【物盡其用】炆冬菇蒂 (附食譜)

 

細細個已經知道婆婆能人所不能! 一個寡母婆湊大4個仔女, 自己拜佛茹素但也能夠煮出美味o既葷菜照顧家人, 滿足家人的口腹。婆婆係寧波人, 我同舅父們一樣係食上海菜長大, 所以對上海菜要求特別挑剔! 自從婆婆仙遊後, 每個人都對婆婆煮o既上海菜念念不忘… 可惜媽咪並冇得到婆婆的真傳…… 每次出街食上海菜, 個個都唔多滿意!! 為咗要食番婆婆煮o既味道,  我要努力! 憑我o既記憶同味道煮番一餐『婆婆的上海菜』俾舅父們懷念下!

記得有次我唔肯食飯, 婆婆拎咗一碟仔小食出唻俾我, 一試難忘!! 以前唔知係咩唻, 只記得個味道。後來媽咪話係「冬菇蒂」,  原來冬菇蒂都可以食架~~ 所以話呢… 我婆婆真係好叻!

為咗要整呢味炆冬菇蒂, 我足足儲咗大半年先儲到咁多!! 整完今次又要再儲過~

材料:

冬菇蒂

薑片
 

調味料:

蠔油

老抽

生抽

糖

鹽

胡椒粉

麻油

做法:

1) 冬菇蒂用水浸軟, 切去最頂部硬o既蒂, 然後再切幼條;

2) 凍油落鑊, 今次用LC 20cm round oven;

3) 薑切片落鑊爆香, 再把冬菇蒂下鍋炒至少少乾身;

4) 將調味料 (除生抽外) 下鍋, 加蓋炆煮30-45MINS;

5) 打開蓋, 加入生抽作最後調味, 再焗多5MINS;

6) 將已煮好的冬菇蒂倒出, 待涼後可放入雪柜保存1個月左右。

 

呢一大盤冬菇蒂, 可其壯觀!!! 淨係剪呢盤o野, 已經剪咗成個下午! 一路剪, 成間屋充滿住冬菇o既香味~

【消暑湯水】冬瓜肉碎榨菜湯 (附食譜)

上星期細妹湊咗堂家姐個仔 (嗯… 即係我侄仔!?) 過唻訓, 下午去咗沙田接佢, 行咗陣街再去埋街市買餸就返歸煮飯。咁樣搞一搞又冇咗大半日… 師奶佬就安安靜靜咁留響屋企溫書。番到屋企仲要幫個靚仔沖完涼, 氹埋佢訓覺先可以開始煮飯!! 坐低抖下o既機會都冇呀~ 仲辛苦過番工, 出差…

呢期出差出到暈… 搞到WEEKEND都唔想煮飯, 想偷下懶! 但眼見師奶佬少咗好多湯水, 就煲番個超簡單又好飲o既消暑湯啦~


材料:

冬瓜2斤

榨菜1個

碎豬肉$20

醃料:

糖

鹽

胡椒粉

做法:

1) 先將冬瓜去皮, 去籽洗淨後再切粒;

2) 榨菜洗淨後切粒;

3) 碎豬肉用醃料醃15mins;

4) 煲滾水後將所有材料放入煲內 (今次用LC 25cm Round French Oven)

5) 加蓋用小火煮20mins;

6) 加入鹽調味, 再焗多5mins, 即成。

第一次用LC唻煲湯 (嗯… 其實係滾湯!) 用最細火已經OK, 時間又唔駛太耐, 慳火又慳力! 下次試下用唻煲老火湯先~

和風一人前

上星期六我又自己湊仔!! 帶咗我個姨姪仔由尖咀坐船去中環, 再坐電車落金鐘。O個日真係好曬… 行行下佢竟然同我講「大姨, 超級熱呀!」哈哈哈~ 真係笑C我! 呢位小朋友, 人仔細細但好古惑!! 成鬼日都呃我, 又蝦我…

呃我事件一, 耐唔時同我講佢bu咗, 嘩~ 即刻高度戒備啦, 首先聞下有冇異味! 跟住再問多佢一次係咪bu咗, 佢竟然用好狡滑o既表情話”係呀!”, 跟住再問佢係咪講大話, 呃大姨, 佢又用番同一個表情講”係呀!”。真係俾佢吹脹!

蝦我事件一, 特登行得好慢… 要你抱! 問佢係咪蝦大姨, 佢會毫不掩飾地承應”係呀!”

連細妹都話「一個兇悍的大姨竟然俾一個2歲人仔蝦, 係一個奇蹟!」

原本呢個CP 17oval係買唻整豆腐花架嘛… 點知而家變咗做師奶佬o既專屬一人前餐具!!! 等我再敗多個17oval番唻先得!!

日本鰹魚湯拉麵+香煎咸三文魚

鰹魚湯底

鰹魚粉2湯匙

乾魚仔2-3條

日本醬油1湯匙

鹽少許

煎呢個三文魚, 最重要係煎到塊魚皮夠脆口! 油要多少少, 油溫唔好太高。

呢個一人前晚餐係師奶佬o既至愛!!

