大阪7日6夜之旅 - Day 4 嵯峨嵐山

幾年前去大阪時其實plan 咗去嵯峨野, 但因為當日訓耐咗 (仲要係訓到下午12點先起身...) 所以就冇去到。所以今次再唻大阪, 無論如何我都要去嵯峨野!  但因為一月份小火車唔開, 所以我就冇去到太入o既地方。

我先由酒店出發, 坐御筋堂線至新大阪。去到JR新大阪駅就去票務處買JR嵯峨車票單程840円

由新大阪JR至京都JR駅, 然後就轉乘山陰本線 (33號月台)至嵯峨嵐山。

 

JR京都駅, 第33號月台前有個路線表。我張車票只可以坐普通車, 其實快速車都唔係快好多, 都係快5分鐘左右。所以我覺得無需要再俾多D錢。

 



我由酒店出發至嵯峨嵐山駅大約2小時。

 上到去已經見到大大個指示牌, 所以唔駛怕唔知行邊個方向。基本上唻得嵯峨嵐山o既都會由天龍寺/竹林開始。所以跟大隊就冇錯!

 

 落到地面, 右手邊就係竹林方向。

 

 途經有一間小小o既寺廟。

 

呢度就係竹林o既入口喇, 外面有兩個小食檔。

因為星期日o既關係, 竹林有好多本地同外國遊客。

 如果早一,兩日唻的話就可以見到白雪雪o既竹林.... 

任何一個地方取景, 出唻效果都好靚... 

呢度係求姻緣, 好多日本人都會唻拜拜。但我唔需要啦~ 有師奶佬已經好足夠!

竹林有人力車遊覽, 收費都幾貴。但一場唻到, 點都要試下o既~ 佢有幾種唔同收費, 其實都係由時間同路線去計。我今次坐20分鐘5,000円!  佢地好鬼專業同細心, 冬天佢地會放2個暖包響張椅度, 再蓋上厚厚o既毛毯。當你坐上車之後會為你扣好安全帶同蓋上2張厚厚o既毛毯。所以我全程都好暖笠笠。

呢度個個車伕都幾靚仔下架! 唔好睇佢瘦瘦削削, 好鬼大力架... 途中我仲見到一個女車伕,

拉o個架車有2個外國人!!!

個view真係好靚!!

坐完人力車, 肚仔餓。唻到嵐山當然要試下呢度出名o既湯葉啦~  湯葉即係豆腐皮。

好香、好滑! 因為想去浸足湯, 所以冇食到好飽。浸完足湯再搵間餐廳慢慢食!

京福嵐山駅月台有個足湯, 佢正正響月台度架! 



 可能太多遊客, 有齊繁簡中文同韓文。

 



 先去票務處俾200円買足湯券, 然後除鞋。

浸足湯前先要洗一洗對腳, 以保衛生。

嘩~ 好似我包場咁呀! 得我一個人浸....

200円除咗足湯入場劵之外, 仲有條手巾仔。

 日本人真細心, 條毛巾仔俾你抺完腳後, 知道你會拎番屋企做紀念, 所以有膠袋提供埋。唔駛煩惱條濕笠笠o既毛巾放響邊。

雖然冇景睇, 但都幾舒服。

 

 

浸完足湯後, 就去食餐好o既! 剛剛試完個湯葉, 而家食番個湯葉料理!  呢間餐廳係專食湯葉料理。由京福電鉄出唻, 向右手邊行大約2分鐘就見到架喇。

 

 呢個係最普通o既湯葉料理。竹桶o個個就係湯葉, (即豆腐皮同豆漿) 先食晒d湯葉 (有特別佐料沾唻食), 之後就飲埋d豆漿, 配有另一種特別佐料, 倒晒落去拌勻就可以飲喇。

 

食飽飽就去天龍寺度兜個圈。天龍寺係世界文化遺產之一, 梗係要「到此一遊」啦~

今日天氣好好, 個天好藍。呢個picture好靚... 

 原本諗住搭番JR落京都, 但行下行下已經3點幾, 不如試下坐京福電鉄啦~  紫色o既車卡, 我鐘意呀!



