜蓉、蔥花和白芝麻;
9) 吃時, 沾上煮好的麻辣油。

師奶佬生日飯 (附土匪雞翼食譜)

Happy Birthday to 師奶佬!!

星期日係師奶佬o既生日, 所以星期六我就響屋企安排咗個pre-bday dinner。所有餸都係師奶佬o既至愛 - 土匪雞翼、蒜泥白肉、清酒煮蜆、蟲草花雞脾瘦肉燉湯。仲加埋個心形蛋糕o添~  o個日由朝整到晚, 企到腳都軟埋... 但見到師奶佬咁開心, 乜都抵番晒啦~~

原本係諗住整豉椒炒蜆, 但師奶佬將我隻不銹鋼鑊拎咗去迷你倉... 好彩屋企長期有枝清酒。所以話呢~ 好多時我買定D材料, 係絕對有用架! 雖然個廚房經常性爆滿...


「土匪雞翼」係師奶佬去某一間食店必點o既, 但我成日都覺得幾廿蚊得3隻, 真係好唔抵! 今次終於都決定整一次俾師奶佬食。材料非常之簡單, 做法更都非常之方便。


材料：
雞翼   10隻

醃料:
孜然粉
黑椒粉
胡椒粉
糖
魚露
生抽
黑芝麻

做法:
1) 雞翼洗淨, 抺乾水份後, 加入醃料 (除黑芝麻外)醃2小時;
2) 錫紙舖於烤盤上, 放上已醃好的雞翼;
3) 焗爐預熱200度15分鐘;
4) 把黑芝麻及孜然粉灑於雞翼面;
5) 放入焗爐, 用200度焗20-25MINS;

P.S: 若想雞翼表面香脆, 最後3-5MINS可關掉下火, 只用上火烤焗雞翼表面。