一年一度母親節 (附蝴蝶酥食譜)

世上只有媽媽好~ 有媽的孩子像個寶~

尋日係母親節, 大部份人都響呢一日一盡孝道。而我… 好老實冇同媽咪/奶奶慶祝! 因為我覺得孝順媽媽唔係一年得一日, 如果係乖, 係孝順o既, 日日都可以係母親節! 飲茶, 送花, 陪行街平時都可以做, 只係睇你有冇呢份心o者… 老人家唔需要太多花巧o野, 閒時打個電話俾佢地, 有時間同佢地食個飯, 已經好開心!

尋晚媽咪難得下廚, 煮咗我同阿妹最愛o既”炒潮州麵”! 有人會覺得點解母親節要媽咪煮飯俾我地食, 覺得我地好唔o岩… 但我想講, 做女人肯企響廚房幾粒鐘去煮餐飯, 雖然辛苦… 但屋企人番唻食, 食得開心已經好滿足。媽咪尋晚煮得開心, 我地又食得窩心。一路食一路傾計… 吵吵鬧鬧又一晚!

 

呢期師奶佬好似愛上咗蝴蝶酥, 走咗去著名o既餅舖買咗一盒成$2xx o既蝴蝶酥! 唔駛一星期已經食完… 既然師奶佬咁鐘意食, 不如自己整啦~ 肯定平過出去買!  上星期五叫師奶佬買定材料, 放工食完飯拿拿林趕番屋企焗o野! 超簡單, 毫無難度!!!!

材料:

急凍酥皮磚一包

白砂糖

牛油

做法:

1)   急凍酥皮磚解凍, 用麵粉捧壓至2-3MM厚;

2)   枱面灑上一層白砂糖, 將酥皮放上面; 再灑上一層白砂糖;

3)   將酥皮兩邊向入摺4份1, 再摺多次4份1, 中間留有少少空間;

4)   牛油用熱水座溶, 酥皮兩邊分別摺了兩次4份1之後, 掃上一層薄薄的牛油後再對摺;

5)   然後用保鮮紙包實, 放入雪櫃雪30MINS;

6)   同步預熱焗爐180°C;

7)   將酥皮從雪櫃拿出後, 切成1CM厚;

8)   焗盤掃上一層牛油, 放上酥皮, 每件之間留1CM空間; 放好後再於蝴蝶酥面掃上一層牛油;

9)   將焗盤放入焗爐, 180°C焗20-30分鐘;

10)  焗完後將蝴蝶酥放出放置在鐵架上待涼即可食用。

 

姊妹淘飯聚

 好耐冇招呼朋友上唻, 適逄上星期五公眾假期, 約咗班姊妹淘唻我屋企開餐。佢地話好耐冇上唻試菜… 難得有人願意做白老鼠, 我當然樂意煮啦~ 我早於一星期前已經草擬好菜單, 為咗要清除家中的清酒存貨, 一於整個日本和風料理。

5個女人相聚, 少不免講下化妝, 講下護膚, 講下八婆o野… 我響廚房忙東忙西時, 班姊妹好似小朋友睇媽媽煮飯咁, 坐響門口陪我傾計。(個場面都幾搞笑~) 今晚菜式簡單, 洗洗切切已經一早做好晒, 所以今晚等齊人就可以開飯喇。

今晚有: 蟹子沙律, 奴豆腐, 清酒煮蜆, 日式炒雜菜, 芥辣醬油焗三文魚

 

飯後收到份好窩心的禮物! 知我鐘意massage, 送我Oriental Essence o既massage 90mins… 係一份好有heart o既禮物, 好surprised, 好開心!! 多謝你地~~

我的生日禮物 (附蜜汁义燒食譜)

上年已經揀好咗今年生日禮物...  往年生日都係手錶/手袋, 但升呢成為李師奶後, 生日禮物已經由手錶同手袋改為廚房用具!! 阿妹話我降咗grade, 但我就唔同意喇! 我而家所揀選o既生日禮物, 可以話人人受惠!! 我係為大眾謀福祉。再者, 為咗加強我煮飯o既功力, 菜式的多元化, 師奶佬個胃... 今年決定忍痛, 放棄一直想要o既手袋, 改為呢個大牛龜玩具...

各位, 請以熱烈o既掌聲歡迎我的新寵兒 – TEFAL OF2658

呢位新歡, 集齊晒我想要的條件於一身 - 24L容量, 2000W火力, 加埋『自動清洗內壁功能』! 呢7個字已經令我雙眼發光...淨係睇呢個賣點已經不作他選!! 不消十分鐘已經叫sales姐姐拎個新o既俾我!

原本諗住可以即時捧走, 即晚有得用。 點知冇現貨, 要響倉度拎…. 好彩SALES姐姐夠好人, 二話不說幫我安排”URGENCY DELIVERY”, 第二朝早10點零鐘已經安全運送到我家!