呢個就係京福電鉄o既路線圖。

詳情可以參考京福電鉄官方網頁: http://randen.keifuku.co.jp/railmap/index.html

睇佢外觀好懷舊feel

 由嵐山坐到去四条大宮站就可以轉阪急京都線。

 

因為京福電鉄係行走d小地方, 所以車站好近民居。

 



落咗車, 向左行過埋條馬路就見到阪急西院駅 (阪急京都線)。

可以去到大阪梅田站

車費610 円

去到大阪駅, 行去梅田長堀鶴見綠地線就可以去心齋橋。

 



 

 

比較JR同埋阪急+電鉄去嵯峨嵐山, 時間性其實差唔多, 都係要2個鐘。轉車次數都係一樣。但睇番官網, 可以由梅田坐阪急京都本線直去嵐山, 時間都只不過係1個鐘, 只係轉一次車。車費都只係400円。下次可以試下坐阪急去嵐山。
詳情可以參考番官方網頁: http://www.hankyu.co.jp/



大阪7日6夜之旅 - Day 3 和歌山黑潮市場

出發唻大阪前, 細妹個朋友都同埋佢d屋企人唻咗旅行。所以第三日就同埋佢地一齊去咗和歌山o既黑潮市場。

因為我地住o既酒店地區唔一樣, 所以約咗響難波站度等。

南海難波站坐南海電鉄到和歌山

 

先去2/F票務處買和歌山一日券 ( 和歌山おでかけきっぷ), 2060 円。已包括來回南海難波駅至和歌山駅的南海電鉄車票同埋一日和歌山巴士券。(南海難波坐南海本線至和歌山市, 即係関西空港), 買完飛就上3/F搭車!

 

回程時先記得影相, 所以去程o既車票已經掉咗!

 

《和歌山おでかけきっぷ》詳情可以參考以下呢個網址: (只有日文)

http://www.nankai.co.jp/traffic/otoku/wakayamaodekake.html

 

 

如果冇買呢個一日券, 單係一程南鉄要960円, 來回已經1,920円。仲未計由和歌山市坐巴士去黑潮市場呢。所以買呢個《和歌山おでかけきっぷ》係正確的決定。

但若果你已經買咗Kansai Thur Pass就唔駛再買呢張《和歌山おでかけきっぷ》。因為Kansai Thur Pass係可以任坐南鉄同和歌山巴士的。

 

有關Kansai Thur Pass可以參考以下呢個網址:

http://www.surutto.com/tickets/kansai_thru_hantaiji.html

 





 本身南海難波駅係總站, 所以呢個車站好大, 有好多條線。

 

  

 記住你係買特急/指定席或是普通票, 上車前要睇睇入邊個車卡。

 

由難波出發至和歌山市, 大約1小時車程。

 

和歌山市駅係南鉄, 和歌山駅係JR唔好搞錯呀!

 

 

 一出到外面就會見到呢個斑馬線同指示牌。右手邊就係巴士站。去黑潮市場就去9號車站坐116或者117。大約30分鐘車程。

 

唻到喇~



 



呢度每日都會有3場示範解剖吞拿魚, 我地去到o既時候係第2場。

 

 好多魚.... 好新鮮呀~

 

 呢度有個燒烤場, 唔駛租爐費。只要你響市場入面買咗d海鮮/肉類/蔬菜, 就可以拎出唻呢度坐低慢慢燒。

呢度有埋燒烤夾, 海鹽, 海鮮醬, 紙碟, 濕紙巾同埋網架免費提供。基本上只要帶夠錢買o野食同埋搭車已經ok!  好方便。

最重要o既係呢度極之乾淨, 日本人出名整潔, 所以呢度燒完後要自己執番d垃圾。(放心, 呢度有埋垃圾膠袋提供)

 唻到日本, 梗係要食海鮮啦~

 呢隻咁大隻o既扇貝, 唔駛hkd40.

超大隻虎蝦, 都係hkd2x

 

從未食過咁大條o既八爪魚鬚!  以為燒完會好老, 但唔係喎~ 仲好juicy添~

 

 

  呢個就係黑潮市場o既floor plan喇~

日落好靚呀!!!! 

 

 



大阪7日6夜之旅 - Day 2 SHOPPING 篇

唻到第二日, 今日原本係諗住去京都, 但發現我d行程太緊密, 都冇時間去shopping! 再加上京都已經去過, 都冇乜特別地方好睇, 所以索性留番一日去shopping!

細妹落咗order, 要我買衫俾佢... 所以幾唔順路都要去四之橋 (Yotsubashi) 站。

呢個站其實無乜特別o野行, 不過就有好多香港人熟悉的牌子，例如: TSUMORI CHISATO, NEW BALANCE, HYSTERIC MINI, HYSTERIC GLAMOUR, X-GILR, SUPREME, A BATHING APE, COLUMBIA, PORTER等等。

而我當然要去一去HYSTERIC MINI度睇睇啦~

當日係星期六, 有好多日本媽咪帶埋小朋友唻買衫。見到D小朋友衫仔好靚! 我都買咗D o野俾我好朋友個女。如果他日我有小朋友的話, 一定全身都係佢!  好鬼有型...

