咸酸菜炒蜆肉 (附食譜)

早排肥媽個節目去暈港九新界街市買餸,  價錢係平呀~ 但來回車錢都去咗啦… 除非你買一個星期甚至一個月o既存貨啦, 如果唔係真係得不償失!  有一集介紹觀塘街市, 呢個近我屋企呀~ 但來回車錢都要差唔多十蚊雞!  weekend冇乜o野做, 又要煮飯! 當去行街囉~ 同埋媽咪一齊去行下, 真係好鬼多o野買呀~ 價錢好難比較係咪真係平好多, 因為大部份都係$5份/$10份咁… 我買咗一份節瓜$6 (有兩個) 睇落好似好平, 但如果係續斤/續兩計又未必需要$6!!

呢個街市比我屋企附近o個個熱鬧得多~ 又多o野賣! 可謂應有盡有呀! 行過一間好似一間南貨舖o既舖頭, 見到竟然有潮州細蜆肉賣。買咗十幾蚊, 加埋咸酸菜, 整番個潮州菜先~

 

材料:

潮州去殼蜆肉

咸酸菜

蔥

薑片

蒜頭

調味料:

糖

鹽

麻油

 

做法:

1)  先將蜆肉用水洗淨, 瀝乾水份;

2)  咸酸菜洗淨, 抺乾後切絲;

      3)  燒熱鑊, 下咸酸菜絲, 加2茶匙糖炒至乾身; 盛起備用;

4)  凍鑊下油, 將薑片, 蒜頭及蔥白爆香, 下蜆肉炒3-4MINS;
 

5)  將咸酸菜絲回鑊, 加調味料炒勻; 即成。

 

 

小小心得:

a) 咸酸菜先用凍水浸15-20mins, 以減少咸味;

b) 用白鑊炒咸酸菜絲, 可將多餘的鹽份迫出, 令咸酸菜食落較爽口;

c) 細蜆肉買番唻時, 要先用水浸5-10mins, 因為會有d碎殼;

d) 唔同舖頭買的咸酸菜咸味唔一樣, 建議洗淨切絲後先試味, 再決定浸水時間同埋糖的份量。

非常之好味! 媽咪平時食半碗飯, 今次竟食咗兩大碗!!

紅咖喱雞煲 (附食譜)

屋企地方越唻越唔見駛… 尤其廚房!! 要想盡辦法去增加存放空間。調味架已經被潛建, 由原本兩層變三層; 廚櫃由原本兩層變為四層; 但總係唔夠地方用!! 每次煮飯都要左搬又搬, 由廚房搬去雜物房, 再由雜物房搬番我d 靚靚LC去廚房開爐…  

成日都想搵間大少少o既單位, 但而家樓價高企… 雖則我地個單位已經升咗接近一倍, 但計過條數, 而家換樓一d著數都冇! 我諗我o既dream kitchen要遲多幾年先可以實現到!   當我每次呻個廚房太細時, 師奶佬都會講同一句說話 “廚房雖然係細, 但你都可以煮出咁美味o既食物, 即係廚房大小對你唻講冇影響啦~” 一句說話就輕輕咁帶過件事, 你d太極功夫進步咗喎~~ 但知唔知咩叫「工慾善其事, 必先利其器」。

為咗要清一清屋企o既存貨,  又唻煮咖喱! 今次煮紅咖喱。Blue Elephant o既咖喱醬係上年旅行時買, 用剩最後呢包!!  下次再去泰國一定要大手入貨。

材料:

雞脾肉2塊

薯仔2個

洋蔥2個

甘荀1條

 

調味料:

Blue Elephant紅咖喱醬1包

水2杯

鹽

糖

胡椒粉

乾指天椒2隻

印度咖喱醬

Kaffir Lime 2片

 

醃料:

糖

鹽

魚露

麻油

做法:

1)  雞肉洗淨, 抺乾水份, 切件; 用醃料醃30MINS;

2)  薯仔切件, 洋蔥切絲備用;

3)  燒熱鑊下油, 將薯仔煎至金黃色, 盛起備用;

4)  再加少許油下鑊, 爆香洋蔥備用;

5)  用另一個鍋煮咖喱, 凍鍋下紅咖喱醬炒至出油;

6)  加½杯水煮至稀身, 下雞件炒勻, 加蓋煮5MINS;

7)  打開蓋, 加入餘下的材料; 加入鹽, 糖, 乾指天椒, Kaffir Lime調味;  再加入1 ½ 杯水煮滾;

8)  加2湯匙印度咖喱和少許胡椒粉調味, 再煮至滾, 熄火後加入少許Sweet Basil拌勻。

 

P.S: 每次煮咖喱我都好鐘意加呢隻Tung Teck Hing 咖喱醬作調味, 無論係煮日本咖喱定係泰式咖喱, 加咗呢隻醬之後, 咖喱會更加香。

簡易朱古力CUPCAKE (附食譜)

星期日無所事事
... 師奶佬失驚無神同咗班朋友走咗去沙灘曬太陽, 得我一條友留守家園!!! 大熱天時留響屋企開大個冷氣, 睇下電視, 食下雪糕, 飲下汽水... 都不知幾嘆~ 但我天生忙碌命,有時間抖都要搵D o野唻做下先安樂!  