Le Creuset 26cm PINK buffet 【附蒜蓉豆豉蒸蟶子食譜】

響FACEBOOK個「全宇宙最毒的GROUP」度識咗一班志同道合的朋友仔, 好開心可以一齊SHARE下敗家o既心得同埋戰利品。最最最開心係可以一齊去敗家!!! P小姐係我第一個響個GROUP度識o既朋友仔, 佢… 風趣可愛仲有好多爛gag! 相識短短2星期齊齊相約去敗家兩次了~~ 真開心!

6月底去咗東京旅行, 出發當日竟然有LC special online sales (只限日本)…. 幸得P小姐相助, 我先可以敗到呢SET 超靚, 超好用o既26cm buffet同埋trivet! 日思夜想o既pink pink終於響上星期都到手喇~ 淨係睇相已經口水流… 而家已經到手, 直情想攬住佢訓呀!!

尋晚終於都同我隻pink pink 26 buffet開光喇~~ 為咗隆重其事, 點可以煮d咁普通o既菜呢!? 為咗要親身體驗下佢o既”無水蒸”威力,  買唻10隻蟶子… 整番味蒜蓉豆豉蒸蟶子!

材料:

蟶子10隻

豆豉1湯匙

獨子蒜 2粒

粉絲1包

調味料:

生抽

做法:

1) 蟶子洗淨, 去掉內臟, 用刷清洗外殼;

2) 獨子蒜切碎, 加入豆豉一齊壓爛, 拌勻;

3) 粉絲用水浸軟, 瀝乾水備用;

4) 26cm buffet搽少許油, 先放入粉絲墊底;

5) 再放入蟶子, 然後在上面加蒜蓉豆豉;

6) 舖好後加蓋, 用小火蒸大約10-15mins;

7) 上枱前加入少許生抽調味, 即成。

小小心得:

a) 放入粉絲後, 加入少少水, 因粉絲沒有足夠的水份就不能夠吸收海鮮的鮮味;

 

b) 10隻蟶子放入26cm buffet要放3層; 每放完一層就加蒜蓉豆豉;

c)  如果蒸完後, 加入少許蔥花再贊熟油, 會更加美味;



睇下… 26cm buffet原鍋上枱, 幾咁靚~~

東京瘋狂購物の潮人篇

日本東京 - 潮流o既指標! 日本人對潮流的觸角很敏感。所以十居其九的日本人很會打扮!  行出街個個日本人都打扮新潮, 唻到日本當然要買番一,兩件潮o野番香港, 扮下潮人啦~ 嗯… 但有人話我「師奶一名, 扮乜鬼潮人!?」邊個話師奶唔潮得架~ 我就係要做一個潮人師奶! 


我最愛手巾手, 尤其炎炎夏日... 一出街就成身汗, 用唻抺汗夠晒環保。咁o岩遇著大減價, Vivian westwood手巾仔超抵!

除咗手巾仔, 我最鐘意就係買襪! 響涉谷搵到一間專賣襪的shop, 90% 貨都係made in Japan!

我對日本品牌唔係好鐘情, 但唯獨X-girl係我由中學已經鐘意o既品牌。

<A Bathing Ape>係阿妹最愛o既品牌! 唔知由幾時開始, 件件都係made in Japan慢慢改為十件有九件係made in China! 所以買衫時真係要好小心... 我真係逐件睇made in邊度架, 如果係made in China, 個print有幾靚都唔會買。響日本買真係平好多呀~~~ 所以要買幾件俾師奶佬!

去到日本都見到我的愛人~~~

東京瘋狂購物の廚房篇

六日五夜的東京放血之旅終於都完結!! 原先係3個人拖兩個喼+1個大袋, 回程時係我一個人拖兩個喼再加一個大背包!!! 可想而知, 放血之旅的成果… 其實我仲未買夠架~ 連日本先有得買o既LC 木製品都冇用買到!!!!   

 

 

尋晚落機番到屋企樓下, 急CALL師奶佬落樓拖行李! 佢見我一個人有咁多件行李, 冇驚訝, 冇反應, 冇表情… 可能佢已經有晒心理準備。而且可能比佢想像中已經少咗好多!!

 

回程前一晚執行李, 越執越驚… 因為兩個喼爆晒而且勁重! 成晚都諗緊點算好… 因為如果要hand carry都幾重! 怕個機倉行李櫃會承受唔到個重量而跌晒d行李落唻!! 第二朝早去到機場check-in, 勁好彩地被upgrade到business class… 但行李重量並冇得計business class… 而我每放一件行李上磅都望一望幾重! 結果係超重咗10KG!!! 每1KG收取USD20!!!!! 最後運用一個超爛借口, 順利過關!

 

響築地搜購的不銹鋼用具, "MADE IN JAPAN"的~

 

在表參道遇到的量杯, 價錢比香港平一半有多!

 

去日本點可以唔買Le Creuset呢~ 去咗木更津掃貨, 可惜已爆喼, 如果唔係一定會掃得梗多!!

 

香港好難買米麴, 去到日本買咗兩款米麴番唻, 試下整鹽麴! 仲買咗幾包鹽, 軟的凍豆腐, 年糕燒餅

 

響築地市場買的乾貨, 買唔到海鮮番唻, 買咗1包北海道紅豆同2包乾瑤柱。

 

 

又係鹽! 其實我自己都唔明白做乜事買咁鬼多鹽...

 

原本今次東京行冇諗過買咁多o野, 但係去到真係忍唔到手!