話就話係星期六, 但呢度唔算係好多人, 行得好舒服!  唔同東京o既表參道/新宿, 一年365日都多人都爆!

但大阪o既A BATHING APE就真係... 地方已經細, 貨品種類又少。所以都係買咗2件衫俾阿妹同老公。

日本o既Columbia款式比香港colourful好多... 因為Columbia 大部份o既design都好有日本風味, 不過因為價錢太貴 (一件風褸hkd1,600) 所以我就冇買到.... 諗番起都有少少後悔!

一輪旋風式購物後, 已經3點鐘... 發覺原來我只係朝早食咗個包。唔怪得咁鬼肚餓啦~ 所以話, 女人買o野真係可以完全忘記時間!  行番出大街, 見到間"一風堂" 雖然響香港我都唔會食, 但呢個時候真係唔理得咁多, 醫咗肚先算!

 枱上有3款前菜, 係任食架! 

 

以為冬天會有熱茶, 但竟然係一杯凍烏龍茶。



求求其其叫咗碗拉麵。

食飽飽後, 諗住沿住大街一路行落心齋橋繼續shopping, 但唔知係咪餓得太耐, 腳仔有d軟...  所以決定先番酒店放低d戰利品再出發!

見酒店地區同四之橋唔係太遠, 所以膽粗粗走咗去坐的士!  無錯, 真係好鬼豪!!!  不過不得不讚日本人, 佢地真係好守規矩!  當我拎住一袋二袋上車, 再拎埋張酒店卡片俾佢, 佢竟然係泊響路邊停低車先接我張卡片。換轉響香港, 司機大佬已經一反手拎咗張卡片唻睇。

呢位司機叔叔, 真係好盡責。佢明知我唔識日文但都好不厭其煩地同我講幾時轉右, 幾時轉左!  仲要行車穩定, 冇手提電話響車頭!

日本的士係唔駛你開車門, 連個開門拉巴都封埋!

收穫雖然豐富, 但有一半唔係我自己....

大阪7日6夜之旅 - Day 1出發篇

話說公司因為生意唔好，12月初已經裁咗我出唻。響12月31日呢個日子，我老細竟然一口氣又裁多7個。佢仲要10點番到公司，1粒鐘時間就搞掂兼走人。臨走時仲好似「大赦天下」咁宣布收早！真係多謝晒～

而我好好彩地2星期就搵到份新工，所以決定又再一次賣甩師奶佬，自己出走一星期！其實我原本係諗住同埋佢去架，但因為1月初佢唔俾請假，而我又唔想等到1年後先可以放假去旅行。再者又有筆錢補番俾我，梗係要好好利用利用啦～ 

上次去大阪係結婚前，因為想試下一個人去旅行，所以就揀咗大阪。今次因為未試過冬天去日本，所以又揀大阪。

最好彩係我咁啱又買到$5機票！（只係回程嗰張先係$5）而家d Yen又跌到咁... 仲唔係「命中注定」我要再去多次!?

出發！

間酒店我上次住過，超抵住又方便。只需HK$270/晚！冇錯！係港幣二百七十元！呢間係單人房，好大架！

附近仲有個動物園。

所以呢個站就叫「動物園前」係御筋堂線。去心齋橋、難波都係幾分鐘。酒店就正正響上面，唔駛過馬路！

番到酒店，梳洗完就出去喇。又真係咁啱我有位朋友同佢屋企人唻，於是就約埋一齊食飯。

呢間餐廳係響心齋橋d橫街度。我地都係誤打誤撞，諗住求其搵間餐廳食飯。佢地只係得幾間「宴會」即係「包廂」。幾個人唻大聲講嘢都唔怕嘈到人！

D嘢食好好味。但只有日文餐牌，我地都係看圖識字。5個人，呢餐飯食咗3萬yen。咁嘅質素，香港食的話應該唔止！

食飽飽，行一陣。

響激安度買咗呢個插頭，好鬼好用！只係760yen有2個普通插頭，2個USB插頭。以後唻日本又可以帶少d嘢。

聽日去血拼！

結婚3週年晚餐【附工房種+白神種+低溫發酵小餐包食譜】

俄羅斯經濟陷入困局, 油價創新低, 匯率好似坐火箭咁"一飛沖天"!  我就因為以上種種原因而失業了!!  幸好, 工作上的事已經在聖誕節前settled, 期待下個月番新工。希望一切順利!