SIZE剛剛好… FIT晒個位

即晚唻個試驗品 – 蜜汁燒义燒

材料:
柳梅一條約$30

醃料:

糖

玫瑰露

胡椒粉

义燒醬

調味料:

蜜糖

水

做法:

1)   先將豬肉洗淨, 抺乾水;

2)   用醃料醃2小時;

3)   將焗爐預熱240°C約 20分鐘;

4)   焗盤掃上油, 將豬肉放上並掃上蜜糖水;

5)   焗盤放入焗爐, 用240 °C焗10分鐘;

6)   反轉另一面, 掃上蜜糖水再焗10分鐘; 即成。

 

小小心得:

a)   因為义燒醬帶咸味, 所以醃料不用放鹽。

b) 醃豬肉前先泡水3-5分鐘, 令豬肉吸收多d水份, 焗出唻就唔會太乾。

c)   應該揀肥少少o既柳梅, 食起上唻會較juicy

 因未充分掌握到焗爐o既火力同時間, 出唻效果冇預期中咁好! 真係要多d同「佢」溝通溝通, 互相了解下先得!

特別鳴謝師奶佬送我呢份生日禮物! 往後的日子, 我會為你鑽研不同的美味菜式。誓要將你變做一個大肥佬~~

香煎羊鞍配鮮茄意粉 (附食譜)

尋日五‧一勞動節, 難得有假放, 朝早起身同媽咪舅父出去飲茶, 做個孝順女。飲完茶番媽咪屋企, 同阿妹一齊睇電視, hea咗兩個幾鐘就番屋企洗衫同準備晚餐。舅父俾咗成排急凍羊鞍我, 阿妹話想食; 屋企又有意粉存貨 (早前堂家姐為答謝我幫佢湊仔而送o既) 既然所有材料都齊存, 一於整個西餐食啦~

師奶佬成日都話我買買埋埋咁多調味料又唔多用, 放滿晒廚櫃同埋調味架, 外人聽落覺得好似好誇張, 但熱愛煮o野食o既人應該會明白我

將羊鞍解凍之後又係勞動o既時候, 出晒力咁斬… 斬… 斬… 劈…劈…劈…  搞咗成5分鐘先切到2件出唻! 我諗我把斬骨刀應該係時候”退役”!

廚房細o既關係, 每次煮飯前都要預先計劃好個流程。今次晚餐簡單非常, 煮好意粉再煎羊鞍。

鮮茄意粉

材料:

意粉2包

新鮮蕃茄4個

火腿1包約6片

蟹柳8條

火鍋用豬肉片1包

粟米一盒

調味料:

蕃茄磨菇意粉醬一樽

香草蕃茄醬一樽

茄汁4湯匙

糖2茶匙

鹽少許

水少許

油少許

做法:

1)   先煮滾水, 加少許油及鹽, 煮滾後放意粉煮至軟身 (約10分鐘);

2)   煮好後倒出過冷河, 備用;

3)   蕃茄切件; 火腿切條; 蟹柳切條; 豬肉片用手撕成細片; 備用

4)   燒熱鑊, 下少許油炒豬肉片至5成熟, 盛起備用;

5)   下蕃茄炒至軟身, 加少許糖, 鹽及少量水炒至爛開;

6)   下其餘材料炒勻, 加入一樽蕃茄意粉醬炒勻;

7)   加入意粉炒勻; 再加入一樽蕃茄意粉醬, 加少許水炒勻;

8)   茄汁加200ML水及1茶匙糖拌勻後倒入鑊入炒勻; 即成。

 

 

煎羊鞍

材料:

羊鞍1件

調味料:

蒜鹽

意大利混合香料

做法:

1)   將羊鞍解凍後, 用清水沖洗乾淨後抺乾;

2)   用調味料醃1小時;

3)   燒熱油下羊鞍, 先煎帶皮一面 (約2-3分鐘);

4)   然後每面煎約1-2分鐘; 即成。

 

大堆頭製作【日式一品煲】(附食譜)

4月份係我工作最忙o既日子… 番大陸開會, 上廠, 出差!  完全冇時間, 冇精神, 冇心機煮飯!!! 聽日又開始出差, 仲要去足一星期… 所以點忙都要煮番一餐半餐俾師奶佬食。早幾日番完大陸開會趕番唻, 見時間尚早就去超市買餸 (一落雨我就唔多鐘意去街市買), 所以「大堆頭製作」又浮現我腦海中。

今次去日本超市買餸, 價錢雖然係貴過響街市買多多聲, 但耐唔時一次就冇乜所謂o既… 呢餐飯完全係”made in Japan”

材料:

日本大根

日本大白菜

日本絹豆腐

日本燒魚卷

日本白菇

甘荀

湯底:

日本3倍濃縮鰹魚汁4湯匙

日本醬油2湯匙

鹽少許

日本乾昆布

日本乾魚仔

做法:

1)   將大根去皮, 切片; 燒魚卷斜刀切件; 絹豆腐切件; 甘荀切片;

2)   白菇洗淨去根部; 大白菜洗淨切段;

3)   燒滾水後, 將鰹魚汁, 昆布及乾魚仔倒入水中煮滾;

4)   先將木根, 甘荀及大白菜放入鍋中煮大約20-30MINS或煮至軟身;

5)   然後放入日菇, 燒魚卷再煮10MINS;

6)   最後加入日本醬油拌勻再放絹豆腐在湯面上, 煮多5MINS;

7)   熄火焗5MINS, 即成。

小小心得:
a) 最後步驟才放醬油, 因為醬油煮得太耐會變酸;

b) 大白菜根部比較厚身, 需要較長時間煮至軟身; 所以一開始時先煮大白菜的根部, 最後的15mins才放大白菜的葉部;

c)   加咗昆布同乾魚仔, 湯底會較鮮甜;