早排買咗一盒朱古力蛋糕粉番唻, 見佢後面instruction寫到超簡單, 而且只係需要加雞蛋, 橄欖油同水… o岩晒我呢d新手! 準備晒所有材料同工具, 開工lu~~

材料:

朱古力蛋糕粉1盒

雞蛋3隻

水1 ¼ 杯

橄欖油 ¼ 杯

雲呢拿油少許

朱古力粒

榛子粒

做法:

1)  雞蛋從雪櫃拎出放置室溫;

 

2)  焗爐預熱180 °C;

 

3)  將朱古力蛋糕倒進大碗中, 先加入1 ¼杯水, 用手輕輕攪拌;

 

4)  然後加入雞蛋, 橄欖油和雲呢拿油, 用自動打蛋器最低速度打發30秒;

 

5)  轉用最高速度打發分半鐘, 至所有材料混合及沒有粉粒;

 

6)  放入大約 ½杯朱古力粒放入粉漿, 拌勻;

 

7)  將粉漿倒入蛋糕模至半滿, 在面上灑上少許榛子粒;

 

8)  放入焗爐焗15-18分鐘, 即成。

 

 

蕃茄薯仔馬頭魚湯 (附食譜)

自從買咗個焗爐之後, 成日都諗方法去玩呢件大玩具而忽略咗師奶佬... 撞o岩師奶佬放大假, weekend陪我去買餸玩煮飯仔。一於煮餐好o既俾佢食先~

夏日炎炎, 行街市真係好鬼辛苦架~ 由屋企行去街市其實一d都唔遠, 最多5-8分鐘! 但響太陽伯伯"照"住底下, 呢5-8分鐘都足以令你汗流浹背!!

我屋企附近個街市再冇好似以前咁熱鬧喇~ 因為領匯狂加租o既關係, 令到d小檔口冇辦法生存, 唯有收檔....  有好多由細幫襯到大o既檔口都已經執咗! 我又唔鐘意去d大型超市買餸, o個度d瓜菜, 生果, 肉類一d都唔靚, 而且價錢又唔係平!!  雖然係方便... 我試過一次放工7點幾番到屋企樓下個超市, 諗住買d菜同豬肉番屋企煮餐簡便飯, 點知d菜核突到買唔落手, 豬肉又冇得揀, 淨番d肥肉!!! 睇落好似好方便, 因為6點半後街市都已經開始收檔, 超市開到10點幾11點鐘! 但方便又點呢!?? 咪又係冇餸買~~

好鬼耐都冇煲過啖靚湯俾師奶佬飲, 行過菜檔, 見到d蕃茄靚到呢~~~ 唔買真係對唔住自己呀! 足足買咗6個又紅又大o既蕃茄, 再買多2個薯仔! 煲番個蕃茄薯仔湯... 經過魚檔, 見到$15一份魚, 再買少少排骨! 呢個湯一定好好味!!

材料:
蕃茄6個
薯仔2個
馬頭魚4條
排骨$20
薑片

醃料:
鹽
胡椒粉

做法:

1) 先將蕃茄, 薯仔洗淨; 蕃茄分成4-8件, 薯仔去皮切件;
2) 馬頭魚洗淨, 抺乾水後用醃料醃15-20分鐘;
3) 煮滾水後, 把蕃茄和薯仔放入鍋內, 大火煮30分鐘;
4) 燒熱鑊, 下薑片爆香後, 下馬頭魚煎至兩面金黃色;
5) 把魚輕輕放入湯鍋內; 中小火煮1小時;
6) 最後下少許鹽調味, 即成。


P.S: 拿一碗湯倒入剛煎完魚的鑊, 輕輕搞拌便會變成奶白色, 然後再倒回湯鍋內。因為煎魚時, 魚的皮/纖維會黏住個鑊, 當個鑊仲係熱o既時候加入熱湯, 帶走所有魚的精華!  令個湯更有魚的鮮甜味。

忌廉芝士焗西蘭花 (附食譜)

呢幾日真係熱到暈低! 換完衫未行出街都已經熱到成身汗...
天氣咁鬼熱都冇乜胃口, 平時去買餸之前都已經諗好晒要煮乜, 但呢排真係毫無頭緒!! 去到街市行個圈都諗唔到D乜... 真係求求其其買到乜就煮乜。

行過菜檔見到D西蘭花好靚, 但成$16/斤... 寫住「澳洲入口」。有時出街食飯, 師奶佬都要叫芝士焗西蘭花, 出街食最少$50-$60!  而家買$10西蘭花煮到一大盤喇~

材料:
西蘭花1個

調味料:
忌廉湯一罐
MOZZARELLA芝士1片
PARMESAN 芝士碎少許
鹽少許
牛油少許

做法:

1) 西蘭花洗淨, 切開;
2) 燒熱鑊, 下牛油煮溶後後下西蘭花炒勻;
3) 預熱焗爐180度;
4) 下4份3忌廉湯加一少杯水煮勻;
5) 下少許鹽調味;
6) 烤盤塗上牛油, 把已炒好的西蘭花放入烤盤內;
7) 把餘下的4份1忌廉湯倒入西蘭花烤盤內;
8) MOZZARELLA芝士撕成小片舖在西蘭花面上;
9) 灑上少許PARMESAN 芝士碎;
10) 放入焗爐10分鐘, 或至芝士面變成金黃色, 即成。