上星期同師奶佬靜靜地渡過咗我地3週年結婚紀念日。但我呢個師奶仔為咗慳番個錢, 決定留番響屋企食。

頭盤: 俄羅斯魚子醬芝士併盤 + 自家製小餐包
餐湯: 罐頭雞蓉粟米湯
主菜: 香煎牛仔排, 橄欖油煙肉蜆肉磨菇炒意粉配黑松露鹽


早幾日終於都的起心肝整工房種, 今次試下用佢唻整包。見好多人都係用「星野」唻做工房種, 但我只係整咗白神生種, 我諗應該問題不大...

睇下佢幾咁活躍!

工房種

材料:
高筋粉          100g
糖                  5g
鹽                  2g
煉奶              5g
蜂蜜              5g
水                  92g
白神生種      10g

做法:
1) 容器先消毒, 風乾後備用;
2) 所有材料放入容器拌勻;
3) 室溫發酵22小時, 期間要攪拌一下;
4) 待發酵至2倍大時, 放入雪柜或可即時做包;

續養:
高筋粉          50g
糖                  2.5g
水                  46g
蜂蜜              5g

**室溫發酵至2倍大時便可放入雪柜保存。最多可保全星期。

小餐包食譜:

材料:

高筋粉          250g
白神生種      20g
工房種          100g
三溫糖          25g
鹽                  3g
水                  120-150g
無鹽牛油      25g
蛋漿              少許 (掃包面用)


1)  白神生種和工房種從雪柜拿出, 放置約1小時至室溫 (夏天可因溫度而縮減時間); 牛油切細粒至軟身;
2) 高筋粉、白神生種、工房種、三溫糖、鹽、水 (分數次加入) 放入大碗中搓至沒有粉粒;
3) 把麵糰從大碗中拿出至工作枱面,甩打至麵糰表面光滑;
4) 把已放軟身的牛油加入麵糰, 搓勻及甩打至麵糰表面光滑;



5) 大碗灑上少許高筋粉, 放入麵糰, 再灑少許高筋粉在麵糰上, 蓋上保鮮膜;
6) 發酵1小時至2倍大; 再放入雪柜作低溫發酵;
7) 第二天, 把麵糰從雪柜拿出, 放至室溫回暖;
8) 焗爐預熱180度;
9) 排氣, 靜置20分鐘, 分割;
10) 將麵糰搓揉成圓形, 放在焗盤上, 掃上蛋漿;
11) 放入焗爐焗15mins
12) 放涼後即可食用。

好鬼靚仔!!

 



撕開時見到呢個畫面, 好有快感!

p.s: 番新工前, 去個小旅行放鬆心情。超期待下星期的大阪之旅... 

白神+湯種煙肉粟米卷 (附食譜)

呢個幾月發生太多唔如意的事, 上兩星期都係鬱鬱不歡, 覺得好大壓力!  好在得各方好友的安慰、開解已逐漸逃出困局。但總有絲絲不安... 

係時候做番D自己鐘意o既事, 舒緩下。星期日諗住整曲奇餅, 但原來糖霜用晒... 搞到前一晚調好色的蛋白霜又報銷了!  好在白神種又READY好,  一於搓番個包!

麵糰材料:
高筋粉       250g
白神酵種   100g
湯種           75g
雞蛋           1隻
糖               10g
鹽               3g
水               50-80g

餡料:
粟米
煙肉

做法:
1) 先將煙肉和粟米炒香, 備用;
2) 所有麵糰材料放入大碗內搓至沒有粉粒;
3) 將麵糰搓圓放回碗內, 蓋上保鮮模發酵1小時;
4) 排氣, 然後舖上濕毛巾靜置10-15mins;
5) 將麵糰擀成長方形, 放上餡料;
6) 向上捲至收口;
7) 焗爐預熱180度
8) 將麵糰切成每份約2-3cm厚, 放上焗盤;
9) 180度焗15mins

冰糖燉雪梨雪耳糖水 (附食譜)

今年冬天遲咗唻... 今個星期先開始凍番少少, 但都係講緊14-18度。近年已經再分唔到春夏秋冬四季, 只分到夏天同冬天o既分別。


見街市生果檔有天津鴨咀梨賣, 即刻買番幾隻唻燉個糖水潤一潤佢!  做法簡單, 而且仲有好多好處: 滋陰潤肺，養胃生津。適用於慢性氣管炎、百日咳、慢性咽炎等病癥


材料:
天津鴨咀梨 4隻
南北杏少許
川貝少許
雪耳3個
冰糖適量

做法:

1) 天津鴨咀梨去皮去芯, 用水清洗一下;
2) 燒滾水後放入所有材料, 大火燉30mins;
3) 再改用中細火燉1.5小時;